يالله باسمـك أبتـدي نظـم الأشعـار=وأهدي سلامي حـرب واللـي حظرهـا
نيابه عن أهل الحفـل كبـار وصغـار=أرحـب وأهلـي عـد وابـل مطرهـا
بأهل الحفل واللـي لفـى الحفـل زوار=والله يديـم الـدار والـلـي عمـرهـا
واللي حماهـا مـن طماميـع وأشـرار=وخلى التلاحم صورتـن مـن صورهـا
ومن كلمة التوحيد سـوى لهـا أشعـار=وجود بناها عـن الشـرور ونصرهـا
عبدالعزيـز وجعلـه اليـوم فــي دار=الفردوس الأعلى يقتطـف مـن ثمرهـا
ومن حمد ربي عقبه على النهـج سيـار=سنـه حمـيـده ومقتفـيـن لأثـرهـا
والحفـل هـذا دليـل مـن الأثـمـار=نتـاج بـذره صقـر الجزيـره بذرهـا
تزينـي يـادار فـي لبـس الأســوار=وحطي علـى جيـدك غوالـي دررهـا
ثم افرحي يادار فـي شـوف الأخيـار=وقولي هلا في بدوهـا وفـي حضرهـا
وهاتي مزايين الأبـل اللـي لهـا كـار=عند الرجـال اللـي تحبهـا وتخبرهـا
شوف الأبل يجلى عن العيـن الأكـدار=ويرجع على العين المريضـه بصرهـا
شهد لها الخالق كيـف تلفـت للأنظـار=في شوفهـا وشـوف طلعـت وبرهـا
زين الأبل يحمـل معانـي ولـه أدوار=في عرفهـا وطبوعهـا وفـي سيرهـا
وهذى مزاين حرب من نسـل الأحـرار=تسـر وتعجـب كـل منهـو نظـرهـا
هـذى عطايـا الله قـعـدان وبـكـار=عسى الله يجنبها الخطـر مـن بشرهـا
عسى الله يرزقها بالحيا وزود الأمطـار=حتـى تربـع فـي طـوارف ديـرهـا
وعسى الله يديم الأمن وخفضان الأسعار=ويديـم للديـره نورهـا مـن قمـرهـا
عبدالله حبيب الشعـب الناصـح البـار=ووليه وإخوانـه عزهـا وهـم جبرهـا
الله يديـم لـعـز وافـيـن الأشـبـار=هـم ذخرهـا لامـن تطايـر شررهـا
اما ابـو فيصـل بـه المـدح يحتـار=الـلـي مـذلـل للمـزايـن وعـرهـا
كريم سبـلا يـده مـن الخيـر مـدرار=احيـا نباهـا عقـب وقتـن دثـرهـا
تشجيعه وبذله من علامـات الاصخـار=وصـدق المحبـه للأصالـه نـذرهـا
لاما غدت في كل المناطـق والامصـار=فكـره عظيمـه مشعـل اللـي نشرهـا
ترفع له البيضـاء علـى راس مسبـار=بعال الهضاب ومـن نظرهـا شكرهـا
وعساه يسلـم مـن صواديـف الاقـدار=ويبقـى وسـام معلقـن فـي نحـرهـا
أهل الأبل تاقـف لـه اجـلال واكبـار=لجلـه اعـاد لهـا لجزيـره سفـرهـا
تراث الاجداد اللي سمعنـا لـه اخبـار=صرنـا نشوفـه مـا نتحـرى خبرهـا
يامير مشعل انـت والصحـب الاخيـار=تشريفكـم ملـك القلـوب و اسـرهـا
جيتك اضفـت علـى الحفـل الانـوار=أهلا هلا بـك أنـت واللـي حضرهـا
نهـدي لبـو فيصـل ترحيبنـا الحـار=من اعماق القلوب اللي بحبـه غمرهـا
ولايفوتني بالشكـر مـن كـان سهـار=علـى نجـاح الحفـل وأحيـا سهرهـا
أخص لأبن دليم ومـن معـه حضـار=عبـدالله البدرانـي وقفتـه نعتبـرهـا
وقفت وفـاء منظورتـن سـر وجهـار=واللـي معـه أفعالهـم مـا نحصرهـا
عسى الله يوفقهـم مـن غيـر أذكـار=وأرجو السموحه من شأن أبغى اختصرها
ابو بدر يستاهـل مـن الشكـر مليـار=ومتـأكـد أنــه مايـبـي ينتظـرهـا
ولكـل منهـو حاضـر الحفـل مقـدار=وقنوات التراث اللـي باسمـه شهرهـا
تستاهـل التقديـر مـع كـل إصـرار=لأفـرادهـا والعاملـيـن بـأسـرهـا
مـن اكبـر مديـر ليـاحـد كـومـار=المصـور اللـي كاميراتـه سطـرهـا
وهـذا الحويفـي يبـي بـس مـعـذار=من كـل شخصيـه بالحفـل ماذكرهـا
الكـامـل الله والبـشـر دوم قـصـار=وكلـن حسـب جهـده يمينـه فسرهـا
وصـلاة ربـي علـى سيـد الأبـرار=إعـداد رمـل سهولهـا مـع حجرهـا