حفـيـد الحـجـيـري =
سلام لـولا الحيـا بـدّل = بآهات فالقلـب مكنونـه
يا همس بالله علينا اعجل = صاحبك محتاج لمعونـه
هـمــس الـقـوافـي =
ترحيب مثل المطر لاهـل = يابادع القـاف ولحونـه
وانته اذا ارسلت نستقبل = قلـي وشلـي تحسونـه
حفـيـد الحـجـيـري =
تبقى و ناصيك ما يخذل = و ليا سألكـم تفيدونـه
ورود قلبي بـدت تذبـل = من هجر خله و مضنونه
همس القوافي=
اخوك من واجبه يبـذل = جهده ويخدمك بعيونـه
لكن بلا اسباب ما يحصل = اللي لنا اليوم تشكونـه
حفيد الحجيري=
ذي هقوتي فيك يوم أسأل = وجهود الأصحاب مضمونه
من يمنا الوصل مستكمـل = ومن يمهم مايله غصونـه
همس القوافي=
مادمت في وصلهم تآمل = اصبر على البعد وغبونه
يمكن مساعيـك تتكلـل = وباب المجافا يصكونـه
حفيد الحجيري=
باب الأمل لو هُو مقفل=وأعتى المتاريس من دونه
ما دام غيره ما لي مدخل=بأصبر لو أعيش مسجونه
وعسا الولي منك يتقبل=وقحط الوصِل تهطل مزونه
ومن حال لا حال يتبدل=حياً له الروح مرهونه