|
كان الْك نصف اريال خوذ اعشره
يالرّبع قولوا وش يسبِّب سلوك السفاف؟= اللِّي يعمّ القرَيِّب و البعيد اقشِره يسوِّي شجيعن من اصناف الخطر ما يخاف= تسمع صليله الى مرّك و صوت اكفِره الموتر اللِّي اصْطابِه منكسر من خلاف= و يسوقه اللِّي يبا فعله يجيب اخْبِره مغير يمشي و يلعب بالسكك طاف، طاف= و لا شاف له واحدن راكد قَرَبْ و احْشِره يطوف يَمْنَه و يَسْرَه يَغِرْفِه بانحراف= و لو كان قدمه بعيرن باركنّ اطمِره تقول يطْرَدْ من الاعدا و صابه شعاف= حتى على الخط الاسود من وراه اغبَره و لو قلت له ليش تسرع؟ ما يقول: الظروف= يقول: كان الْك نصف ريال خوذ اعشره هو ما درى ان الرّكاده ما تودِّي الحتوف= و توفر القاز و المجهود و الفرْفرَه حتى و لو كلفه ساهر مئات الالوف= مهوب مهتم لو نشّف لابوه اكمِرِه يا الله يا واحدن دايم بعبده يروف= تاقى الغلَيِّم و تكفي المسلمين اخطِرِه |
راصود الوطاله
شفت ساهر واقفن له تحت كبري= و يترصّد مثل راصود الوطاله يحسبنِّي غافلن عنِّه و انا ادري= حذّروني منِّه اصحاب الشكاله كم ريالن قد خذه عِنْوَه و غَدْري= و ان سلم رجّال ما سلموا عياله لو فلوسه للخزينه كان ما اطري= بَسّ ياخذها الوِدَرْ و ايزيد ماله لو هو يصرفها على مشروع يِمْري= للفقارى أو على حَرْب الجهاله كان قلنا خير، لكن شيّ مُزري= توخذ اموال الغلابا بالحياله ثمّ ينفقها على الوادِرْ بمَصْري= ل"الاوائل" , و الحَليلَه و الحثاله قالو: انِّه شيخ، قلنا: إيه، بدري= شيختن شفنا نتايجها، ازباله للمحطّات الخليعه و التِّمِدْري= و كل صوفيِّن ربي في الهند خاله التهوِّرْ قد قِتل سايقْ و عِبْري= و لا ندافع عنك يا زايد اخباله لكن الارشاد و التوجيه يغري= كم سلوكن غيّره عقب الجهاله و لا نعالج مشكله و انجيب فقري= للجيوب الفارغه و اهل البطاله إدعوا الله من خذ الاموال جَبْري= يَجْعَلِه يشحذ على باب البقاله تمّت و صلّوا على اللِّي يوم "بَدري"= هزم الكفّار في مبدا الرساله |
أســـــــــتــغــــــاثــة
ألا يالله اللي كل خلقه بتدبيره= منيبين و الا اعصاة في دبرة الرحمن الهن يعم برحمته ما حدن غيره= قراره يجي ما بين قوله: يكون و كان بلدنا بها قحطن مكرِّب مساميره= لها ربع قرنن في دهر و الشجر همدان نشف "ما" مواردها ويبست بها بيره= و يشكي العطش فيها نباتن مع حِيوان و غليت بها الاعلاف برسيم و شعيره= و يشكي بها المديون من سطوة الدَّيَّان عسى المنخفض ياخذ شهر واقف سيره= تقافا مخاييله و وبله يجي ودّان تجي جروتن من شرق "عرعر" الى "عشيره"= و من حدّ "الاردن" لين تاقف ورا "جيزان" و لا به مضرّه تلحق الرِّيف و الديره= مع كل وادي، سيلها ما يضر انسان و تزين المراعي لين يشبع بها ابعيره= و ينعَم هل الماعز مع اهل البقر و الضان بها الفقع يكثر ما يتعِّب مداويره= مع كثرته ما ساقت الناس فيه اثمان و ياخذ ثمان اسنين و السيره السيره= تجمّ البيار بكثرة الما مع الرِّجعان يحول هماج الما إلى احلا من الشيره= و مع البدو تلقى الاقط و السمن و الالبان و بلدنا تعيش ابخير و يزيد تطويره= تحت راية التوحيد نبقى بَمِن و امان يقوده ابو متعب بفكره و تفكيره= الى قمِّتن تحلم بها ساير الاوطان و عدوّ البلد ما عَبِّره ماهنن صيره= و شعبه على البيعه يجدِّد له الايمان و قبل لا انتهي من رحلتي و اطلب الخيره= إلهي طلبتك تغفر لسيِّدي "سلطان" عرفناه، و انت اعرف، رجل عامِّن خيره= إميرن كسى العاري و أشبع طوى الجوعان و اصلِّي على خير البشر و اطلب الجيره= لنبيِّن نسخ في بعثته باقي الاديان |
حمد لله
