إعزم لنفعك لا تهمك صعوبات=وحط الثقة بعد التوكل في الأسباب
كل ماترى من علم والا اختراعات=صنع البشر بالعقل مفتاح الأبواب
بالعقل تحكم سير أمورٍ خفيات=وبالصبر تلقى الهدف تالي الباب
خذ من ضياع الوقت صورة لما فات=راحت بما فيها من أفراح واتعاب
ما باقي الا أجرها حسب ما جات=والا أثرها من علومك الآداب
واحذر عليك العمر محسوب لحظات=لا ينقضي وسط انتظارك لما غاب
لا تعتذر بظروف والا ملمات=لك فرصةً بالعمر ما يجيبها حساب
رتب أمورك وابتدي بالأساسات=وما بقي من وقت يعطى للأصحاب
واحذر من اصحاب الترف والغوايات= أفكارهم أسرع من الدم تنساب
ما منهم اللي ينفعك بالملمات=إلا لمالك تفتقدهم إذا غاب
ما تجني منهم غير تضييع الأوقات=إذا البصيرة فارقت نهج الأحباب
بمطاوعك للنفس في دروب شهوات=تلغي العقل بين المخالب والأنياب
وارعَ النعم لا تزيلها بالغوايات=وزيدها بالشكر من بذل ماطاب
تلقى أثرها في الفتن دون ميقات=وفيها الفرج لا استلزمت عضة الناب
النفس ما تشوف النعم والملذات=إلا إذا غابت وصار الشهد صاب