الالف لف الوقت ستين لفة = مع كل لفة جات في الناس خفة
احد (ن) ثبت واحد (ن) وقع من مطفة = وراح يشكي وقتنا من خطاياه
والبا بلاوي ذا الزمان البشتنا = من كل صوب(ن) جاتنا واربشتنا
كل(ن) يصيح يقول من وين جتنا = وحنا عرفنا دربها اقصاه وادناه
والتا تحدانا الزمان وجبرنا = على امور(ن) عن مداها قصرنا
من يوم جتنا ساهمت في قشرنا= وحنا نجاريها وبئس المجاراة
والثا ثبت عندك وعنده وعندي = انا خضعنا للآ مر والتحدي
ولا لقي وقفة كفاح وتصدي = ترد عنا كل علم(ن) نبذناه
والجيم جم الما من البير ولا = والغيث من عالي مناشيه قلا
وراع المواشي من دياره تجلا = بيع حلاله بعد كثر المعاناة
والحا حكمنا حاكم(ن) يرفع الراس = حاكم عطاه الله حكمة ونوماس
صقر الجزيرة بعد ماوحد الناس = سن العدالة بينهم والمساواة
والخا خطى الشايب بحكم الشريعة = وشفنا عياله ماسكين الطبيعة
دايم حكومتنا رشيدة منيعة = طيب الولد من طيب ساسه ومنشاه
والدال دلونا طريق السلامة = اهل الكرم والجود واهل الشهامة
وياما نهونا عن طريف الندامة= عسى سيوف العز للعز والجاه
والذال ذل الناس من تفرقتهم = في القول والافعال ومخالفتهم
لاقوال رب البيت ومتابعتهم = للغازي اللي قام يبدي خفاياه
والرا رمانا الغزو رمية قوية = جانا الغزو من كل صوب(ن) ونية
يبغا يرد الناس للجاهلية= حتى نجي فالطبع مثله وشرواه
والزاي زاد الطين ياناس بلة = الكمبيوتر والقناة المملة
الليل كله والنواظر مطلة = ونحرك الريموت في كل مجهاة
والسين سرنا في طريق الدمارا = الصبح نرقد والليالي سهارا
تبع المصالح دايما في النهارا = وحنا رقدنا والمصالح مخلاة
والشين شفنا المشي شي معيبي = حتى العمل شغله علينا صعيبي
يالين شبنا قبل وقت المشيبي = واليوم لو نبغاه ماعاد نقواه
والصاد صرنا الكل يشكي شكية= املاح مع سكر وعلة خفية
ونراجع الدكتور صبح وعشية = قال المشي والشغل خير المداواة
والضاد ضرتنا بضايع تجينا = في معلبات كل يوم تفينا
كيكة وبسكوتة وياما شرينا= ناكل من المعمول ونقول محلاه
والطا طرقنا الباب باب الحضاره=جينا لها في كل حي وحاره
حتى عرفنا الرابحه والخساره= وكل على ماراد يشعب مطاياه
والظا ظهر فالناس حب العماله=سايق وسياره وراعي حلاله
وحارس فوسط البيت يحرس عياله= وحنا نيام وحارس البيت يرعاه
والعين عنوان الخطا فيه رده=همة قوي الحيل خصمه وضده
غصبا عليه يوقفه عند حده=والله عوين اللي يبي عون مولاه
والغين غفران الخطايا هدفنا =نطلب من اللي بالا جابه وعدنا
وحنا لنعمة ربنا ماجحدنا=طول الدهر ندعي ونطلب عطاياه
والفا فروض الدين تامر وتنهى=ولالنا مصلوح فالبعد عنها
لازم علينا ناخذ الحل منها=في كتابنا اللي كلنا اليوم نقراه
والقاف قل يا لله عسى الحظ قايم=صحوة ضمير يقوم من كان نايم
وبالخير ينعم كل من كان صايم=درب الخطا نقفل طريقه وننساه
والكاف يكفينا الدعا كل بلوى=نرفع يدينا عن قناعه وتقوى
والله عليم بكل سر ونجوى=ويجازي المخلوق في كل ممشاه
واللام لي مطلب عزيز وغالي=يالله ياعالي على كل عالي
ياعالم احوالي عليك اتكالي=ياللي خلقت العبد تنظر لشكواه
والميم ماندري عن الحد والماد= نسعى ولا نرمي به الا فالا بعاد
عسى الحياه تكون في عز الا سعاد= والمنتهى توحيد ربي وتقواه
والنون نامت كل الا عيان بدري =الا عيون اللي عن الخلق يدري
وماراده الخالق على الناس يجري=الله يوفقنا على حال يرضاه
والها هاجوس(ن) فالضماير طرالي=زود شجوني ثم حرك خيالي
وانا ذكرته بعد جاله مجالي=من يسمعه لا ينتقدني في ذكراه
والواو ويلات العرب قلة المي=يارب عطنا الغيث يروي لنا الحي
يسقي غروس(ن) تشتكي قلة الري=والله كريم ويعطي اللي ترجاه
واليا يقول الشاعر اللي بنا البيت=ابغى السموحه ياعرب كاني اخطيت
يالله تغفر زلتي كان زليت =وصلو على محمد ليا حل طرياه

صح السانك ياحسين العبيدي
على القصيده الطيبه
وافيه من واافي والله يعطيك العافيه
لاهنت