على أوراق الشقى اكتب قصايـد=اعبر عن عنـا فالنفـس سايـد
ليال اليـأس والحرمـان حلـت=في دنيايه وانـا شفـت النكايـد
أنا اللي عشت في حلم(ن) تلاشى=حسافة صارت أحلامـي بعايـد
ندمت ولا تحقـق لـي مـرادي=وذابـت فرحتـي والبعـد كايـد
مشاعر صادقـة محد(ن)فهمهـا=تضيع اتوه فـي ليـل الشدايـد
ابنشد خضـر ياليتـه يساعـد=مولع فالهـوى شـاف المكايـد
يقاسي لاعـج الفرقـا ويصبـر=عساه ومنيتـه يجنـي الفوايـد
نصيت الشاعر اللـي ماخذلنـي=بدع فالقاف هـو للشعـر رايـد
يقول الشعـر وابياتـه رفيعـة=قريناها علـى بيـض الجرايـد
بشوره ليتنـي اعـرف دليلـي=وتطفي نار فـي قلبـي وقايـد
لاتبخل ياخضر بالـراي عطنـي=مشورة ضمنها القـى السعايـد
أنا قلبي مضى له وقت هايـد=جروحه توها تحت الضمايـد
واحاول ترك كل اللـي يثيـره=عن الخفرات ممشايه محايـد
لكن اليوم انا وضعـي تغيـر=عنا قلبي وهمـه جـاه عايـد
سبب من خصني بأبيات شعره=شرح وضعه بزينات النشايـد
يقول إنه تعثـر فـي طريقـه=طفى نور الأمل والهـم زايـد
طلبت الراي يامحمـد واقولـه=ترى طرد المقفي بـه نقايـد
من يوم الحب صارت به برودة=تبعد دام صبـرك لـه شرايـد
عسى ربك عن الجافي يعوضك=ترى الزينات مع كـل البدايـد
واذا كان الخطا من ناس غيره=تركد واسلك دروب(ن) جدايـد
وخب السر ليـن إنـك تأكـد=من اللي حط في دروبك رصايد
وتصيد فرصتك وابذل جهودك=وتوجه بالرجال أهل العوايـد
عسى تسعد بدنيـاك وإتهنـا=مع اللي بالفـلا للريـم قايـد

مافي الجزيرة غير نشرات الأخبـار=يضيق صدراللي يتابـع خبرهـا .
صارت بلاد العُـرب للمعتـدي دار=دنَس مساجدها وشتـت أسرهـا .
والعالم المخذول فالوضـع محتـار=يشهد جرايمهم وينقـل صورهـا .
تكالبت من حولهـم كـل الأقطـار=كل(ن) يجرب خنجره في نحرهـا .
لعبوا علينـا لعبـة القـط والفـار=غنيمة(ن) صرنا فتالـي دهرهـا .
القدس ينخى وينهم وين الأ حـرار=سبعين عام(ن) يشتكي من قهرها .
أسرى وتحت القيد من دون الأسوار=جريمة(ن) كبرى ومحدن نكرهـا .
واليوم في بغداد شبـوا لهـم نـار=بغداد ضاعت واستحلـوا نهرهـا .
شفنا ضحاياهم تحت سقف منهـار=والقاذفة ترمـي لهايـب شررهـا .
ما ذنب طفل(ن) مات ماشاف الأنوار=رصاصة المجرم فصـدره أثرهـا .
وما ذنـب شايـب يتعثـر تعثـار=واجه مصايبها وصـادف قدرهـا .
أرواحهم تنزف تحت سـن منشـار=وجروحهم مستفحلة في خطرهـا .
الى متى واحنـا ذليليـن واصغـار=ماغيـر حيلتنـا نحلـل خبرهـا .

