ياليل ... همي ما تنقى من الناس = كود النفوس اللي عناها حبسها
ونفوسنا صارت تحت ضربة الفاس = هم البشر ضيّق عليها نفسها
حوّل سعادتنا شقا والصبر ياس = وحظوظنا زود عليها نحسها
حوّل ذهب عمر المعنـّا إلى نحاس = وأفراحنا لامن لقاها عكسها
وصدورنا ضاقت عليهنّ الأنفاس = وشموسنا عم الظلام وطمسها
همي بحر دايم به الناس غطاس = ونفوسنا في غبته قد غمسها
لامن شكينا يضرب الفاس بالراس = نسكت وهم قلوبنا قد حمسها
دايم علينا همنا مسلـّط الباس = له جلسةٍ لامن جلسها جلسها
نصبر ونصبر لكن أتعاسنا أتعاس = ونفوسنا عيا يتسهّل تعسها
دايم ليالينا سكونً بلا نعاس = شفها ليالينا تمادى بخرسها
نلبس من هموم الليالي لنا لباس = والله يعين اللي همومه لبسها
والهم بعد القمة يزعزع الساس = بصدرونا أخطارً يدوي جرسها
نصبر لو إنا قد شربنا من الكاس = همومً يضيّق علينا عمسها
تاتي همومً ما هقينا لها قياس = وهمومنا فينا تضاعف هوسها
عمر السعد ما شابه لحالة عماس = خضر الشجر لا ما يشابه يبسها
جمع الحصى ما شابه لجمع الألماس = نفع الشجر للي بيدينه غرسها
هذا ملخـّص حالةٍ بين الأقواس = ( حال النفوس اللي عناها حبسها )