ماللأصيله غير أخوها الأصيلي=ولا للعـِلاقه غير أخوه العـِلاقه
النرجسيه جابت آخر موديلي=وتطرّقت طاروق ما هو سـِـراقه
وأنا من اللي لي ويش يغديلي=كل الحقوق مسجــّـله بالبطاقه
يامرحبا ترحيب نو ٍ ثقيلي=للبرق بعروض الخيال إنشعاقه
يفرحبه اللي كل ذوده هزيلي=ما عنده اللي ما يذوق ٍ ذواقه
لوالله أحلى من حلا السلسبيلي=على الكبود المرهقه عقب فاقه
ما أقول غير من الكثير القليلي=ترحيبة المشفي بشوق وشفاقه
يابنت ما ني للمشاكل كفيلي=آخذ جلال العلم وأترك دقاقه
لوا هجادي منك وآطول ليلي=أبحث عن الجوده برفق ورواقه
أحاول أقنع كل من يشتكيلي=اللي من الأجناب ومن الرفاقه
واللي يدوّر حل للمستحيلي=ماله سوى حل ٍ يضيــّق خناقه
عسى الثـّـقه من كل جانب حصيلي=والآدمي لولا الثـّـقه وش وثاقه
عندي ثقه في عملتي وبعميلي=ما أحمـّله مشروه خارج نطاقه
أرد كان الحق ماله بديلي=والكذب بظهار الحقايق زهاقه
ولاني برأيي حسب عرفي بخيلي=ولا أبادل الجاهل كفوف الحلاقه
عندي دليل إن الثـّقه ما يعيلي=ولابد للعاقل بوقت إنعزاقه
وأهل الكلام السيء ما أخلوا سبيلي=قبلك لحقني من غثاهم لحاقه
لو ضقت ما أشعل بالزناد الفتيلي=مرونتي خشنه ولاهي رقاقه
يابنت ما أشفي بالنميمه غليلي=أقول وأقابل بدون إدّراقه
ولا تجاملين مروّجين النقيلي=وراع النـّفاق يطق مع عظم ساقه
يعني على ما قيل مثل الرجيلي=وإن قيل هذا ليه؟ قولي حقاقه
يالنرجسيه لو مصابك جليلي=العود الأزرق جودته بإحتراقه
وتقبـّلي تحيتي وإسمحيلي=القاف متعبني بكثر إنطراقه