يالله يامعبود حقق رجانا=ماغيرك اللي كلنا نلتجيله
يارب ترحمنا وتغفر خطانا=وتجعل لنا من باب عفوك وسيله
يالله تحسن بالفقيده عزانا=وترحم فقيدة حرب سيف القبيله
مصيبة ٍ حلــّـت ونعلن رضانا=أمر القضى لاحل مافيه حيله
يالله تصبـّـرنا على مبتلانا=ماحي ٍ إلا فيه يوم لرحيله
أقشر خبر جانا وفيه إفتجانا=شاع الخبر بين الخلايق بليله
من عقب نجم الشعر خلاّ سمانا=قبل الممات ومرقبه بالطويله
مات الذي في موقفه ما توانا=صيــّاف نطــّـاح الحمول الثقيله
سبع ٍ ليا شمــّــه خصيم ٍ تدانا=إن لامس الصوّان خشم الفتيله
في كل محفل رافع ٍ مستوانا=صيــّاف ما كل ٍ يحصــّل حصيله
كم شرّف إسمه حرب في مهرجانا=قبيلته في وقفته تنتمي له
لاصار همــّال السماء جبـّخانا=لوا عذاب الخصم واعزّتيله
يطعن بسيف وزرقته بالســّـنانا=بالفتل وإلا النــّـقض يبحل قبيله
يارب يامنـــّان يامستعانا=تجاوز بعفوك عنه كل ميـْـلـِه
نطلبك ياغفـّار تقبل دعانا=وبجنـــّة الفردوس تجعل نزيله
تجعل له بجنـــّـتك باب ومكانا=عسى مقرّه بالجنان الظـّليله
لو كان من فرقاه عشنا حزانا=نجم ٍ علا كل الكواكب بجيله
يالله عسانا لاذكرنا عسانا=ندعي له الله يرحمه ويعفي له
الشعر تال الوقت عانا وعانا=واليوم فاقد من قداته دليله
وختامها صلـّـوا على مصطفانا=اللي نشر دين الهدى والفضيله