ياهل الالغاز وش بنت عجيبه=كل مابالكون ماطابق لثرها
جنسها بالكون بأعدادٍ رهيبه=مار ماهو مثلها لو اتحصرها
معجزه وانِشوفها منا قريبه=والله بتنزيله المحكم ذكرهادي

انشدك عن حرمه لها رجال=ورجالها عمال يتليها
وهي عقيم ولا تجيب عيال=والرجل الواحد مايكفيها

ويش الهنوف اللي رقيقٍ جسدها=وحياتها يومين والثالث الموت !
بنت الكريم اللي رحل مافقدها=اقفى وخلاها مثل قطعة التوت
ماشفتها الامرةن في بلدها=لاتشرب امن الماء ولاتاكل القوت

وش الغلام اللي مرفّّه ومرتاح=كافينه الاخوان وامريحينه
يبونه ليوم ن به السد ينباح=لاويّقت بقعا السدود المتينه
لازم يجيله يوم للكون نطاح=ياعارفين اللغز ياعارفينه

وش الفتى اللي يسهر الليل كله=ويرقد نهاره عقب ماقام ليله
ليله ويومه مايغادر محله=في ماكره عبر السنين الطويله
وان شافه التايه عن الدرب دله=ويشابه اسمه بالمواشي فصيله

البنادم كلف بحفظ الامانه=لو كثير من البشر ما يعتمدها
ويش خمسٍ حفظهنّْ من الديانه=من يجيب الحل من يذكر سندها
بسورة الانعام موجود" بيانه=والائمة فندوها مع عددها

يا هل الموروث وعلوم الوناسه=اسمعوا للي نقوله وانصتوا .. له
ويش رجل فيه طيب وبه خساسه=وطيبته دايم على الشك امحموله
ان مشى بالدرب ماتسمع حساسه=وان لفا عند المعزب زغرتوا .له
لانواله ديرة عقب العساسه=جني سليمان مايفعل افعوله

انشدك عن عدة بناتٍ شجيعات=مايوصفن على البنات الرعابيب
الاصل واحد والاسامي كثيرات=والفعل بأمر اللي له السر والغيب
لهن على بعض المخاليق غارات=يمشن على بعض القبائل عواقيب
لو عارضن شيخٍ يصد المغيرات=ايحوّلنّه من طويل المراقيب
ياكود رجلٍ فالسنين القديمات=اعطنه الطاعة بليا مشاعيب

لقيت لي شيخ عليه المهابه=جابتني الاقدار وامسيت صوبه
قلت السلام ولاتلفظ بجابه=وشوفي بعيني يوم قالت جنوبه
راسه ورجلينه وبطنه تشابه=ياهولتي به كل خلقه اعجوبه
يذكر لنا جوفه من الخلق غابه=ولاشفت فيه الا البني اللعوبه
راع الغنم لو نمدحه ماشقابه=وامصلحين الذود مافكروا به
وقت النبي مروا عليه الصحابه=وقدم لهم ماجوبهم وافرحوا به
كم واحدٍ زاره يريد الكسابه=احد كسب واحد تحول كسوبه
يالربع مافي كل قولي غرابه=واضح وضوح الشمس مابه صعوبه

ويش ورع شال بنت ماتسره=حطها بين الظلوع ولاسترها
ينضرب فيه المثل لله دره=والبنيه محتمل ورعك خطرها

ياسامعين اللغز يامفسرينه=اللغز عن عود كبير دماغه
له بالقرى مسكن وله بالمدينه=نحب شغله مير نكره فراغه

ياويش رجل لقيته مع جميع العرب=ماينجهل وايتشابه بالاسم والحروف
رجل معه ورع يفزع له يفك النشب=هل الشقا عندهم قاضي ببعض الضروف

من سنين غابرة والعود ثاني=دون قومه ماتردّى في مقامه
في زمان فات له بالكون شاني=فارض نفسه وقدرة واحترامه
مار قدره قل في تال الزماني=اعتلوه اطفال من عقب الكرامه

ياويش ورعٍ فيه قوة وله بأس=بأشد خلق الله يسوي سوايا
الطول حول المتر وامدلمك الراس=وعليه من حليا عدوك حلايا

انشدك عن شيخ عزيز مقامه=ماله شبيه الاّ فتاةٍ عريقه
قبل آصفه يجب عليّ احترامه=والبنت دونه ماشيه في طريقه
اللي صفاله بشّره بالسلامه=وباقي اوصوفه كان تبي الحقيقه
أمه اليا وصّفتها تقل شامه=وله غاية دايم اعراها وثيقه

ويش بنت خلقها الله وكثّر نماها=والنما مايشوف امه ولا ابوه شافه
يوم جت للديار اللي جذبها حياها=حطته بالنفود وزوّعت بنصرافه

ارخص الموجود فوق الوطا واغلا الوجود=الثنين اللي لهم شان رجال ومره
كل واحد ضد الاخر وفي طبعه حقود=الرجل يخاف منها وهي ماتقدره
المره عدوّته وان لبس عنها البدود=والرجل عدوها وان نزع مايستره

انشدك عن بنت لك الله شريفه=مكانها مجلاس حشمة ومقدار
واحيان بيدينك تهين العفيفه=برضاك تدخلها على دار الاشرار

انشدك عن رجال مهدور دمه=وظيفتة ينقز من بيوت لبيوت
الاسلحة بنواعها ماتهمه=لكن لو طخه ورع جاهل يموت

انشد اللي يفتهم بالمعاني والرموز=مايكيده حلها لو نصعّب حلها
ويش بنت بيّنة .. يالربع مدري عجوز=ما بقى من عمرها كثر ما ماضٍ لها
ماتحب العبد والعبد فيها مايفوز=تستحل الحر والحر دله دلها
دلها دل الكرم وانت عنها ماتجوز=مار طعني واسترح منته بواصل لها

انشدك عن ضيف يضيف المعازيب=يذبح عشاه ولايذوق الوليمه
يشرب ولاياكل ويسمع ولايجيب=والحل وارد يالعقول الفهيمه

انشدك عن رجل يفيدك وقافه=يعطي ثقه في وقفته وان وقفها
سميه نفوس النشاما تعافه=بعض النفوس اللي كبير شرفها
كبيرهن من دون داره مسافه=في ديرة بالذكر لو ما اعرفها