يافيصل ابن حمود قلبي له أيام=يجيه همه كل مايظلم الليل
كلا" ينام وعين صاحبك ماتنام=يسري مع الهاجوس ويحط ويشيل
بين الرجاء والياس يبني له أخيام=يهد يبني مايجيله محاصيل
هذي ثنا عشر عام من غير هالعام=ومن قبلها عشرين جمله وتفصيل
اصارع الدنيا وعايش بالأوهام=وليا طمعت بعدلها زادت الميل
أركض وقول الفوز ابلقاه بقدام=واثر عناي من الليال المقابيل
لياقضينا زام يبدي لنا زام=شتات فكر وهم وزودت غرابيل
أحلام ليل وضاع تفسير الأحلام=علت حشاء ماتنكشف بتحاليل
دنيا تزايد ميلها يابن الأكرام=لو ساعفت لابد ماتضعف الحيل
الله يجيرك من صودايف الأيام=قامت علينا تسرج الجيش والخيل
الحر فيها يابن الاجواد ينظام=وطير الرخم توفي له الوزن بالكيل
والخاتمه بعداد ذعذاع الانسام=أقبل تحياتي ياذخر المشاكيل

صح لسانك مليون ياعلي الغلاب وعلاء شانك لاهنت يالغالي