جتني رسايلهم معاني لهـا ذوق=فيها الوفا مرسوم والطيب يبقـى
كل(ن) يهني من معزه ومن شوق=أفراحهم في ليل الأعيـاد ترقـى
واجب عليَ الرد لو كنت مسبوق=أبدع لهم من روض الأشعار طرقا
يامرحبا ترحيب والمنزله فـوق=ولاجابها الله بين الأحباب فرقـا
واوزع البسمة على كل مخلـوق=عسى لياليهـم بلأفـراح شرقـا

عـذب المثايـل سطرتهـا يدينـي=وأهديتهـا للـي فعولـه تثمـن .
قريت قافـه واشهـد إنـه رزينـي=ماخالط الأنذال ماصاحب أرعـن .
قاسى من الأيام عسـر(ن) ولينـي=واستوعب الدنيـا وفيهـا تمـرن
شبل الأسود اللي يـذود العرينـي=لمست فيه الطيب من طيب معدن .
ومديت له كل الوفـا مـن يمينـي=مخصوص للبشري ومني بلا من .
ياخذ وفا مـن صافيـات المعينـي=واقطف له الجزلات من عالي الفن .
عسى له الأيـام تصفـى وتزينـي=وجروحه اللي فالمعاليـق يبـرن .
دنيـا اتقلـب ماتغـر الفطيـنـي=اللي فصفحـات الليالـي تمعـن .
واللي انكتب فاللوح فوق الجبينـي=يشوفـه الإنسـان قبـل يتكفـن .
خسران من غره بليـس اللعينـي=يطرد ورا الدنيا كما تيس أقـرن .
ومايفهم المغزى سوى العارفينـي=اللي لهم فالعرف ساس(ن) ومركن

اطرق دروب المراجل والوفا مدي= البيت منصـوب والأطنـاب منشده
في مجلس الحق ابسط للعرب يدي=البــاب مفتــوح للضيفان مــا رده
امسك وصايا وصايا جات من جدي= وآنا كريمٍ وقف شــــامخ على حده
امنح صديقي معزه صاغها ودي=وعند المواقف تراني موقفي عنده
وشبه عليَه صديقي رد لي وردي=شفت التجاهل وشفت الصد في رده
اقفر علومي واقايسها ولا ابدي=وآســـوق له قول قبل الدرب لاسده
آنا زبيدي ولاني مثل ابو سندي=ممشاي وآضح بوسط اللين والشده
بالبندق اللي معمرها على زندي=وكلٍ من الطيب ياخذ وزعته قده
سبت جفاكم احس النار في كبدي= والقلب يـرسل عتابه والسبب وده

الوفي طبعا ! إذا غاب انفقد = والوفي كل الأراضي تفقده .
وينه اللي وقفته وقفة أسد = مآ اشوفه في روائع مشهده .
آتنشد مآ يخيب اللي نشد = والفخر بعض العرب في منشده .
رآعي الوقفات مآ مثله أحد = من معزه أدعي الله يسعده .
شدني بالطيب والطيبة تشد = هوصديقي هو بعينه أقصده .
مآ هو آنا اللي فمده يقتصد = من يمد الطيب ربي يسعده .
في دروب الخير أسعى واجتهد = وانحني للطيب كلي واسنده .
صاحبي لا جاك علمه استند = والعقد تنحل فمثاني يده.
صاحبي والله مآ له غير ود = مختلط بالدم وسط الأورده .
والا فكري مآ الومه لو شِرد = مآ لقيت اللي فدربه انشده .
وعين ما تفقد عساها بالرمد = من عماها ماتشوف الأعمده !

عيـا البلوتـو يوريـنـي =حقايق الوصف والعنـوان .
لو كان شيبـي مغطينـي =هذا الزمن ماتـرك إنسـان .
جتنـي الخواطـر تبارينـي=ماعاد يلحق ابـو شيطـان .
شفتـه فدربـي مخاوينـي =عند البقالة علـى البيبـان .
طش الحيا طاح من عيني =عرى الجسد والمخبا بـان .
كذبـت فالأولـه عيـنـي =والا الطفل من شهود أعيان .
سألـت ياموتـري وينـي =ماقلتلـك بشتـري دخـان ؟

