ياربنا ياقوي الحيل = تلطف بنا مابقي قدام
تجيرنا من عذاب الويل = وتجعل لنا فالسعادة ختام

سكة سفر بيننا صارت = وبعاد صاروا على الانظار
اشواق في قلبنا ثارت = والشوق يحوج على الاسفار

الفرق بين الأمل واليأس = شتان لو كنت ماتدري
الأولة فيها قوة وبأس = والثانية إحباط من بدري

في كل قعدة لنا ونهوض = مايغيب عن بالنا إسمك
لك ود في داخلي محفوظ = والعين ماتشوف غير رسمك

سلمتك القلب في يدك = وعيون ماتشوف إلا بك
ياللأسف إتضح صدك = من بعد ماصار كله لك

من علمك تجفي احبابك = وتسير قاسي بنا فالصد
ياكم وقفنا على بابك = احلم في طلة لكم أو رد

لاحس لاصوت لاأخبار = معقول عن الحال ماتدري
لو شفت قلبي بعدك إش صار= كان جيت ياخل من بدري

كنت أحسب إنه مع الايام = تبرى الجروح اللذي فية
العمر روح بنا قدام = وجروحي بقيت كما هية

في غيبتك مر في كاسي= والنفس للزاد مناعة
يازين يكمل بك احساسي = مقدر على بُعدكم ساعة

والله ولي رفعها سبع = ماينتهي عشقي المجنون
العين بحره وقلبي نبع = والعمر كله عشانه إيهون

مهما اختلفنا أنا وياك = ماضاع لك ود في نفسي
كل المشاعر تحب رضاك = والروح تصبح بك وتمسي

على ضفاف البحر كنا = واحلى التفاصيل عشناها
تاخذ غرام الهوى منا = ومنها التعابير شفناها

مادام يشم الهوى راسي = تبقى على الطيبة دربي
هذا الوفى ثوبي ولباسي = ولباس من ساسهم حربي

مهما تنوعت فالاسلوب = ودك تراضي هوى غيرك
محال تحصل على المطلوب= ماوافق الكل تفكيرك

كنت الامل لي والاحلام = واعيش فالحلم بك واصحا
لاكن تبين مع الايام = احلامي كانت بكم شطحا

قلب المُعنى تعب وحتار= من زود ماجات فيه جروح
كل مارسا قلبنا وختار = يأتي عليه النظر ويروح

ياصاحبي خاطري قنعان = ماعاد درب الهوى نمشيه
لولا الهي بلطفه عان = لاراح قلبي ضحية فيه

سنين تعطي ولا تنضب = وبعد الوفا يهجرك ويغيب
لكل حق ياقلبنا تغضب = الجرح أكبر من إنه يطيب

لو أضمن العمر لو ساعة = ماعشت لحظة بها محروم
لاكنها أنفاس خدّاعة = تأتي فساعة قدر محتوم

عد الخُطا واحسب اللي تعد = وزود على حسبتك أضعاف
فقياس حبي لكم ماتسد = لو كان هذا الهوى بنصاف

يللي على البال وين أرضك = وحشتني موت باشوفك
لازلت غالي لنا برضك = حتى إن تباعدت بضروفك

لو كنت عالم فكل إملم = مافاد عند البشر علمك
قالوا الادب فضلوه عالعلم = مهما تعاظمت في إسمك

يومين من بعدها تقلع = ويبان إنك بهم مخدوع
لجليش ياقلب ماتقنع = من ناس فيها الوفا مصنوع

كل الهجر ذا مايكفيك = لسه الاحاسيس مالانت
إرحم متيم في حبه فيك = من بعدكم حالته شانت

مايزين لي الصفا ويطيب = إلا بقربي من أنفاسه
اخذ غرام الهوى واغيب = وصحى على عذب إحساسهِ

تعال اعيش الهنا واحياك = يانور عيني انا والضي
ولي خلقني انا وياك = ماتسوى لحظة بدونك شي

لك حق ياقلبنا تفرح = تجري على شوفة احبابك
ياكم ليالي بهم تسرح = عاشق وشوق اللقا صابك

ماطاح من قدركم عندي = ومازلت غالي علي ماتهون
اعطي لك الوعد مع عهدي = تبقى لي الروح مهما يكون

ياصحاب يلي عرفناكم = ليلة فرح صحبنا المعهود
احلف لكم مانسيناكم = يبقى الغلا إفقلبنا موجود

هذه الاجازة على الابواب = فرصة جميله بها حاضي
خليه تواصل مع الاحباب = لاتضيع فاللهو والفاضي

فاسباب جنحة اياديهم = النفس للآن مصدومه
ياقلب وش ترتجي فيهم= دام الاحاسيس معدومه

نص العمر ضاع في طيشي = فالحب واللعب والسهرات
كنت افتكر اهتني إفعيشي = اثاري نارن بها وحسرات

احزان قلبي انا المنهار = نسيتها ساعة وجودك
الليل عدى وجانا نهار = ولا زلت ضميان لهروجك

يللي تبيع الذمم بفلوس = تحلف وتقسم مقابل شي
دنياك فيها عبر ودروس = ماتدوم فيها وتبقى حي

حتى لو ابعدت منساكم = يلي صدق حبه كفاني
عمري عشانك ويفداكم = والقلب مافيه احد ثاني

لاجات عيني على عيونك = ارتحت وستانست روحي
كل الجوارح إيحبونك = يامهجتي وبلسم جروحي

بعد الوفا والصفا والود = وقلوب فالحب عمرانة
صارت حياتي بدونك جد = مرة وظلمة وخسرانة

مادام جاني صدى هالصوت = ياخل حال السعد لاقيت
كل الاسى فقلبي المكبوت = انساه ياسيد من حبيت

ياليت كل من قرى قصة = ويشوف ناتج خطا مكتوب
ياخذ من الوعظ له حصة = ويرجع لدرب التقا ويتوب

يعني على شان حبيتك = تخلق مشاكل لنا وتثير
اكبر خطا يوم داريتك = وغضيت طرفي عليك إكثير