ياللي خذيت القلب مبطي عسى خير=اتعبت عيني بالنظر ماتشوفك
لا يكون مني ياهوى الروح تقصير=وانا حياتي حاضرة مع طيوفك
اصبح على همي وامسي على (طير)=يحكي تفاصيل الزمان وظروفك
ويقول عذرك واقبل العذر تقدير=وإن صابني من قوله (الوقت) خوفك
ابدى اتحسف واحرق اوراق تذكير=واقول وش لي من طعاين سيوفك
غير الندم وشعور خنته بتفكير=يحجب لي الرؤيا على شمس جوفك
واعيد فيك الحال واعيد تفسير=واقول انا المخطي سبايب عزوفك
واكتب لك اشعار واشوف تعبير=يرسم لي الدنيا (ضيوفي ضيوفك)
ومن بين هذا الحال اغفى بتصوير=إن الجسد والروح تملى كفوفك
ويطيب كل الجرح من دون تبرير=غير القهر ياحب ماهي حروفك
اصحى مع همي على حزة عصير=واعيد نفس الحال من غير شوفك

ياسلام على الابداع الغير مستغرب
اسجل اعجابي بحرفك الراقي
صح لسانك وبيض الله وجهك
احترامي وتقديري