هلت هجوس الشعر واشغلت بالي=الطيب اللي في زمانـي صفالـي
قم ياخفوقي فسر اللـي طرالـي=ياالله عسا في الامر خيراً وخيـره
جاوب خفوقي وقال يابن الحلالي=اكتب على طاروق زيد الهلالـي
من صافي اشعارك ومد الحبالـي=لاهل الشعر والكيف في كل ديره
قلت ابشر انا بمد حبل الوصالـي=لاكن سمي لي جويـد الرجالـي
اللي كسب في الاوله والتوالـي=ابنصاه كبير القـوم ولآ اميـره
قال انا سميـت فـارس مثالـي=ذيباً رقا في روس كل الطوالـي
فايز ابن عايض طويل السبالـي=وش قلت يارع البيـوت المثيـره
قلت انا هليـت باهـل المعالي=سلام من غالي إلـى راس غالـي
جاك الشعر ياذيب سود اليالـي=والشعر مرسال العقول الكبيـره
وسّـم يافايـز وهـذا عقالـي=عقب السنين الفايتات الخوالـي
نبي نمد الوصـل يـاراس مالـي=عطني علومك يازعيم العشيـره
صب فنجالاً من الكيف حالـي=مبهراً بالهيـل جـوف الدلالـي
من كيف ابو ماجد رفيع الجلالي=وانـا حـراوي لليـال المنيـره

لا ينشغل بالـك مـادام استوالـي=درب المعالـي ياسمـي المعـالـي
الطيب راسي مثـل شـُم الجبالـي=فيه الزهر فايـح بزاكـي عبيـره
ويامرحبا باللي هجُوسـه سرالـي=غنا علـى قافـاً وطرقـاً هلالـي
ابدع بحرفه وطـاب فالـه وفالـي=شاعر وحرفه مثل سيـف المغيـره
جتني حروف ابداع من حرف خالي=خالي وخال ابوي و الراس عالـي
ودايم على الطالات راعي الكمالـي=ياحي فاله وحـي ذكـره وسيـره
ياخال مافي شك ولافـي جدالـي=الذيب خاله ذيـب ماهـو ثعالـي
هذا مثل قد قيل من عصـر بالـي=كُلاً علـى ميـراد جمّـات بيـره
هليت بالمعنى وحرفـك حكالـي=لازم نرحب فيـك بـاول وتالـي
جاني عذب شعرك وفيـه الجمالـي=ومرسالكم فيـه المعانـي غزيـره
تسلم ويسلـم عزكـم ياخوالـي=ولاشك منزالك فـروس العوالـي
وابشر بعزك والسعـد فـي قبالـي=لوكان معطينـي الزعامـه كثيـره
سنعّتلك دله مـن الكيـف غالـي=وطبختها تُجّلب من عسير المنالـي
لجلك يا ابو ماهر تشيل الجمالـي=حتى ولو كانـت حمُـلاً عسيـره

المشاركة الأصلية كتبت بواسطة سعودية (المشاركة 740791) صح لسان خالك الشاعر خالد المعبدي ابو ماهر صح لسانك شاعرنا فايز المحيسن على هذا النظم الرائع ولاهنت ولاهان حضورك وتميزك تحياتي لك

المشاركة الأصلية كتبت بواسطة العز نبضي (المشاركة 741028) صت السنتكم وعلا شانكم الشاعر ابو ماهر المعبدي والشاعر فايز المحيسن ابدعتم تحياتي

المشاركة الأصلية كتبت بواسطة عبدالله عتيق الحنيني (المشاركة 741090) والله صح السانك ابداع وجزاله برد والاسناد وافي والقصايد جزله وافيه بدون مجامله من وجهة نظري صح السانك مليون مره وصح السانك خالك يا الذيب وللاحاطه طريقة الالتزام با القاف بهذا الشكل يعتبر ابداع لان هذا طاروق مروبع بمكانك تثبت الاخير وتازن على ثلاث مواقف بختلاف يعني مثال شاعر شاعر مهما يكون غالي والجوهر مضمون من صح السانه مليون والاشاده له تكرار طاروق مروبع وكيد وحنا منكم نستفيد ويكتب الله مايريد والاشاده للا اخيار

المشاركة الأصلية كتبت بواسطة بخيتان البشري (المشاركة 741126) إبداع في إبداع يافايز صحت السنتكم وبيض الله وجيهكم وانا من عشاق المجالسي واسجل إعجابي الشديد بهذه التحفة

المشاركة الأصلية كتبت بواسطة الحب الباقي (المشاركة 742445) صحت السنتكم والله يـعـطـيـكم الـعـافيـــــــــــة بيض الله وجيهكم