احلى الرسايل في سما نآظري دوم = اللي حلاوة خاطري في صورها
واغلا المودة ما انغسل ثوبها يوم = نظيف عيني تحرسه في سهرها
وتسلمه قلبي على حزة النوم = وقلبي ضلوعه بالحراسه امرها
واعز ماعندي من الناس فالقوم = اللي كسور الود قام واجبرها
والصاحب أعزه ولا شفته اقوم = اللي اليا بانت عيوبي سترها
وانخى نشاما ما احسب حساب لرخوم = واهل الردى ما اجلس بشاطي بحرها
واقدر الخوة ولا ارخص لها السوم = والناس لا ابخصها ولا ارضى احتقرها
ولاحدنٍ من الزلات سالم ومعصوم = واللي يعالج جرحها يختصرها