يقولها الحربـي ويفخـر ويعتـز=حلو المعاني صاغها من مجازه .
له ساس مبني ثابت(ن) ماتهزهز=ومن ذروة العز يستمد اعتـزازه .
ماهـز قلبـه لابسـات المطـرز=ولاهان نفسه يوم من شان عازه.
لاشفت راع الطيب فزيت لـه فـز=أعطيه من قطفات الأفكار طازه .
رزيت راياتي علـى هامـة العـز=ومن يطلب الطوله يجهز جهازه .
وين الشباب اللي للأوطان مفـرز=هم للوطن عدة وهـم ارتكـازه .
أشوف منهم يرتدي ضيق الجنـز=وعلق على صدره صليب وقزازه .
ماهمه إلا السـوق فيـه يتـرزز=فيه الميوعه باينـه والطنـازه .
لو تنصحـه مايستمـع مايركـز=ولو ترفعه يسقط سقوط الجنازه .
ماحقه إلاتربطـه مربـط العنـز=عساه بعد الذل يرفـع طـرازه .

شفت من نظراتها كيـف العـذاب=يدفـن الأحـلام أحـلام الصغـار
وقست من نظراتها حجم المصاب=في عيون(ن) ضيعت حتى المسار
دمع طفلة انتثـر فـوق التـراب=يحكي قصة صامدة رغم الحصـار
للأسف طفلة ضناهـا الاكتيئـاب=واقفة تشهـد علـى ذاك الدمـار
عينها تسأل وتبحث عـن جـواب=ننطرد واحنا من أصحاب الديـار
في سمانا مانشـوف إلا الضبـاب=اختفت الشمـس والدنيـا نهـار
بين ترويع(ن) وظلم(ن) واغتصاب=وبين خوف وبين حرب وبين نار
شابت الطفلة قبل وقـت الشبـاب=تنتظر قـرب الفـرج والانتصـار

المعانـي جاتنـي مستـرسـلات=شاعر(ن) عذب المناهـل منهلـه
طيـب(ن) ماآخـذ ألأَ طيـبـات=وإن عطيت أعطي من الشي اجزله
خطوتي ماحطهـا ألاَ فـي ثبـات=وإن تخيرنـا خذيـنـا افضـلـه
مشكلاتي مـن كبـار المشكـلات=اصبحت وسط الحشـا مستفحلـه
استغل الطيب معسـول الشفـات=واستحـل القلـب فجـأه بأكملـه
شفتهـا قدامـي المتناقـضـات=وش اسوي فيـه ماأقـدر أعذلـه
في عيونه لفنـي مثـل العبـات=الحـذر مافادنـي مــن أولــه
هي سنه واللي بعدهـا ممحـلات=المهـم اشغـل فـوادي وأشعلـه
اتقلـب مثـل ذيـب(ن) مايبـات=من سقم ماجاه سقمـه مفصلـه
قلت له مادامهـا عالقلـب جـات=أتـلا عـرق(ن) ابيدينـك اقتلـه
وخلني أرتاح واللي فـات مـات=فضهـا سيـره وفـك المشكلـه
ماأشوف إلاَ سطور(ن) مبهمـات=ماتفـيـد ولا تـحـل الأسئـلـه

ياسحابـة استهلـت وامـطـرت=والروابي عقبهـا صـارت ربيـع
يامشاعـر صادقـات(ن) سطـرت=أجمل اللحظات في صدري تشيـع
عبَـرت عمـا تحسـه عـبَـرت=من بحور الشعر آخـذ ماستطيـع
ياغصون(ن)استنامـت وازهـرت=لاستما لت ريحها الفاتـن يذيـع
نظـرة العطشـان لاماقـصـرت=ارتوت من صنع سبحـان البديـع
اوصف اللي دنيتـي بـه انـورت=اتغزل فيـه مـن بيـن الجميـع
المحاسـن فيـه فيـه اتبلـورت=وابرزت زول(ن) له الوصف الرفيع
والليالـي شفتهـا لـو كشـرت=تبتسم لو جورهـا جور(ن)شنيـع
ولو على اللي صار بدري خبـرت=انتظر لو كان في مهـده رضيـع

