الاسم واضح والقبيله ترا الشيخ = واصل الشياخه ساسها راس جدي
ياجاهل افعول العرب والتواريخ = انته ترا مسرع ولازم تهدي
لحظه استمع لايسمج الهرج ويبيخ = يامن تجيب العلم مدري تودي
بعطيك نبذه للصدور المنافيخ = لنكان تبغى عقب نشدتك ردي
تاريخنا بالسلم والحرب تاريخ = وانا لسرد افعولنا مستعدي
يسقي زمان انوبخ الخصم توبيخ = بشذرا السيوف اللي تسل وتحدٌي
على ابلجن بالسبق مثل الصواريخ = من فوقهن حرابةٍ ماتضدي
فريسنا اللي بالمواجه مطانيخ = تارد حياض الموت وقت التحدي
كم نوخو فرسان الاشراف تنويخ = ابوسط ( فيده ) بين جزرن ومدي
وكم دوخو روس المعادين تدويخ = وديرة ( بني لحيان ) صارت بعهدي
والا انته امزارع حصيلتك بطيخ = الدهر لاحدك تذرا بسدي
خلك على حدك ولا تقرب الصيخ = ما انته بكفون لي والا انته بقدي
يوم ان بعض الناس عريا مفاصيخ = عن سنة الهادي فضاً مجرهدي
نسعى بتقوى الله والعلم ترسيخ = ومنها ترانا نستمد ونمدي
وعاداتنا تنفى الخبول المفاضيخ = اللي عن اسلوم النشاما تصدي
الجار منزاله عطارد ومريخ = فوق السما بين الكواكب يعدي
والضيف اعده من كبار المشاييخ = نكرمه لو ان الزمان امتردي
ولا يجحد اهل الطيب غير المداليخ = كل القبايل بالفعايل تعدي
ياجاهل افعول العرب والتواريخ = لا عاد تنشد عقب ماجاك ردي
الشيخ يبقى شيخ وانا ولد شيخ = واصل الشياخه ساسها راس جدي
من روس حرب الغانمين المطانيخ = اهل الفعايل كاسبين التحدي