مرحوم يا صّياف يـا شاعِـر الحـروب=يا شاعرٍ سجّل حضـوره فـي الميـدان
طاريه ما ينـزاح وإسمـه فـي القلـوب=مِن سابِق الازمان إلـى تالـي الازمـان
عِلمه وصل للشّـام والشّـرق والغـروب=وارض الجنوب وقِـد تعـدّا لكُـلّ مكـان
باابيات شِعر تسير مِن واسِـع الـدّروب=سارت بامان الله وحِفظـه لهـا ضمـان
والله يحميهـا مِـن النّـقـد والعـيـوب=تشبـه للوحـة فـنّ وبريشـة الفنّـان
وإن مات ( إبن عوّاد ) للشِّعر مِن ينـوب=مِن حرب ( قوم الحرب ) بالسّيف واللسان
صانـوا مواقِهُـم ولا بينهُـم مغـلـوب=فُرسان هيّـه والمواقِـف لهـا شُجعـان
ويالله يـا مطلـوب يـا غافِـر الذّنـوب=يالواحـد الدّيّـان يـا رب يـا رحـمـن
اغفِر لابـن عـوّاد ولكُـلّ مِـن يتـوب=واجعل لهُم يا رب فـي جنّتـك مِسكـان
وصلاة ربّـي عِـدّ مـا هبّـت الهبـوب=على النّبي الهاشمي المصطفـى العدنـان

سبحان من كل البشر قدمه اضعاف=جل الذي نرضي بحكمن يريده
يفني بشر ويجدد اشكال وأصناف=يفني ويخلق والملا قبضت ايده
وذي حكمت الله من قديمات الاسلاف=تروح ناس وناس تخلق جديده
واليوم جا علمن يضيق وينعاف=موتت فقيد ولاهو ايه فقيده
عزالله الشعر من بعد صياف=ماله حلا لو زاد نظم القصيده
ياجعل له في جنة الخلد ميقاف=ولعل قبره له حياتن سعيده
يبكيك كل الشعر وبالوزن والقاف=ويبكيك من يتعب لنظم الفريده
ويبكيك كل الشعب منكل الاطراف=وشلون لايللي صفاتك حميده
عساك فالجنه مع الناس الاشراف=ويرحمك ربن كلبونا عبيده

وادع علم حرب ورحل عن وطنا =الله يثيبه والله انه يحله
صياف بن عواد زبن المجنا =عسى الولي بظلال عرشه يظله
يا ما وقف في ساحة الشعر عنا =يرقى بنا في كل عيطا مطله
لو كروا الشعار منا ومنا =ما صار في قلبه من الخوف ذله
وحنا معه في كل ميقاف حنا =واخصامنا من هيبته مستشله
ليت الليالي لـ أبو مفلح صفنا =او ليتهن على البقا مهلن له
وحنا قبيلة حرب عقبة حزنا =وذويه واقرابه وربعه ومن له
لو بالمساوم بالذهب لو وزنا =ما يأخذه طلاب ولا يصله
والموت حق وبالاله استعنا = ننعى السحيمي بالصحف والمجلة
وجمهورنا في شامنا وفـ يمنا =كل على صياف دمعه يهله
وشعارنا كفوٍ بهم ماجهلنا =لكن ما كل يحل بمحله

يامعشر اهل الشعر والناس الاشراف =اللي لكم بالطيب قامه وهامه
بالله عزو الشعر في موت صياف= عساه في الجنه تخلد عظامه
وعزوا قبيلة حرب من كل الاطراف =اهل الكرم والطيب واهل الزعامه
انا اشهد انه جامعا كل الاوصاف =فرض على كل الجميع احترامه

أحدٍ يموت وموتَـته ماأثـرت شـي=واحد يموت ويصبح الحي مذهـول
البارح الساحة نباهـا نبـنٍٍ سـي=لو النبأ عن حـق ماهـو بمقبـول
علمٍ يغـص بعبرتـه كـل حربـي=على فقيدة كوكب العرض والطـول
نجم سطع واضفى على السابعه ضي=أثرى الخليـج ولوتخطـاه معقـول
بحكم الأدب شهرة كرم حاتم الطـي=في ساحة القلطة لصيـاف مدلـول
وأهـل الأدب تنعى فقيـدة عوانـي=كن الأدب بغيـاب صيـاف مشلـول
يشهد له اللي دم قلبـه ماهـو نـي=ومهما يقال انصاف صياف مقلـول
حقه على الإعـلام مدبـول وثـري=ليه العلـم حقـه بالإعـلام مغلـول
اللي مثل صياف لو كـان مـن أي=يحيا علم وإن مات مامات مجهـول
واللي عليه من الوفـا يعتبـر لـي=ولاعاش من سيفه على حرب مسلول
بس أتململ وأفرك الصـدر بيـدي=كل الكلام يقول لي وش تبا تقـول
وأقول دنيا الحـي ماخلـدت حـي=يأتي لها محمول ويـروح محمـول
وأحد يموت من الهرم موتة صبـي=وأحد يموت وحزن فرقـاه للحـول
عزاي ابو رامي وعزوة بني خـي=مادام راشد حـي الأبـداع مكفـول
طبيب يفصد عرق والفك لـه كـي=باب الثقه مفتـوح والشـك مقفـول
ماقال هذي هي لو هي ماهـي هـي= بعد النضر يأخذ به الحـق مدبـول
وما قل دل وزبـدة الواجـد شـوي=وكل عن اللي تنطق شفاه مسـؤول