ألآ يالله لـك طاعـه سجـدنـا=عليك ولا على غيرك عمدنـا .
تعجـل بالفـرج يالله عليـنـا=شكينا لك هزايمنـا وكمدنـا .
تحرر قدسنا من يـد غاصـب=غرز نابه بقسوه في جسدنـا .
تمـرَد وانتهـز لحظـة وهنَـا=تمادى يوم أيقـن مااتحدنـا .
يمرر كذبته فـي شـرع غابـه=وحنا عن بلانا مـن نشدنـا ؟.
نصيح وننتخي والحق ضايـع=حقيقه عن ركاب الحق حدنا ! .
قلاع المجد سقطت في يديهـم=نلوم انفوسنا عنهـا رقدنـا .
ونذرف دمعنا حسـره عليهـا=خطانا قاصرات(ن) من جهدنا .
فـلا والله ماهـانـت عليـنـا=نشوف الدم ينزف من ولدنـا .
عساها بعـد دورات المصايـب=يحقق ربنـا باللـي وعدنـا .

الكون كلـه صـار قريـة صغيـره=العلـم يتقـدم فـكـل المـجـالات
وإحنـا ولازلنـا فذيـل القطـيـره=ماكننـا قدنـا جميـع الحضـارات
الغرب ينهل من بحـور(ن) غزيـره=وإحنا بـلا تفكيـر نمشـي ولاذات
متمسكيـن(ن) بالحبـال القصيـره=البايدة اللـي عليهـا الدهـر مـات
والبطـن ماتمـلاه قطعـت فطيـره=أرواحنا خاسـت فوسـط الملـذات
في عالـم الجـوال نقلـة خطيـره=التقنية صارت رسالـة وشاشـات
مستخدمينـه فالأمـور الحقـيـره=كشف وتعري واصطيـاد العفيفـات
اشوف ربع(ن) كنهم فـي حظيـره=تمارس المحذور حتى على الشـات
تلفـاز بالريمـوت صرنـا نديـره=على الهوى يعرض مشاهد رخيصات
ياهل ترى نمشي فركـب المسيـره=نصحى ولانتبع طريـق الدعايـات
وكل واحد(ن) منا يحاسب ضميـره=ونعيش ونعوض جميع الذي فـات

أنسج الأحلام مـن خيـط الأمـل=واصور اشواقي واعبر عن عناي .
حبي المجهـول تـوه مـا كتمـل=قلبـي يتألـم وتتعثـر خطـاي .
حيرتـي تـزداد وأدرى واحتمـل=في ليال البعـد اتجـرع اسـاي .
واتجـاوز عثرتـي مثـل الجمـل=واطلب الله لايخيب لـي رجـاي .
واخفي الشكوى ودمعي المنهمـل=واكتم اسراري واحزاني معـاي .
ارسم الذكرى على كفـوف الرمـل=واسأل الأيـام تمنحنـي هنـاي .
مع رفيـق العمـر يلتـم الشمـل=ولوعة الأحـزان ارميهـا وراي .

منولٍ قالوا شموعٍ تحترق = تحترق وتنير للناس الطريق
المعلم . . لالمحنا نفترق = هيبة الاستاذ الرجل الأنيق
الحديد الصلب عند ينطرق = ولو قسى له قلب احساسه رقيق
رجل وآعي ما تملل إن عِرق = وإن بدى له صدر وآسع ما يضيق
من خطوطه نستشف ونسترق = ومن دروسه خامل الهمه يفيق
شفت شخصٍ مثل سهمٍ يخترق = مع خيار الناس مقداره يليق
وشفت رآعي طيب من شاني يرق = وشفت رآعي رآي ولسانٍ طليق
وشفت قدرٍ صعب يومه ينسرق = وشفت نبلٍ ايتنآصع له بريق
آتذكر . . وآتذكر . .واحترق = وشمع ذكرني بمعناه العميق

