ملتقى قبيلة حرب الرسمي - الألفيــــــــــــــــــــــه .....................

الألف ألا يالله باسمك بدينا=ياللي بيدك الأمر ما هو بيدينا
يا خالقاً عبدك بنطفه وطينا=سبحانك اللهم رب السماوات
والبا بنيت القاف من فكر راهي =وصبيت له فنجان دله و شاهي
وآنا على قيفاني آمر و ناهي= و أختار من حر المعان الجزيلات
والتاء تلّ القلب راع اللثامي=اللي حوى فالزين مغرب و شامي
ما له شبيه و ند بين الأسامي= لو بأوصفه ما ظنّ وفتّه الأبيات
والثاء ثمان و عشر بالضبط سنه=وان ما نقصها شوي ما زاد سنه
تضحكلك الدنيا ليا بان سنه= و تفز بك كل الضلوع الحنيات
والجيم جلاّ من مسوّيه جلاّ=فالزين ما بقّى ولا ظنّ خلاّ
كامل وصوف وكامل الوجه لله=آيه فزينه قيل للزين آيات
والحاء حور عينه مزوّد حلاته=لا لدّها الخاشع يضيّع صلاته
سهم المنايا في طرف ناعساته= الله حسيبك يالعيون الكحيلات
والخا ختم قلبي بودّه وقفّا=وآنا بعده أصفق على الكف كفا
لدّيت واني واقفا بين صفا=ختمه عليهم واضحا له علامات
والدال داء الحب ما فيه حيله=واللي تشّقى فيه روحه عليله
ياكل و يشرب هم صبحه و ليله= يسهر قليبه لو غفا طرفه و بات
والذال ذلّ الحب ناساً عزيزه=حكمه حرام و كل شيٍ يجيزه
ما له بلد ما له اقامه و فيزه= فالشرق كم يتّم و فالغرب كم مات
والراء رسول الحب ما له ملامه=نظره بليّا قصد و أحيان شامه
تاخذك من شط البحر لا غمامه= و تعوم بك وسط البحور الغزيرات
والزين زاد العاشقين السمومي=و شرابهم طول العنا والهمومي
اِفطارهم يومين و شهور صومي= لأفراحهم ساعه و للحزن ساعات
والسين سار القاف عكس الطلب سار=أبغيه يتيامن و أثرْه آخذ يسار
سيّره قلب أخضر كما خضر الأشجار= و قلب الشقي دايم دروبه ملفات
والشين شفت بدنيتي ما كفاني=يارب منك العون في كل شاني
العشر صارت سبع مدري ثماني= والأوله صارت توال الأخيرات
والصاد صارن الغنم تطرد الذيب=و أهل البلد صاروا فحكم الأجانيب
حتى الغراب اِحتلّ روس المراقيب= سبحان منهو بدّل الذيب بالشات
والضاد ضبع القوم سوّوه سيّد=ما له معارض كلهم له مؤيّد
واليوم فوق سباع ربعه تسيّد= ما هو بفعل الضبع فعل الجنيهات
والطاء طيور العش نافت صقوره=والصقر حوّل من منيفات كوره
تبدّلت والوقت دوره و دوره= وقتٍ عوج لو يعتل فيه ميلات
والظاه ظهر فالتال عجب و عجايب=ما به غرايب ذا زمان الغرايب
ما عاد تفرق بين شباً وشايب= ولا عاد تفرق كانها راحت أو جات
والعين عنيّت القوافي و عنّت=و بحروفها كل الطواريق غنّت
اليوم فرس اِيران للحرب شنّت= واحنا نجادل فالأمور الصغيرات
والغين غزو الفكر ولّى زمانه=أثمر و أشوف اِنتاجهم في مكانه
همّ الشباب اليوم مضغ اللبانه= و همّ العدو تحريف خير الديانات
والفاء فلا ترجون حكم و سياده=ما ساد منهو مرتكيله وساده
والحلو بكره ينشرب مر ساده= والضحك بكره ينقلب ذرف عبرات
والقاف قافينا علوماً هوايل=علماً يبيّن كِدشها و الأصايل
أمّا نعيش بعز والراس طايل= وألّا نوردّها لحوض المنيات
والكاف كافي يا عربنا هزايم=يا ناصبين العُقْل فوق العمايم
ما عاد نبغاها فعارض و قايم= نبغى الهدف يشبك فوسط الثمنيات
واللام ليت اللي يتسمع و يوحي=يقرا ما بين سطور صمتي و بوحي
يا روح ما بعدك ترى اليوم روحي= الوالي الله رب الأحيا والأموات
والميم مدري وش تكفّي حروفي=و هموم الأمّه عدّها بالألوفي
يارب في حالة عبادك تروفي= يارب لا تفرح بهم كل شمّات
والنون نبقى تحت حكم السعودي=في ظل أبو متعب زعيم الفهودي
دون الوطن و الدين مثل الأسودي= إلّا الوطن و الدين مابه خيارات
والهاء هذي بعض من كل مابي=والله يلهمنا دروب الصوابي
قال المثل للعلم باب و جوابي= والعذر منكم و السموحه فما فات
والواو والله ما تطيب التعابير=إلّا بذكر مدبّر الكون تدبير
اللي عليم بخافيات الأسارير= الواحد الفرد الصمد رب الأمّات
والياء يامن وحّد الله و أطاعه=صلّي على المختار راع الشفاعه
صلّي عليه فكل لحظه و ساعه=عليه من ربي زكيّ الصلوات

وسلامتكم