طاب الكرى للي على قلبه احجاب = عن جايرات اظروف وقته وغيبه
ينام خال البال مافز منصاب = ماكدره بالوقت همٍ وريبه
اصفى من الصافي زمانه ولا شاب = جوه من اللي قدمن له مشيبه
شيبٍ شوابيبن باشابيب الانشاب = شبن واشابن بالشبايب شبيبه
الا .. خلي البال مالفن ولا ناب = قلبه من اسباب الزمان المنيبه
يرفل بهندام الترف كل ماهاب = دربٍ بداله عنه دربٍ رضي به
واختار من مالذ وقته وماطاب = وانعم برغد العيش ناس ٍ ربيبه
اللي مثل ماقيل يسفه اليا شاب = رجالهم والمال ماينصخي به
عبـّاد للدرهم وصارو له ارباب = واستانسو بديار نجد العريبه
واكبر خطا صرنا انقلد للاذناب = نتبع عوايدهم وندفع ضريبه
لين الفتى منا ترفه ولا عاب = الا .. رفاه الغنج نقص ومعيبه
اللي له الترفيه من عاج الارقاب= يمه وكن البدر وسط التريبه
لاشع وسط الكون ليل الدجى غاب = واجلى غياهيب الحياه الرتيبه
المترفات بكل زاهن وجذّاب = غيدٍ غواهن من غداه ايغدي به
الفارهات الحور خوخٍ ٍ وعنـّاب = بخدودهن واشفيهن شفني به
غرو ٍ يغارن منه واغراهن اعجاب = يمتاز فيما حاز عما ادعي به
اصل وفصل والقد نبنوب سيـّاب = زمرد وياقوت ماسٍ قضي به
وسودٍ مكاسيل ٍ بهن شلف واحراب = صفين جند وهند واخرى رقيبه !
تلمع محاجرهن تحت خدر الاهداب = لاسلهمت عكشٍ تشابك عجيبه
او لج لجن باطرافهن سحر الالباب = برقٍ ٍ تكاشف حدر مزن مغيبه
من فوق وجناتٍ بها الدم ينساب = خدٍ جمع ليلٍ وصبح ٍ وهيبه
والخاتم الياقوت يلمع به ارضاب = سكر نبات ولول فاهن افهي به
يلهي ويشقي خافقٍ مابعد تاب= او تاب واسهى واستلبن لبيبه
للعين سهم ٍ واتلع الجيد نهاب = والموت بسهوم العذارى امصي به
مراتعٍ ٍ فيها الفنا دون طلاب = من مات فيها مايعزى قريبه
واخــــلاف ذا يفتر بالصدر دولاب = روابع ٍ تندار مما العي به
لاعٍ ٍ يفج الجوف لاادلى ابمخلاب=حرٍ مزع خفاق جاش الطليبه
واسهي وكني زاهدٍ وسط محراب = يرجي عظيم الشان ربي يثي به
من ما لجى بين المعاليق مرتاب = هو ذنب! والا ..حظ! والا ادعي به؟!
على يامن للغواليب غلاب = رحماك مابالقلب خفف لهيبه
همن غدى لـ معقد الوقت كرّاب = صاب الصميم وكل عرقٍ اكوي به
مع ما دهاه افراق غالين واحباب = الغيض خلّى اضلوع صدري حطيبه
وانتابني ضيقٍ بلا قيس واحساب = وامع الهجوس الهوج قلبي اسري به
بين اسودينن ماعلى غاسق الداب = شربن وهن ازود مخالب ونيبه
وافن جفاه وهم ليل ٍ له ايّاب = نابين سود وصايبتهن غبيبه
من بينهن يضرس امن الناب للناب = قلب العنا مخفاه خطر ٍ يذيبه
لو كان مابه في صميم الصفا ذاب = لا شك مابالقلب ماحدٍ دري به
لين امتنى لو ماالمقابيل غيّاب = او ماحضر منهن ايعجل ابغيبه
اللي وفاهن مالهن عنه مجناب = وش عاد لا قفّن او الـ فاً ينيبه
الا.. الهموم وليل الاحزان بواب = واللي مفاتيحه معي ذا سري به
خلت الرجا باب ٍ وجا للشقاء باب = والياس كم حطم اغصونن رطي به
وانسقت مع بابٍ فتح بعده ابواب= ابغى النجاه وزاد جرحي طبيبه
اشفق على شم النفس والهوا هاّب = وكم رحلةٍ منها السلامه كسيبه
الا.. ولاارضى غير ثوبي بالاثواب = والطيب سلمٍ للجدود اقتدي به
ولاارافق الا من عريبين الانساب = رفقة شرف ماهي مصالح وغيبه
غرسٍ بقا.. عله من الوبل سكّاب = والما ايعوّد للمصب وقليبه
فإن ماصفا ماها كما الماص صباب = والا انثنى بالغش عودٍ اغذي به
واكبر مرض من بين الاصحاب صحّاب = شك وشوير ومن تغيب اوشي به
والعيب كل العيب ليا صرت هيّاب = للطيب ماتارد ونفسك مريبه
والطيب ماكر كل طيب اليا طاب = ماهي غريبه منه هذا نصيبه
كساب للعليا وللمدح كسّاب = يستاهل البيضا بجوده وطيبه
والا الردي لو طاب طيبه له اتعاب = نفسه دنيه والمراجل تعيبه
واليا تهيت للردييّن االاسباب = تسبق اعجاف الجنف خطو النجيبه
ياهيه ماني للمخاليق نبّاب = يفهم معان القاف من يعتني به
احب راع الطيب لو هو من اجناب = واللي ايراوده الردا وش نبي به
ولاني وانا محمد بشمّات الاصحاب = يلعنك يارجلٍ ايعذرب صحيبه
انا خوي اللي على الطيب درّاب = ناسٍ اعدد طيبهم وانتخي به

المشاركة الأصلية كتبت بواسطة السهم الحربي (المشاركة 923814) الله الله صح السانك يامحمد البدراني قصيده جزله ورائعه من شاعر رائع بكل ماتحمله الكلمه من معنى لله درك على مابحت به وإلى الأمام دمت بخير

المشاركة الأصلية كتبت بواسطة غالي بن ربيعان (المشاركة 924633) محمد صح لسانك على هذ المعلقه انت شــــــــــــــــــــــــــــــــــــــاعر متمكن لا تحتاج لشهادة اي شخص لله درك ابهرتني قصيدتك بما فيها من جمال مفرده ربطة ين المفرده الحديثه والقديمه للامـــــــــــــــــــــــــــــــــــــام يالنشمي تحياتي

المشاركة الأصلية كتبت بواسطة سعد المحمدي (المشاركة 924963) الشاعر محمد عبد الله البدراني صح لسانك وبيض الله وجهك على القصيده الجززززززززله من من راعي جزاله دمت بحفظ الله ورعايته

المشاركة الأصلية كتبت بواسطة حمدفهيدالحربي (المشاركة 925007) صح السانك ابو عبدالله قصيده عصما مليه باالحكم ولابداع بدون مجامله

المشاركة الأصلية كتبت بواسطة علي حاسن (المشاركة 926259) قصيده عملاقه بكل مقاييس الشموخ من شاعر عملاق يملك كل ادوات الابداع والتميز قصيده مكتمله واستحقة التميز بجداره

المشاركة الأصلية كتبت بواسطة الجرح (المشاركة 926267) لاهنت وصح السانك تقبل التقدير والاحترام وفقك الله