قصرٍ تباهى بين فن وفخامه = صار يتمناها على الأرض وطيتك .
ما دري ؟ وش اللي حببه فالوسامه = وما ينفتح له باب إلا بطلتك !
شاعر تغنى يوم شاف احترامه = وشاف الذي سرَه وقدَر مكانتك.
شاف التواضع يوم يرخي لثامه= والنفس من صادق هواها تمنتك .
تمازجت كل المعاني فكلامه = حلو المشاعر من صناديقها جتك.
ودٍ تنامى في مطارح مقامه = خالي من العذروب والطيش والهتك .
إعجاب ساسه من بواعث غرامه = يوم يتوصف في حقايق علاقتك .
حلمه تعلق في رموش الزعامه = وشاف الزعامه طارفه في معيتك .
شاعرتغنى في رفيف ابتسامه = واعطاك من وصفه على قد غايتك .
ارسل مع الجوال خالص سلامه= شاف السحابه وافتكرها سحابتك .

تعزف على أوتـار المحبـة مواويـل=تعبر عن الإحساس تذكـر هواهـا .
تذرف دموع العيـن مثـل الهماليـل=وتسأل تناجي دمعها مـن عناهـا .
تكتب على أوراق التفـاؤل مراسيـل=روح الأمل مازال حـي(ن) معاهـا .
موقف جذبني هز الإحساس بالحيل=في نفسها تخفـي وتكمـن بلآهـا .
سألتهـا ردت همـوم وغرابـيـل=وجروح تنزف مستحيلـة شفاهـا .
قلت اسمحي لي اشرحي لي بتفصيل=وضعك يهز النفـس يشعـل جواهـا
قالت أحب وللهوى أشعلـت قنديـل=والروح تنسـج حلمهـا واهناهـا .
واليوم حلمي صار أبعد من سهيـل=وروحي من اسهوم المحبة رماهـا .
فجأة نسى حبي وقطـع المواصيـل=عشـرة نهايتهـا حبيبـي نساهـا .
فالحب عطتني صادقـات التماثيـل =اخلاصهـا زايـد ونــادر وفـاهـا

ثورة غضب هزت موازين الأثقـال=واسبابها تشويـه مفهـوم قصـده
اسهومهم في أطهر الخلـق تنهـال=جرم(ن) شنيع ومهزلـه مستجـده
ماهو خطا يمحـاه تبريـر ينقـال=ولاهو خطـا مخمـور تهتـز يـده
الحقـد متأصـل قديـم(ن) ولازال=لو أبرمـوا معنـا عهـود المـوده
الخنجر المسمـوم مسعـاه يغتـال=روح العقيدة مـن مخـازي مـرده
وصار الأذى يحس به كل من قـال=آديـن بالأسـلام لاديـن بـعـده
من ضعفنا جونا على كـل مدخـال=وحنـا رضينـاه حيـاة المـخـده
يالله عسى عز(ن) مشرف للاجيـال=ونصر(ن)فحرب(ن) زادت اليوم حِده
دعوات مسلم هل دمعه على الحـال=مسلـم رفـع د عـواه لله وحـده

رحبت باللي يستحـق التراحيـب =الشاعر اللي شاقني طِيـب نظمـه
ينثـر قوافيهـا بوزنـه وترتيـب =عزمه قوي وعالوفا شـد عزمـه
غازي على ماقلت فالملعبـه ذيـب =شاعر يسـدد فالمياديـن سهمـه
طرشت له مرسال وآمد له طيـب =ياصل على ماقلت فالحال باسمـه
راحت ملازيم الرجاجيـل تجنيـب =من جيل خاوي يشتكي لين عظمه
ماعاد لا يفقـد ولا ينقـد العيـب =ماجاب لي دعوى ولا جاب خصمه
تقصرخطاهم عن كبار المواجيـب =لا تنخدع به لـو تكابـر فحجمـه
حاولت معهم وبجميـع الأساليـب =آحفـز الهـزلان ياخـذ بقسمـه
أعطيهم التوجيـه قـولٍ وتدريـب =مير البلى المغرود مرفوع خشمـه
مالي عليهم ياالزغيبـي مطاليـب =والعقل يستوعب على قـد فهمـه
بالنصح يالشاعر ومن حالي الشيب =عطهم دروس وكـل درسٍ برقمـه
وأنته من اللي جرَب الوقت تجريب =خذيت من لينـه وجربـت حزمه