الشعر بحر وبنت الافكار موجه = لا ثار جوف البحر تطربك الامواج
وانا بحر موجه عن الفين موجه = يفني ويخلق له مجره الا هاج
والشاعر اللي ما تبسـَّم مروجه = بَلبسَّه اوشاح وآقلـِّده تاج
تاج العذارى عقب شفت الغنوجه = برجال لا هب الشميّل لها اغناج
كم لي اناظر دخلته مع خروجه = حتى تنحَّت من سبايبه قرطاج
واليوم انا اقسمت اوسع فجوجه = واعانق الاسراء واهديه معراج
يا نجم عيبه في زمانه وهوجه = عين الكرامه ما هضمت حق وهّاج
الملعبه كفّت كفوف ٍ لحوجه = والذيب ما همه قطيع ٍ من انعاج
ارقا وابرقا ما لنا فيه حوجه = خلَّه يكوِّن بالردى شركة انتاج
والله ما هز الشعر في هروجه = وان ثارت الهيجا ابعطيه للصاج
شاعر كفو وادعس على كل عوجه = ماني بمثله بين نسوان دراج
لي لابة ٍ امخمـِّده كل هوجه = يزبن لها وقت المطمات محتاج
يشهد لنا التاريخ يا من تموجه = قول ٍ تلته افعال عالين الابراج
بفخر بربعي حرب والقاف اروجه = قوم ٍ لهم بالعز والجود منهاج
حاضر وماضي عزنا ساق فوجه = فوق الكواكب كلها حرب ترتاج
كم معجزه يا حرب هدت بروجه = شيخ ٍ بنى مجده ومن عقبك انعاج
ما ينكرك من هو وفيّ ٍ بلوجه = ولا ّ الردي في كل الاجواد هراج
الضيف نطرب لا لفانا ولوجه = وللحق ما والله طفينا له اسراج
كلن له افعاله وخابر دروجه = ماني بباخس حق وافين الإدراج
والنعم في كل القبايل يتوجه = مني سلام إلـ(حرب) عالين الابراج