ياسعود يوم انته على شاطي النيل=في ديرتن حسني مبارك ولاها
ماشفتلي راع الرموش المظاليل=اللي شكى راع الهوى من هواها
راعي ثمانن مثل برق المخاييل=لاقامت اتلوح بظلامن غشاها
ونجل العيون اللي غدتلي غرابيل=مع العنق واللبه وظامر حشاها
إن شفتلي شقرآ تموح اشقر الذيل=يذكر علي الجادل اللي كساها
مثل القمر لاتم ياسعود بالليل=عمهوجتن ياسعود باول صباها
ياسعود ودي مير مالي مواصيل=لهاك الدياراللي سطابي غلاها
يالله عسى يضفي على دارها السيل=حتى تزين القاع للي مشاها
ماللردى ياسعود يمي مداخيل=حظي هو اللي مع طريقي حداها
ياسعود قبلي من زحول الرياجيل=كم واحدآ طخم الطراخم شكاها
واليوم يانسل الرجال الحلاحيل=لافرت الدنيا العنيده رحاها
بغيت اوسع خاطري بالتماثيل=واسند على رجالن يذري ذراها
وجاك السلام وبلغه للمشاكيل=روس الرجال اللي شريفن نباها
يامقندين البن من فاخرالهيل=في مجلسن طيب السوالف حواها

جاني عبر ديوان حرب اعذب القيل = من شاعرن فيه افتخر واتباها
وانا ورى حدود الوطن عبر الإيميل = وقريتهن والحرب تطحن رحاها
اجازتي قضيتها و سط الوتيل = وناصر معي بحدود درعا قضاها
ابعد اخطانا عن حدود السكن ميل = الى ثارت الضربه سمعنا صداها
نتابع محطات الفضاء والتحاليل = كلن يحلل شكل على عماها
وعدنا قبل تبرم علينا المحابيل= للديره اللي صقر نجد يحماها
وهذا سبب تأخير رد التماثيل =حقايقن من راوين ما فتراها
والمعذره يا محمد ياشاعر الجيل = جتك الردود وجاك عذري معاها
بعض المحبه ياحمر عين تخييل = ميز طريقك قبل تمشي وراها
كذبان مصر اللي تجي بالتماثيل = احذر تصدق يامحمد دعاها
يبدأ المطر بالرش ثم ينقلب سيل= وان زاد روس النايفات يغطاها
قلبك غزاه اللي لقى به مداخيل = ريميتن عضه علق في هواها
ارض الكنانه للظبيه مداهيل = عنها مايسلى من شرب حلو ماها
عطني تواصيف الظبي والتفاصيل =وعندي خبير اليا نخيته لقاها
من ذاق حب ضويقات البناطيل=اللي تقل شوكه مواطي احذاها
من الدلع تمشي تقل مابها حيل = مشية حمامة ( بر) تقصر اخطاها
والغره الشقراء تمشط على ميل=ولو تنقض الأشقر تثني وكساها
شمس اليا بانت تجلى اسود الليل =من الجمال الفاتن الله عطاها
ياويل قلبن صوبه حبها ويل = لاتصدقه لو قال تاب ونساها