يامل قلب ٍ قـام يدلـج بـي إدلاج=ويشكي ظروف ٍ عند ربـي فرجهـا
يبغى الطلوع ولا لقى درب منتـاج=وساج بمعاليق الضلـوع ونفجهـا
أعول عويل اللي من الولف مخلاج=اللـي ولدهـا بالمظامـي حنجهـا
كنّت اليـن ان الظمـا بكبدهـا لاج=وآخـر بلايلهـا ولدهـا لهجـهـا
قامت تمدرج له على الماء تمدراج=ولا قام طاح وخطوته مـا درجهـا
وأمست وجاها مسلوع ٍ يمرج إمراج=وحجم عليها وعن ولدهـا فلجهـا
وقامت تلوج وتدرج الموقـع إدراج=حول الفريسه ما أبعـدت مدّرجهـا
قامت تسوهج من غبونه تسوهـاج=حر النما بمثنـاة كبـده سهجهـا
على الذي لا شفـت مثلـه ولا داج=في نظرتي والناس مارقى درجهـا
ابـو ثمـان ٍ لأبتسـم بالتـبـلاج=تجهر الـى مـن الشفايـا بلجهـا
بيض ٍ تلالا وسطها السوس ما داج=ولا تلثق الابـره بمفـرق فلجهـا
والعين فيها يطّرد مثـل الأمـواج=سوداء ولو هو بالكحل ما دعجهـا
وخده صقل باللون من غير مكيـاج=وشقرن على مفرق متونه حدجهـا
وكلامه أحلى من شراشيـح هـدّاج=على الكبود اللـي بـراده بهجهـا