لاجاتني من راعي الطيب زلـه = اقـول زلـه عابـره واحتملهـا
ماني مفتـش دق هرجـه وجلـه = والنفس نكضم غيضها مع زعلها
ورفيقنا لو يزعلـه راس ضلـه = عوجاه في بعض الامور انعدلها
والجار لو سيفـه علينـا يسلـه = نقول جار وكـل نفـس وعملهـا
نرفاه مهما صار بالجـار خلـه = لوا لخطيـه مـن جنابـه دبلهـا
لابد مايرحل عـن الـدار كلـه = والطيب يبقـى والرديـه لاهلهـا
والضيـف حقـه مانسيـنـاه لله = وارزاقنا منشـي سحابـه كفلهـا
نجود من ماجودنـا واجبـن لـه = واعذارنـا لضيـف مانفتعلـهـا
وخوينـا مـن طبعنـا نحتملـه = يامـن بنـا فـي ديرتاً مادهلهـا
لاقصـرت فيـه المطيـه نشلـه = مانتركه بيـن الجبـال وسهلهـا
ومرافق الطيـب حشـى مانملـه = قرماً منازيـل الرجالـه نزلـهـا
تلقـا النشامـا دايماً فـي محلـه = ماجـاب كلمـة سـوء ولانقلهـا
حبـل المشاكـل لاتعقـد يحلـه = ويقـال مـال الحملـه الاجملهـا
اما الـردي مادلنـا مثـل دلـه = اللي خلط نعناعها مـع بصلهـا
ممشي ورى راع الردى والمذلـه = ولا طيح فـي حبايلـه لاحبلهـا
الطيـب فينـا من نشينا جبلـه = والنفـس مازكيتهـا عـن زللها
يجوز فينا شافـت النـاس علـه = نوب الرجل مايشوف حاجه فعلها
يفكـر انـه كـل دربـا ًيـدلـه = ودروب شتى لامشاهـا جهلهـا
للهرج نقـاده وللكـيـف دلــه = والقوم يعرف تبعها مـن بطلهـا