يامـل قلـبٍ ساقـه الهـم ونـسـاق=سـوق الخيـال اللـي تزايـد بـنـوه
ركـز قنـوفـه والهمالـيـل دفــاق=وقعه حقـاق وفاضـح الليـل ضـوه
جلست أخيل خيـال مـن دون بـراق=وأظـن مـابـه للشـقـاوي سـلـوه
الا يزيـد القلـب والقـلـب خـفـاق=يلعبـه الهوجـاس لـعـب الشـلـوه
واعشقتـي يـوم نظـرت بـالأرنـاق=خليتـهـا عـنـي شـمـالاً بـهـوه
يوم أقبلـت فـي دلهـا الكـل عشـاق=صادفتهـا بستـان غـضـاً نـمـوه
تنثر زهـور الـورد بكفوفـاً عتـاق=ليـا أقبلـت وقفـت بخيـره وســوه
غفلـت والأيـام فــي كــف دراق=وقتـاً درقـنـا ودار مـالـه لـهـوه
وليا أدبرت دوراتهـا حـزن وارهـاق=تمشـي بسيـفٍ حـد ماهـو تـمـوه
شفته وغيري من فطن لـه بالأرمـاق=وضاعـت هقـاوي طيبيـن المـروه
وخلت لواحيـق العوالـي لهـا عنـاق=ولها علـى بعـض المواقـف جـروه
وحروف ماتنطق في الموقـف الشـاق=ماشالـهـا حبرالـقـلـم بالـتـنـوه
واحترت حيرت من شكاء شاضي الساق=خلـوه ربعـه هيبتـآ مـن عــدوه
وابطا يطالـع بالنظـر عقـب مافـاق=وعيـت عظامـه لاتشيـلـه بـقـوه
مثلـه عطنـي سـود الايـام مـاذاق=والقـوت ياماجـد بغـانـي بـغـوه
لولاي أسلي خاطـري كـل ماضـاق=وأختـار مـن زيـن المثايـل علـوه
لاقنب كما ذئبٍ عـواء عقـب مـاواق=أشرف علـى عـدٍ مـن النـزل تـوه
تفرقـت قطعانهـم عقـب الاشــراق=من يـوم عسـاس الحيـا قيـل قـوه
قيل العلـوم وقـال خوذوهـن اسبـاق=علـم الحيـا ماكـود ماهـو تـلـوه
شالو على وضحن مزاهيـف وسبـاق=لهـا علـى قطـع الفيافـي ضــروه
وقفـت لـهـا مــع دوٍ تصـفـاق=ليـا أفختـت قـدام حــس الـمـدوه
وصلو عدد ماسـاق حبـرٍ بـالاوراق=عـلـى نبـيـاً خـاتـمٍ بالـنـبـوه

يامل قلـبٍ مـن طواريـه تـواق=يمسي ويصبح بالطـواري غـدوه
يصفق به الهاجس على كل الآرناق=كدر زمانه يافتـى الجـود جـوه
بأسباب مضيومآ من الوقت محراق=ذيبٍ عليـه مـن الليالـي حفـوه
وانا على الطيب عطوفٍ ومشفـاق=لوهو من الاجنـاب ولا السمـوه
انا معه في كـل ميقـاف صـداق=لو كان مال الوقت عنـدي عنـوه
غنيت من قلبٍ من الغلـب زهـاق=وش عاد لو قاسي زمانـه قسـوه
يسوق مضمونه من القلب سـواق=دافع وفاء مامـون مالـه إخفـوه
لاباس ياشقـران يالحـر شـلاق=يامن معه طيب السجايـا اربـوه
هذي سوات الوقت غـدار بـواق=يقفي على الطيب ويضفـي بسـوه
تصفي لتبع وتسقي الذيب شبـراق=يقطعـك دنيـا ماعليهـا اشفـوه
لو أقبلت لابد من يبـس الأريـاق=سيلـه علـى كـل النحاياضفـوه
اليا أقبلت تنقاد مـع كـل حـداق=وليا أدبرت تكسر عصي الحمـوه
وليا أقبلت خذ لك مع الوقت مزراق=أبر الضمير ويابـس الشـن روه
وليا أدبرت مالك عليهـا تلحـاق=ارشاك عن كـل المواريـد طـوه
الوقت يانواف له مـوج صفـاق=كـلٍ بلوعـات الليالـي بـنـوه
واللي حصله مـن لياليّـه خنـاق=واللي يبيهـا فـي عياهـا تفـوه
وانته شريت وبعت في كل الأسواق=وأظن عنـدك بالتجـارب كفـوه
وعبرت عن ما بالضماير وما لاق=وقفلت دربٍ يتعـب الرجـل دوه
واقبل تحيات الوفاء نبع الأشـواق=لاقول زور ولا سوالـف رهـوه
وصلو على المختار مرسال خلاق=اللـي ختـم فيـه الكريـم النبـوه