كل منصحه زاد في ميلُه = ويقول دنيا الهوى ساعه
مايدري إن الهوى وليلُه = ضاعت بها الناس فخداعه

ناظرت برواز به صورة = فالدار بقيت لنا تذكار
امسيت والنفس مكسورة = والدمع حابس فعيني حار

في كل لحظة علينا إيهل = تصبح بنا النفس منشرحة
العين تهنى نظر بالخل = والقلب تزداد به فرحة

ظنيت لي ود في قلبك = من قبل ماتجرح شعوري
حاولت اظهر انا فقربك = ونتم تجاهلتم ظهوري

يللي في بحرالبلى طبيت = وظنيت درب الهوى سالك
تلقى ندامة ورب البيت = لاتغوص في دربها هالك

جيته امل كان في صدري = يرجع صفا حبنا الاول
لقيت قطع الحبل جذري = صدى عليه الزمن طول

في ملتقى حرب حصلنا = إخوان بالود والمعروف
مهما نعيد أو تكلمنا = ماوفيت حق الرجا ل وصوف

ياقلب افرح مع الاحباب = اقلع لباس الحزن وانسى
الحزن قاتل وبه منصاب = خلك فدرب الفرح وارسى

سلام من يمنا إليمك = ياصلك صافي صفا الانفاس
كريم وهذا الوفا إفدمك =مخبور بك ياجويد الساس

راعي الوفا قبلكم عمك = وانت لوصل الرحم نوماس
نشمي وشارب حليب امك = ياحر من حر عالي الراس

فالطيب تكسب محبة ناس = تعطي من الود ويعطونك
لاتسير قاسي عديم احساس = ترى البشر عايشة بدونك

ياليل فيك السهر والبوح = فيك القلم يكتب الاشعار
البعض يشكي اسى مذبوح = واللي فشعره فرح وازهار

شهرين لي خل ماشوفه = والعين تبكي اسى غيابه
ماعرفت دربه ولا ظروفه = والخوف محذور به صابه

هذا الوفا فالقلوب البيض = إيعيش طول الزمن يبقى
تعطى عطايا بلى تعويض = وطيب المزايا بهم تلقى

خلي حياتك امل وحنان = وصدق مع الناس عاشرهم
حتى الاسى قابله بإحسان = والناس تتبع ضمايرهم

يلي مسافر طلب للعلم = ربي يعينك على جهادك
صمم وثابر وحقق حلم = وعود بعلم ينفع بلادك

اعطي في يمناك لاتناظر= لاتقول للي عطيته كم
خلك مع الطيبه حاضر = وامور دينك بها مهتم

كل ماسعيت صادق النية = بكتب معاني المحبة له
يرمي سهام الاسى فية = والنفس زادت تكبر به

عم الصفا في دياري حرب = والقلب مشروح والخاطر
ودي إنتمسك فهذا الدرب = نعطي من الطيب ونشاطر

ياخل حانت مواعيدك = بالحيل عيني ملاها الشوق
القلب يهواك ويريدك = ونت حبيبي وكلك ذوق

ظلمتني في دروب الود = كل ماعطيت تنكروجودي
إنت والايام ليا ضد = والصبر ضاقت به حدودي

ياليتك ابحرت في صدري = وتشوف زود الغلا لك كم
والله وربك وهو يدري = هواك يجري بمجرى الدم

ياقلب فيك الجروح إتزيد = من حر ماتشوف وتناظر
دنياك ماهي كما اللي تريد = زمان ماهو كما الحاضر

يلي إتشاكى من الايام = خلك فدرب الصبر تسعد
لابد تفرج لكم قدام = والحظ في يوم بك يصعد

صنفين فالناس محرومة = من نعمة الحب والراحة
قلوب فالغل مزحومة = واللي على السر فضّاحة

جيتك ابنسى شقا الايام = والشوق لك حيل مجرفني
بعيد ياخل لك كم عام = والهجر نيران تتلفني

الحب كلمة ومعنى عميق = ماكل من قال يدركها
ارواح تحيا بها وتفيق = ماهي عبارات نسبكها

له قلب طيب رهيف إحساس = من زود طيبه ترك بصمة
لو كان طبعه فكل الناس = ماصارت انداد مختصمة

ياروح ساكن فوسط الروح = لك حب يغني عن التوصيف
كل القوافي تجي وتروح = مايسدك الوصف لو بنضيف

بعض البشر تنقلب ضدك = في لحظة الضيق والاحزان
فحين وقت الرخى إتودك = ترغب في قربك دامه زان

عيد النظر واترك المجهول = ياقلب لاتوه فدروبك
اياك تغرم بهم بذهول = والنار تصلاك وتنوبك

لاكنت وحدك ومستوحش = اوصيك تقرى كتاب الله
الروح تحيا وتستنعش = وتعيش وقتك هنا فرضاه

عطيتك الطيب حتى اني = فضلت روحك على روحي
واليوم بعد الوفا مني = تهجرني وتزيد فجروحي

ياقاسي القلب ليه قلب = مثل اللذي يسكن بجوفك
لاكنه الفرق ماهو صلب = رهيف ماهو كما وصوفك

لو الفؤاد اللذي فيه = يقدر على الهجر والنسيان
ماكان صار الاسى بيه = ولايوم عاش اللقا ضميان

تحسين الاوضاع طمنا = القصد طيب وفيه إنصاف
مليك يبغى الفرج عنا = وده تكون الامور إخفاف
لاكنه بعض البشر منا =زادت على منكتب أضعاف
ماهما يوم تتهنا = الهم مالن لها ينضاف

ليت إنتعامل كذا فالطيب = نمشي على الحب كالاخوان
لاشك فينا ولا تثريب = ودرب المودة لنا عنوان

تعال قلي عن أشواقك = عبر غرام المحبة لي
ودي حنانك ومشتاقك = والبعد نار إتوقد بي

وكاد مافي احد مرتاح = الكل يشكي من همومه
الي سنينه اسى واجراح = واللي فقد خير إنجومه

طال انتظاري وانا استناه = لحظة من العمر يسعدنا
والوقت طول ولا شفناه = ماغير زاد الوله عدنا

ياعزة النفس ارتفعي = لاتجادلي كل من فزك
لاضر فيها ولا نفعي = وتبقي على الدوم في عزك

محتاج قلبي هوى طيبتك = لازال حبي لكم باقي
تعال عيني إشتكت غيبتك = لاتزيدفي حرقة اشواقي

لولا غلاه يسكن الانفاس = مشقيت نفسي على حضوري
قلبي وروحي مع الاحساس= تموت دونه في منظوري

ياليتها يوم زارتني = حست بقلبي وخفقاته
كل العبارات خانتني = ضاعت بنا فحوج أوقاته

مرت بنا اعمارنا وراحت = وسنين تجري وتطوى طي
اجسام جاها السقم طاحت= وعيون دوبك تناظر شي

ياليتني كنت في عيونك = واشوف نظرة عيونك لي
ياهل مثل عيني يغلونك = ولا جنان المحبة بي

لاتقول قول الزرى ويحرجك = قدام ناسك وخلانك
من قوم أهل القدر يخرجك = إحرص قبل ينطق لسانك

يامن فدرب الهوى لمتو = ماعرفتو طعم المحبة كيف
والله لو يوم له ذقتو = ماكان قلتو عليه من زيف