لاحل طار الشعر وبيوت الاشعار = ابني بيوت الشعر فوق المعاني
مانزرع اشجار ٍ قليلات الاثمار = ولا اقول لي قول ٍ يبي ترجماني
ارفع هدفها فوق من فوق الاقمار = مصيونت ٍ لو الهجوس اتحداني
واليا نصيت انصا بعيدين الانظار = بالشعر وإلا لاحصل علم ثاني
اشوف واميز ولاني بسبار = واقصر عن الهذار وإلا الاناني
واخذ من الاشوار واقدم اشوار = ولا اقول انا الي سايد ٍ في زماني
في حال وإلا حال لاصارت امرار = اضرب على الكايد وافز بثواني
ولالي وراء عامر ولالي بعمار = مسؤل عن فعلي ومنطق اللساني

سر ياقلم واكتب جزيلات الابيات = انا علي الفكر وانت الكتابه
عوم البحور وغوص وسط المحيطات = ومع الفضاء حلق وطير برحابه
مانته بمكلوف ٍ بكثر الدعايات = ولالك بمن يحكي ولامن حكابه
انته كتبت اقدارنا قبل بثبات = كتبت قبل النطق ينفك بابه
بامر الكريم الي رفع لسموات = من نرتجي عفوه ونخشاء عقابه
واليوم صاير تحت ظل العصبات = مستاسرينك والنتيجه عصابه
يحرفون الوضع حسب المزاجات = اهل الكلام الي قليل ٍ صوابه
حتى مع التاريخ عبر السنوات = كل ٍ يقول إنه فريد ٍ جنابه
وإنه من اجل الدين سوا بطولات = ولاجيت فعله حق ماينحكابه
الجاه هو والمال وايضا العلاقات = منها القلم يشكي وكل ٍ غدابه
ماعم في ماقلت للخير بصمات = لو كان قول الحق طول غيابه
إلى متى إلى متى نمدح الذات = والوضع واضح ماورد به تشابه
شنوا على الاسلام والدين غارات = من قوم ٍ اضعف من جناح الذبابه
وحنا نناظر وش تبث المحطات = وكل ٍ يقول إنه اسد ٍ بغابه
وإلا الحقايق كلبوها فقعات = تمسح كما اغبار ٍ مسحته سحابه
المعتصم حرك اجيوش ٍ ثقيلات = من شان صوت ٍ جاه هذا جوابه
وحنا نشاهد لنساء صوت صرخات = من طبت اسموعه نخا كل لابه
لاكن نعيش اسكات ونموت بسكات = هذا الصحيح وين وجه الغرابه
من قدس اوجيه البشر ضمن الاموات = يروح حقه قدم عينه انهابه
مع السلامه ياقلم والتحيات = لذيب والي عاش ضمن الذيابه

ماكل صمت ٍ يعتبر صمت حكمه = كم صمت ضيع حق ياراعي الصمت
وكم واحد ٍ حورب على اسباب كلمه = باسباب كلمه قالها عرّض الشمت
لوهي حقيقة لاكن الناس ولمه = ناس ٍ تحب الطهبله حيل والكمت
يبلش بها من طال صبره وحلمه = في جو لاهوبه يحدك الي اقدمت
والاادمي لاشفت جوره وظلمه = حذرا تحيزم فيه مهما تحيزمت
الله عطاك العقل كل ٍ وسلمه = حافض على قولك لاقلت وتكلمت
ومن لايقول الحق ليقن بعلمه = شياطن ٍ اخرس قلتها حق واجزمت
مايكبّر الي دون فعل ٍ وهمه = بعيون عرّيف الرياجيل واقسمت
من لاحفض دينه وعقله ودمه = مهما يكون ان مر قدمي تلطمت
قناعتي وارد بها كل جمه = اقولها وفي قولها ماتندمت

كد قالها لي طيب العرف والساس = من عرض من قالوا وانا قلت مايصير
قال الصحيح الي من الراس لراس =ماهي الضنون الله يمسيه بالخير
قال الذهب من بدّله يوم بنحاس = مايملك من العرف مثقال قطمير
قلت الصبر والناس لوتجهل الناس = يصّدر لها الواقع مع الوقت تقرير
قال الصدور الي بها كم وسواس = بلا سبب متوهمه شي وتغير
قلت الله اكبر شي لايمكن ايقاس = وعلى حسب ماقلت فالمساله غير
واخذت لي ساعه وانا كلي اعماس = مما سمعته سمع ولي له يشير
وطالعت لزحول ٍ على العز جلاس = الي لهم عندي معزه وتقدير
مافيهم الخايب ولاطابخ الفاس = ومن دونهم ماينفع ٍ المعاذير
من شانهم جنبت تعليق الاجراس = يوم اتضح لي فعل من يعّكس السير
والادمي لاصار مايملك احساس = والاعقل ماينقصه غير شعير
ولي يبي يصفق لتايه وهلاس = يصف جنبه وقت صف الطوابير
والسوس لامنه دخل وسط الاضراس = بالراس من سقمه سوات المسامير
ولي رضا بالذل والهون ينداس = والا الحرار تحوم وتشوم وتطير

