ملتقى قبيلة حرب الرسمي - ( انكان يابن عبيد صوتك يعيبك=معذور مايحتاج تضغط على رد ) .... مساجله

/
/
/
/
/
/
/
/
/
/
/
/
/
/
/

اخواني الكرام
اقدم لكم هذه المساجله
مع الشاعر القدير / نايف الحبلاني ( شاعر الحدث )

ومناسبة هذه المساجله ان ابو ساري حسب ماوصلني منه
انه اتصل علي عدة مرات على الجوال ولم يجد رد
مع العلم بأن ابو ساري يعلم اكثر من غيره
بأني لااستخدم الجوال ولا احمله معي في كثير من الاحيان
وخاصه فالسنتين الاخيره
ولكن ابو ساري من الشعراء الكبار الذين يصنعون من كل حدث اما مساجله او محاوره
وقام بإرسال القصيده لي برساله خاصه قبل عدة ايام
وانا اعتذر له امام الجميع
واقوله انت غالي وعزيز يابو ساري
وان لم تجد رد سير علي ترى حنا جيران

/
/

بدع الشاعر القدير / نايف الحبلاني

ان كان يابن عبيد صوتك يعيبك=معذور مايحتاج تضغط على ( رد )
خل الجهاز يدق في وسط جيبك=والا احذف اسمي ماحصل من جفا سد
خابرك طيب معجب الناس طيبك=ماله حدود ان كان له بالعرب حد
درع العلوم الغانمه من نصيبك=والطيب فيكم منبعه واب عن جد
لاني ولد عمّك ولاني نسيبك=غير الصداقه بيننا والوفا سد
لكن دورات الليالي تجيبك=بكره تجيبك كاش ليّه بلا عد
حافظ على المعروف وانهي مغيبك=رجال تعرف والصداقه لها ضد
خسران مادام ابو ساري طليبك=والموت لاصار المطالب على صد
ماعاد فيها غيبتك ماتثيبك=اليا متى ندمح خطاياك ؟؟ من جد
اما تحمّل مايجي من صحيبك= والاّ لاشفت اسمه على هاتفك رد

/
/
/
/

رد الشاعر / خالد بن عبيد بن معتوق ألأحمدي

صوتي جهور اليا سمعته يهيبك=والعيب لو مثلك يجي منّه النقد
ياصاحبي قامت ظنونك تخيبك=وابليس لايزرع بك الغل والحقد
مادام لك صاحب بطيبك ضريبك=غلاك ماله حد والله يشهد
ولك عزوةٍ من حقّها تعتزيبك=عون الضعيف اللي به الضيم يشتد
والناس تارد معرفه من قليبك=وبالطيب في مجلس هل الطيب تنعد
لنته نسيب ٍ لي ولاني قريبك=بيني وبينك صدق خوه على عهد
وجات المطمّه منك ربي حسيبك=تمسي معي صاحب وتصبح معي ند
ليتك يابو ساري تدع مايريبك=وخلّك حسين الظن بالوقت تسعد
ومن قبل تصدر حكم راقب رقيبك=وما غاب عنك اليوم تلقاه بالغد
وان كان ذيك الوسوسه ماتسيبك=جسر الموده بين الاصحاب ينهد