قلت : يا ناصر عليثة كيف ذاك الحزن غاب=رحت للدكتور والا جاه قلبك ما يريد
قال : نسَّاني زماني وأن نسيت الجرح طاب=نعمة النسيان عندي هي دوا الراس العنيد
قلت : عز الله غدينا بين ضرس وبين ناب=بين ضرسٍ من رحاه وبين نابٍ من حديد
كل ما هيئت نفسي للجديد من الثياب=واستمال القلب ثوبٍ تو فصلته جديد
استعاد الفكر شمعة أنطفت مثل السراب=وحارب النسيان ذكرى مؤلمة في يوم عيد
قال : رجَّال المواقف لا نصاها ما يهاب=والأماني يا محمد ما تجيب اللي بعيد
كمْ راح وكمْ جاء وكمْ ودا وكمْ جاب=كم في الدنيا نزول وكم في الدنيا شديد
قلت : ما أنكرها حقيقة وكل شيءٍ في كتاب=ولا أنكر أني أتعوض لا انقطع حبل الوريد
لكن اللي انحرم نسيان مرفوع الجناب=انحرم من نعمةٍ يحتاجها العقل الرشيد
وبعد إذن استاذ ناصر يا شياب ويا شباب=اسمعوا مني نتيجه جات بالعلم الاكيد
اتفقنا في النهاية بعد صفينا الحساب=ما لقي مني افادة ولا لقيت اللي يفيد
وانا ما احمل صحيبي لا ملامة ولا عتاب=ولا نصيته استشيره لوْ ما رايه سديد
لكن أنا ودي أسأل ما أطالب بالجواب=أسأل اللي ما تنعَّم طيلة العمر المديد
من يرد القلب ليه لا انكسر في الصدر طاب=انكسر من فعل قاسي كل ما يكبر يزيد
كان ما الله احتواني ذاك حلال الصعاب=وبدل العصر الأسية لي بالعصر المجيد