ينادون لاكن يوم نادوا وش يقولون = وبعض الندا ماهو ندا دام به خفّته
ياشرهت هل الشرهات والله لو تدرون = الاوضاع ملتفه والارقاب ملتفّته
نقدّر رجال الطيب واهل الوفاء يافون = وراع الكفّت ماله غير لالزمت كفّته
على مسرح الاحداث والصوت هو واللون = وشي ٍ يقال وشي سامع به وشفته
يبيعون لاكن لاهل الطيب مايشرون = وجيه ٍ رضت بالعفّت وتعيش في عفّته
يبي يكون قالوا كان لا وش حصل ويكون = سوالف وكل ٍ ينتهي عند سالفّته
قصار الشبور بساعة الشده يروغون = ومن لاحذفه الوقت فالناس حاذفّته
رجال ٍ على الشدات لالزمت يرسون = يطولون وابو معرفه حسب معرفّته
لهم سمع يسمع زين وإن صوتوا يوحون = ماهم مثل من صوته يسابق صدا ارجفّته
وراع الخطاء بسم الخطاء مدب ومرهون = ومن جامل المخطي على نفس طايفّته
راع الهون يبقاء لو تبي ترفعه في هون = مايرضا سواء بهالمنزله لو تخطفّته
ترا الفار هد اسدود والظلم هد حصون = وراع العجرفه مادمره غير عجرفّته

بسم الله الرحمن الرحيم
فايز موسى البشري

كثر المجامل غثنا يارياجيل = وانا اكبر اعيوبي قليل المجامل
ولي يجامل كل من ينقص الكيل = مايغيّر الواقع عيون ٍ تهامل
في عالم ٍ صار اغلبه بس تطبيل = يالله دخيلك كيف صار التعامل
الي من اول لاغضب يسرج الخيل = وسط البلد ماغير ساكت وخامل
تحولت من قوه الضعف بالحيل = لو قلت ينقال اسكت الوضع شامل
مانقدر نّزل ولانقدر نشيل = وشرودنا الي من قبل صار صامل
هذا زمان العلومه والدرابيل = وجهاز يفحص ذبذبات الانامل
قلت الرجاء فالغيبات المقابيل = ونسل ظهور ٍ ماوصل للحوامل
والا زمان اليوم مامن محاصيل = ذل وخضوع وطاعة ٍ فل كامل

ياصغيّر كان حلمك بس تاصل للبقاله = وتاخذ الفشفاش وتشيل المثلج والعصيري
تشبه الحلم العرب وصف ٍ تهيا لي مجاله = ان زعل سني زعل والايبي يزعل نصيري
راحت ايام البطوله والمعارك والجزاله = القصير اليا تعزواء ماحماء عرض القصيري
خوذها من جلد ذات ونقد وحملها رساله = لو مصيرك وين ماوجهت مربوط بمصيري
كم نقول وكم كتبنا شعر والامن مقاله = نمدح ونثني وحنا فوق رث من الحصيري
التطور بالعلوم وبالتقدم والجهاله = عندنا قامت تطور والعماء يسحب بصيري
الحقيقة ماتخفاء يامطبّل للظلاله = مايخفاء شي قدم العين والعالم يصيري

ياليل طلت وكثرو الهراجه = والهرج في بعض المواقف يوذي
ماكل من سيّج قوي اسياجه = يامدرسة هالوقت جيبي خوذي
ولي بنا برج وعل ٍ ابراجه = مسلم وسكّن وسط برجه بوذي
ولي على نفسه يحب ازعاجه = يانفس منه ومن سواته عوذي
الارض فيها ما اكثر الدواجه = والضيق فيها زايد ٍ ويحوذي
لو الابنادم نوب ماله حاجه = يوخذ ولو انه ماهو ماخوذي
ومن ضاق عند الي خلقه افراجه = انا بسدّه ملتجي والوذي