تهيضت يوم الماقف الملزم الغصاب=على الناقيه جاوبت ياللي مناديني
نظمت الحروف اللي توردك للمشراب=عذوب الروا دايم ترويك ..ترويني
ليا جيتها تقنع ولا ملت للمجناب=أنا ما ازهم المقفي ولوكان يعنيني
وروس الرجال طوال والقاسيه تنهاب=ولا جابني علم ن وعلم ن يوديني
أنا دون ربعي فالملاقا على الطلاب=تنبا السنين تجيك فيها البراهيني
خصيم الخصوم وذابح الحيه ام الناب=ولا يوم عن ربعي تعذرت ما مديني
ولا يوم عن ربعي درقت الوجه والباب=ولا قلت ياربعي ترا الوقت معضيني
ولاجات زله من رفيقي بدون اسباب =ما اقول إله عن رفقتك ربي بيغنيني
اورد عليه الشرهه اللي كفلها اعتاب=ونشرب من الصافي بعذب القوانيني
ترا الرجل يقنع بالوفا لرما وانصاب=ومن لا قنع تشهد عليه المضاميني
أنا شاري الرفقه بعرق الدما المنساب=حلفت ابرضا ما بيع لو مكسب ايجيني
وبيت ن ياربعي فيه من رامث الاطناب=يقشعه نسناس ن ليا هب يحييني
وانا قول سيف العز عزه عزيز انصاب=وأنا اقول درع الصدر عزوة سلاطيني
ولا يا الفهيم العاقل الحاذق الكسّاب =لويت الليالي لي وليال تلويني
وابا اعطيك من درس الليالي وجيز اخطاب=على منهجه تمشي طريق الكريميني
قبيلتك يا (( نواف ))عالين فالمرقاب=جدارك وسدة بابك وسيف حديني
وإذا إنك نخيت الورع والشب والشياب =يجونك فزوع الخيل عند التراهيني
اذا ما فزعت انته وذكرك كما النجاب =يعافونك الرفقه وتلبس تهاويني
ومن لا ترجا في رفيقه تراه يعاب=يدين الغريب اقصار ولاهي مياميني
عجيب الزمن شفت الحصاني تجر ذياب =وانا ناكر اللي شفت والحال مشقيني
حذاري حذاري لا تنومس عليك غراب=تروح مابين البين لا زين لا شيني
وخلك مع اللي فالمواقف فتيل اشناب=كريم العمايل معه ربي يعافيني
ترا الناجح الفالح تٍشوّف له الأرقاب =يجيه الحكي بلسم ومثله سكاكيني
ومن لسما صاعد يحرص يجيه اشهاب=لأ ن العوالي تضد روس الخميليني
وراع الوفا يمشي على القن معه حساب=دروب المراجل واضحات العناويني
ولا ياهجوس الشعر بدعك حروف كتاب=كتاب الحياة اللي ظروفه تفانيني
على الحزن والفرحه كتبت المثل خلاب =بحرف ن من اللولو ثمين المكانيني

المشاركة الأصلية كتبت بواسطة غازي الزغيبي (المشاركة 1382557) الشاعر الكبير فواز الزويهري صح السانك وسلم بنانك وبيض الله قصيده تستحق كلمة عصما

المشاركة الأصلية كتبت بواسطة الحر الاشقر (المشاركة 1382560) الله علييييك صح لسانك يالزويهري

المشاركة الأصلية كتبت بواسطة الشاكر أبو سامي (المشاركة 1382561) صح لسانك وسلم بنانك يابو محسن وبيض الله وجهك