الزين يا " بنـدر " تبلآني اليوم =وانا احسب اني قبل ماني كذيّا
ولا كنت احسب اني مع الوقت محروم =الا بعد ماشوفها لي تهيّا
اللي تخطى كنها باشة الروم =ماله مقارن بالعذارا وزيّا
عنق وخد ورمش والساق مبروم =والخصر ناحل والبلاوي خفيّا
والردف نابي لامشت ضاعت علوم =يرتج لين انه كواني بكيّا
مذهول مما شفت واصبحت منجوم =ماعاد لي حيله ولا في يديّا
فيها الدلع والغنج والصدر مزموم =انشهد انه طاوي الحال طويّا
استغفر الله جسمها كنّ مرسوم =فيها الحلا الطاغي وزين المحيّا
ملاك ربآني سحر كل زيزوم =تمشي دلع ياحيّ ذيك البنيّا
من شافها يحرم على عينه النوم =.يسهر وفكره حول نجم الثريّا
ولا شافها المهموم ماصار مهموم =تجلي همومه مثل ماصار ليّا
وانشهد اني من هوى الزين ملزوم =وابري حالي منه ياخوك بريّا
اثر الهوى غلاب والحظ مكعوم =راحت ولا غادرت منها بشيّا
بس التوجد صار لي امر مقسوم =عليه يجيني ويروي الحال رويّا
هذي علومي كان تنشد عن علوم =حظي نخيته مير مابه حميّا