اشره وانا ما تهمني شرهتك لا منك شرهت = بلاك تعرف حقك وتجهل حقوق الاخرين
انا ترى حبيت ابا اعرفك كانك ما عرفت = ان اليسار الهم يسار ان اليمين الهم يمين
راجع حساباتك وتلقاني اليا منك نظفت = اطالعك بعيوني الثنتين ماهو نص عين
العام كنت اجاملك واليوم لا والله حلفت = لطلق سراح اللي مضى ثلثين من عمره سجين
مادام ماتقدر مواقيفي اليا مني وقفت = والله ما تشرب قراح الماء وحنا حاضرين
لو قلت لي تكفى وكثرت الترجي واعترفت = من لا يزين بطيب لا منا قسينا لو يزين
اومنت بان الراسيات تزول وإلا الزفت زفت = والحنظله تبقى مرارتها على طول السنين
لو انها شربت من المويا القراح اللي غرفت = ما قدرت حلاوة المويا ولا مد اليدين
واليوم بعد اني سعيت بعالم العالم وطفت = اومنت ما يوجد رياض إلا رياض الصالحين
وحذفت مدري وش حذفت وضفت مدري ويش ضفت = بس الوكاد اني حفظت اللي لهم رفقه ودين