حضرت مشتاق للاحباب= اللى لهم ود ما انساه
سلام واعلن لكم اعجاب= بالملتقى مؤسسه واعضاه

اوصيك جالس سليم الدين = واحذر تماشي سفيه ودون
لا قلت من هو جليسك مين = الناس تعرفك ويش تكون

ابني فصرح الوفاء مدماك = يبقى مسجل عليه اسمك
ان عشت بالطيبة طريـــاك = ولا مت يبقى الثناء قسمك

طاف النظر فى وجوه الخلق= يبحث عن رجال يعرفهم
عود عليهم وضاع النطق = ما غيره الدمع يسعفهم

كل ما مشت فالبلد رجلي = ادري بها موديتني وين
القى امامي ومن حولي = آثار كنا بها الاثنين

كنت احسب انه عزيز مهم= يسد فى غيبة اصحابه
لكن لقيته رجل معدم = سيان وجوده او غيابه

بيّه من الشوق مالا يطاق=ولا امل فى ملاقاهم
قلت التقى يوم فالآفاق = ما يعيضنى فزود فرقاهم

لاتحسب انك قمر ان غبت = او شمس تشرق فهذا الكون
تراك عادى لو انك جبت =من هو يؤيد ضلالك عون

لسنا سوى فى كثير امور = ولسنا على خلاف طول العمر
خلاف اهل العقل مقرور = ولا يفسد الود مهما يمر

فاول ليالى الهنا والنور = ليالى الصوم والقرآن
لعلكم فى هنا وسرور = وتقضونها فطاعة الرحمن

لكل من هو علي اخطا = بفعل او قول او معنى
الكل مما قدر اعطا = سماح للقاص والادنى

رجال تبذل مساعيها = فالطيب تشري منه وتبيع
تأبى الطبيعة فراعيها=الا اتغلب على التطبيع

عنا رحل موسم الخيرات = يحمل معه ما عملنا فيه
وحنا اذا ما احدنا مات = ما قدمه من عمل يجنيه

ما دامت ارواحنا حيه =ما قدرالله يصيب الحي
ويخفا على الناس ما بيه = لكن على الله ما يخفا شي

ابغى اسأل اللى سألوا قبلي= لقيوا عن اللى سألوا تبيان؟؟
غزر المدامع لدى المبلي = من اين تأتى الى الاعيان

نفسك لعافت طعام انساه = وابعد عنه واتركه لا تخاف
لابد تلقى بديل سواه = لا ترص نفسك على ما تعاف

ابغى افضفض وابيح السد = واكشف ما سوت بي الايام
صرح الآمال الكبيرة انهد = وضاعت معه اروع الاحلام

عوامل التعرية مرت = وواضح اثرها فهذا الكون
وتقدم اعمارنا ضرت = قواتنا. كيف نلقى عون ؟؟؟

لولا الامل يا حبيب الروح = وانى اكلمك فاحلامي
ما اسمح لعينى فسبات تروح= لاسهر وصورتك قدامى

تفتت دولة السودان = وسلة غذاء العرب ضاعت
والدور قادم الى الجيران = هاذي نوايا العدا بانت

يعصف بي الشوق يا غائب = عن طرفي اللي ما آسيته
ما عنك فى دنيتى نائب = لو انت بالعطف وصيته

تو ما بدت خطة التفريق = تنجح وتظهر معالمها
ياشعب تونس تنبه فيق = بلدك واحذر تقسمها

تكفى دع الناسك فنسكه = ودع راعي اللهو فى لهوه
الكل مبسوط فى ملكه = لذاك دلوه وذا دلوه

بعض العلل كامنة فالجوف = ويمشى بها المرء فى دنياه
تلقاه دايم فحالة خوف = يحسب جميع العباد اعداه

غزير دمعى قريب ان جات = بالزين بين العرب طرياه
واغزر واقرب منه بالذات = ان شفت بين البشر حلياه

شوف الشجر فالشتاء يطرح = اوراقه اللى نمت من عام
ويبدأ جديد الورق يشرح = دروس عن دورة الايام

مهما اختفى عن عيون الناس = فعلك وقولك عن الآذان
يعلم بها محصي الانفاس = وحسابك يكون بالبرهان

تصور ان العمر سلّم = وفى نهايته ينوجد ميزان
من جاء بالطيبه يسلم = ومن جاء بالسيئة خسران

طوف الدول حولنا وانظر = فاحوالهم كيف؟ وانت تشوف
ان الامن عندنا واشكر = ما فيه ما يخالف المألوف

ضاع العراق العزيز الحر = وتقسمت بعده السودان
وارض الكنانه لحقها الضر = من بعد تونس لها عنوان
وشوف اليمن بين كر وفر = والكل فى شانها حيران
وليبيا وش بعدها تجر = من الشرق والغرب للخسران
كل ما حصل يخدم اهل الكفر= ويفرق الشعب والاخوان
ما يجلب الشر غير الشر = وياكم مزّق من الاوطان

تبقى بلدنا فامان وامن = وفى حكم الاسرة السعودية
تمضى بنا من حسن لاحسن = بالشرع والدين محمية

ما تشوفك العين فى الواقع= لكن فعز المنام القاك
ماثل امامى بدر ساطع = افز والياك عني هناك

من لا انتمى للوطن واخلص= لاهله ودينه وحكامه
ينعد خائن منه يقتص = ان كان ما تاب . باعدامه

تحروا الخير. وجه الخير = بكرة ترونه على الشاشة
بخير. والشر فال الغير = اللى للاوطان غشاشة

شعبك بدون العطايا يحب = شخصك وعدلك وسلطانك
هبه وهبها لابيك الرب = مورّثة لك واخوانك

المملكة للعدل تربة = منتوجها الحب والاخلاص
لك ياملك اكبر النسبة = مقرون معها الولاء الخاص

تراقصوا والعدا تضحك = على البلاهة وسذاجتهم
بيديهم بلادهم تندك = وللاسوء تصير حالتهم

باقى معي فالهوى تذكار = ماثل كما هو قدامي
مهما تتقدم بنا الاعمار = احتاج له فباقي ايامي

شبنا وذاك الهوى ما شاب = مازلت اشوفه فعينى شب
لوكان قلب المولع ذاب= يكفيه يقضي حياته فحب

شفنا مطر ما نبت عشبه = ولا اروى عطش ناس عطشانين
قلنا وش اللى جرى . وشبه = هذا المطر صار وقعه شين