سلام الله سلامٍ يفرق العادي من المنتـاز=سلام من بعده يبيـن المنتـاز والعـادي
وانا ودي اهوز مهجرس اللي قبل ماينهاز=عسانا ناجده ياصحابنا في حلبة المـادي

هلا يامرحبـا ياللـي تسلـم واركـز المركـاز=على وضح النقاء وان كان خربت مضحي البادي
انا خابرك عاقـل تـدري ان الضلـع ماينـراز=لو انك راس حربـه لاتحسبـه كـورة النـادي

يدوم ابك البقاء لكنها هوشه بلا حجاز=واظن الجو به غيمه لها بارق ورعادي
وانا مادور الا مثلكم بالطيبـه يمتـاز=ويحسب عن سريه كامله عتاد وافرادي

ليا دورتنـا مانتقـي دام الحجـاز حجـاز=نبا نقعد معك ونقوم حسب اسلوم الاجوادي
ترانا ياولد جمران نمزح والنفوس اعـزاز=لو ان المزح بعضه شبهوه بشوك الاكبادي

نعرف انك هنـا وهنـاك يافايـز ويافـواز=واعرف ان الحيا في ديرته ماعنـه نشـادي
ياراع الددسن اللي مجهرك بالدرب ليت الغاز=علامك كل مايكشح عليك تصيـح وتنـادي

درينا انـك تسويهـا وتنقـز نقـزة النقـاز=ولاكن ما انت عادي مثل عدي الاشهب العادي
غصون الدوحه الخضراء تحت ان هزها هزاز=ولاكن لاتحاول هزهـا لـو حـدك الحـادي

ركبت الازرق اللي كل مامر المواتر ناز=آلا وش رايك انك للقعود تحط عـدادي
اعشق اثمارها وغصونها ماني لها حزاز=وانا لشفت غادي مامشيت بسكة الغادي

بعد هاذي ترانا ياولد جمران نار وقاز=تعلم كيف تمزح لابغيت اتمازح اشدادي
تغاضينا عن الددسن وجتنا لمزة اللماز=تركنا الاوله وارها علينا قرم الاولادي

علامك تحسب ان الملعبه عصير ابو مزاز=تحيزم والمعارك مابها دله وبرادي
لابالله شبها وبيوتنا ماهي من القزاز=تحدي خذ تحدي بس ماني موس ردادي

انا ماني عنيدٍ يطمـر الجرفـان والاقـواز=اليا قالو تحدي شاف نفسـه مالـه مـلادي
امشيها حسب عرفي واسد السمع عن ماجاز=واقدر واتحاشا صحبة اللي يحـدر الـوادي

صحيح ان المثل يقول سيب الخبز للخبـاز=ولو هو شاركك في نصف خبزك بعد ماجادي
وعن حزب الفضيله ياجمل ماودنـا تنحـاز=ودرب الغانمين ايمين وش بك عنه متحادي

تقوله وانت وش سويت يالشاعرمن الانجاز=تقول انك صنعة المستحيل بحرب بغـدادي
بقيلك ياولد جمران بس تمـارس الجنبـاز=لإجل تحصل على الثنتين لوبالمركز الحادي