اجلس تقهوى وأشرب البن والهيل=وأقلط على الحايل وكل من شنقها
وأحفظ لسانك ما نبي قالٍ وقيل=واليا امتلى بطنك مع الحزم سقها
ماهو بنا من يستمع للماهبيل=اللي على الخيبة تمسح عرقها
عوجٍ هروجك ماتعدل عن الميل=وسابقك يم الكذب ماحدٍ سبقها
ماهي مودة جيتك والتعاليل=أعرف نوايا الشخص لو مانطقها
بدري عليك تغرني بالتهاويل=يابو عيونن مابرت من غصقها
ستين عامٍ بالردى توفي الكيل=حالتك حاله والقصص تختلقها
مافيك خير ولا نبي زود تفصيل=لك طرقةٍ ياهيه ماحدٍ طرقها
وأنت تعرفني ماخثع فالمحابيل=ورجلي عن الزلات قلبي صفقها
أمشي دروب المرجلة والمحاصيل=وأعز نفسي والله اللي رزقها
وأفرح ليا جوني زحول الرياجيل=اللي تنومس بالمجالس احلقها
ندور قدم وجيهم بالمعاميل=صفرن تعاقب والجمر ماحرقها
وماجوبهم حيلٍ تقلط على حيل=قدام تاصلهم يجيهم مرقها
وكلن بفعل الطيب يلقى مداخيل=الطيب بيبانه وساعٍ شققها
والنعم غاية للرجال الحلاحيل=ولولا الجمايل (نعم) ماحدٍ نطقها
الناس هذي هي جيلٍ بعد جيل=اللي خلقها بالطبايع فرقها
مير أنت ياللي تشرب البن والهيل=الفايته قدمك وكل من شنقها
وجود لسانك مانبي قالٍ وقيل=واليا امتلى بطنك مع الحزم سقها