الارض تهتز دون طويـق وتطشـه=والبحر من صلف موجه ماهو برايـق
والليل كنه يشـوف النجـم ويخشـه=والغصن طيره غفى عن صبحه الفايق
والسجن جاءه الطليق بنفسه ودشـه=والجو حتـى بروقـه دونهـا عايـق
واللي على الجيب وقف والكفر فشـه=والجيب قبله توجد وازعـج السايـق
والدمع منديلـه اللـي دايـم يمشـه=اليـوم مايقـدره منديلـه الـوايـق
بعير الاشعار طـش البارحـه قشـه=واقفى وذقنا مـرارة حزننـا اللايـق
صياف مات وتـرك بقلوبنـا وشـه=واحزان بعيون ناس تمـر وتوايـق
ياثقل مزن العيـون وياكثـر رشـه=على مراتع خدود الحربـي الضايـق
اللي توجع وقـال: بحيـره ودهشـه=ياحزن مستور وحبيب وابـن شايـق
ياويش ابقول وانـا داخلـي ربشـه=الا ترى ( الشعر ) بعده ماهو بطايق

أعزي قبيلة حرب في موت صياف=خطب جلل والفاجعه في كنفها
سيف يشرفنا على كل ميقاف=وله وقفة ماكل شاعر وقفها
وليا غدى بالسوق أرباع وأنصاف=يصرف جنيهات الذهب ويعرفها
بنت الهوى من عقب صياف تنعاف=ولاعاد فيها ذوق يامحترفها
الموت حق وسنة أجيال وأسلاف=والا الحياه الله يكافي كسفها
الله( يبيحه) عد ما هل وكاف=وعداد من دمعة عيونه ذرفها
وعساه بالجنه مع الصحب الأشراف=آمين يسكن ياآلهي غرفها

ياللي تزيل الهم وتنفس الكرب = بأمرك وتدبيرك تدير النسايم
ياللي تسيرها من الشرق للغرب = نطلبك عفوك يا عظيم العظايم
يا فارج الكربات تجبر عزا حرب = في شاعرٍ ما طب سوق الشتايم
شاعر علم ما أحدٍ وقف له على الدرب = ما يرتبك لو قدمه البحر عايم
ينقد ذهب.. ما يقبل الطرح والضرب = وعن ما ينزل قيمة الشعر شايم
لعل منزاله مع الحور عن قرب =في منزلٍ مافيه حر وسمايم
في منزلٍ يهني له الأكل والشرب =يحلّ به صياف ويقيم دايم

وابوك ياوقـتٍ كثيـره بلاويـك = ياما افقدت عيني من الناس غالي
مرحوم يامن دمعة العين تبكيـك = يامن على روس المراقيب عالـي
صيّاف ابن عواد مااحدٍ بناسيـك = ياابن الحرار اللي تفـك التوالـي
تدحم بجنبٍ منه ضايق معاديـك = واللي تنكرلك مايسـوى ريالـي
تبكيك حرب اللي تنومس بطاريك = وعزوة شبابه في جنوب وشمالي
والمملكه وارض الخليج ومحبيـك =ويبكيك شعرٍ بآخر الوقـت بالـي
ياشاعرٍ باالقاف وينـه مجاريـك = يامدرسة نقض وفتل وارتجالـي
تاقف مواقيف السعد حين يدعيـك = الماقف الغصاب مثـل الجبالـي
ماغيرت سـود الليالـي مباديـك = ولاتشتري هزله وسـوّام غالـي
من خلقتك طيب ولاحاشت يديـك = الاّ المراجـل كايـدات المنالـي
ياهادم اللّذات وش فيك وش فيك ؟ = تنقـا شيـوخ القـوم ياهملالـي
تغيب ياصياف والنـاس تحييـك = فقلوبها وذكرك حشـاه الزوالـي
عسى الولي من واهج النار ينجيك = وعسى جنان الخلد هي المآلـي .

البارحه يـوم المخاليـق هجـاع=عيت لذيذ النوم عينـي تشوفـه
كن اللهايب تشتعل بين الأضـلاع=يزداد واهجهـا وقلبـي تلوفـه
سبت خبر عبر القنـوات ينـذاع=موت الصديق اللي قليله وصوفه
يالله عسى له جنة الخلد مربـاع=واقبل دعاء عبداً رفع لك كفوفـه
مرحوم يا صياف يا رمز الابـداع=ياللي حزيل الشعر سطر حروفـه
قدم درر للشعر من كـل الأنـواع=يجيب صعبات البيـوت معسوفـه
يا فارس القلطه ويا دمث الاطباع=له هيبتا بيـن الملافـي وقوفـه
من بعدكم ما نفقد الشعر لو ضاع=ولو كثر شعاره وكثروا صفوفـه
يا كم بدرا غاب من بعد مطـلاع=ويا كم رثينا واحدا مـن سيوفـه
حكم القدر لا حان ما عنه مرجاع=ودنيا المآسي ما عليها حسوفـه