ياعلي ماتنزل دموعي رخامه=من خوف لاتفرح علي الهباليس
صبور .. معها نوع عز وقرامه=لوتنعمي عيني من الضيم وتخيس
هذي دموع فراق ماهي ملامه=تنزل لو إنك ياعلي داحر إبليس
تبكي فراق اللي من الناس هامه=ميزان حرب وفيه نكتال ونقيس
رباح كان لحرب مثل العلامه=هو ضلعها ياعلي بين التضاريس
هو الكرم هو السخا والشهامه=الضيف لو هو ورع يرخي له الكيس
كلمة هلا بالضيف تسبق سلامه=يضحك ولو يونس بنفسه حواسيس
ولا منها عجت تحيزم حزامه=يوم ان غيره طار مثل القراطيس
غيره يدس الراس مثل النعامه=لكن رباح يهد عرض القرانيس
ياحرب ماالومك وحزنك عمامه=نكستي الاعلام ياحرب تنكيس
رباح عن واحد وتسعين قامه=صيته تعدى حرب راع النواميس
من حد جده غرب لأقصى المنامه=ومن دولة الاشراف لديار بلقيس
لعل دار الخلد مثوى عظامه=والله يجبر كسركم يا الطعاميس

اشكر الجميع ع المرور العطر