شاهد معي ثورة الصناع = بحر الهوى ضيعوا باعه
واليوم مركب بدون شراع = الود من ضيع شراعه

ابــــــــــن وازن =
يامركـز الفـن والابــداع=سـلام يـافـن وابـداعـه
على الهواء افتـح الميـذاع=اخوك يشكي مـن أوجاعـه
ســعـــد جــبـــر=
ترحيب مثـل اول المربـاع=لا بـان طلعـه ومرباعـه
هات الخبر والدروب اوساع=والجدي معـروف مطلاعـه
ابــــــــــن وازن =
وافي وتبقى علينـا شعـاع=يامصـدر النـور وشعاعـه
حال الأسى جمهر الاوضـاع=واخلف معي الحال واوضاع
ســعـــد جــبـــر =
الوقت يـا صاحبـي لـوّاع=شينـة مباديـه واطباعـه
لاتعيش هذا الزمن في صراع=وتخلـي اليـاس شماعـة
ابــــــــــن وازن =
نمشي مع الـرأي بالاقنـاع=وكلن لبس وجهت أقناعـه
دام الشكل كامـل الاضـلاع=ما ينقص الـرأي فضلاعـه
ســعـــد جــبـــر =
المكتوي لو قنع مـا طـاع=لو طاع ما يوقف اصداعـه
والشكل يـا سيـدي خـداع=لا يغرك ان شفـت لماعـه
ابــــــــــن وازن =
النفس تقنـع بعـد اجمـاع=العيـن والقلـب صنـاعـه
قدر الـوزن ضيـع البيـاع=اللى فقد فالهـوى صاعـه
ســعـــد جــبـــر =
صاع الملك يا رفيقي ضـاع=ويوسف الوضع مـا راعـه
واللي حسب حسبة الـزراع=يقيسـه الشـرب بذراعـه
ابــــــــــن وازن =
شاهد معي ثورة الصناع=بحر الهوى ضيعوا باعه
واليوم مركب بدون شراع=الود من ضيـع شراعـه

الود للناس حق مشاع=لك ساعة ولصاحبك ساعه
بس الخلل وين يا ملتاع=فالود والا فتُبّاعه