حمد لله يوم يسّر للبلد و اغناها= صار للمرأه بديرتنا حسابٍ جاري كل ما تبغي فلوس ارجولها بحذاها= يمّة الصرّاف لو بالليله القمّاري تسحب، و تودع، بكلمة سِرّ ما تنساها= وان نست في ذاكرة جوالها من ضاري دام زوجه حيّ أجار البيت ما يعناها= و الرواتب للعماله قَسْم طاف الناري و مصرف الجوال و الكهرب و مصرف ماها= كلها من حِسْبتِه ما له شكر، و اعذاري و لا توفى- بعد عمر اطويل- شيكه جاها= من التقاعد أو من "الشونه" بأمر الباري و "الكوافيره" هذاك اليوم ما تنساها= كان وقت امناسبه و الا لفوا زوّاري و الشنط تمشي مع الحذيان في ممشاها= "سان لوران" او "شانيل" او من عمل "بولقاري" المره ما تذكر الا ما عطت يمناها= و ما خذت بيدينها الثنتين ما له طاري ما أعمِّم بعضهن ما هو ردي مجناها= في كرمها زود لكن في كرمها اتماري و انت يا رجالها إياك أن تعصاها= دامها تمشي بمشِّيها و لا تحتاري و لو يطيح الدلو ألحقها وثيل ارشاها= و اطلب الله ثم دوِّر لك على مسياري وحدةٍ مقطوعة الصيحه و ربي اغناها= عندها بالبنك حسبه من ثمان اصفاري ثم خلِّك طَوع و امش بأمرها و ارضاها= دام دلوك ما تجيب الما و سلكك عاري لا تقولوا قصته، مناب انا و اياها= حمد لله مثلهن ما احطّها في داري كل شيِّن تطلبه أم العيال افداها= و تاخذه و انا مسوِّي كن ماني داري |
مجاراة مجاراتي لقصيدة الشاعر الكبير عبد الله بن زويبن الحربي على الرابط: http://www.m-harb.net/vb/showthread.php?t=99832
يا وجهي اللِّي احْرِقْتِه لفحَة الكَنَّه= و باقي الجسد كنّ يلعَبِّه مشاذيبي كنّ التهامي كسا جسمي و يبرنِّه= ما باقي الا العصب و العظم والشيبي و الا تحت رحمة اطيورن يلوعنِّه= ما بين عكف المناقر و المخاليبي سِبّة هواجيسي اللِّي جت لها حَنَّه= تسري مساري و تِتْفنّن بتعذيبي تتابعن كنّهن رِتلن من الرَّنَّه=لا ورّدت للعَلف من غير ترتيبي جَنْ يعرضن لي معاناتي و اعادنِّه= مع بعض ربعي و مع بعض الاجانيبي اللِّي تبَطِّن خلاف اللِّي يورِّنِّه= ناسن "سَلوليّتن"* في السِّر و الغيبي طريقها مهّده و املاه ابو زنَّه= يومه فتن أمّنا و آدَمْ بتكذيبي من عقب ماهم سوا في جنّتن غَنَّه=فرقهم ابليس تشريقن و تغريبي و بعضن من اعيالهم ما خيّبوا ظنِّه= يمشون في خدمته مع كل ترحيبي لا صِرت معهم يورّوا طِيبْ و امْحَنَّه= و لا غِبت عنهم كلوك ابسطوة النيبي و مثلي ألاعيبهم ما و الله اغْرنِّه= أعْرِفْ طريقي بلا شكِّن و لا رَيبي أمشي على سنِّة الله و انعَمِ ابمَنِّه= و لولا تعاليم ديني بان بي عيبي * نسبة لعبد الله بن سلول |
الا يالرّفيعيّه
الا يالرّفيعيّه تراني من الهاوين= الى ابعدت عن جوّ المدينه و الاعماري بعد كنت في جوّ الجبيل النتن و الشين=و ريح المصانع و التلوِّث بها جاري حساسيّتي راحت و صرت اتنفّس زين= و شوفي انجرد ما فيه دخان و غباري نحرنا ديار العِزّ و الضلع ابو رجميت= ديارٍ احبّ اترابها موت و اماري الى جيتها صدري اتسع كنِي ابــــــ "يوجين"= و لو هي دهر و شموس و ايباس الابياري و الى جا الاذان اروح اصلِّي مع صفين= و الاقي بني عمي عن ايمين و ايساري و سكانها ربعٍ على الخير مِتْفانيت= بني عم و الا ذا رفيقٍ و ذا جاري أهلها مع الجيران بالطيب مِتْخاوين= من ايام ابو تركي و هم ربع و اصهاري و انا جالسٍ في البيت في المزرعه ذا الحين= "أتوتر" مع اهل "النت" زادي على ناري و الى جا المسا رحت استراحه بها ذربين= نتجاذب حديث ارجال و الليل سمّاري و قبل ينتصف ليل الشتا كلنا ممسين =و قبل صيحة ابو عرف نبدا بالاذكاري نصلي الفجر بالمسجد و ندحر اللعين= و نرجع نشبّ النار ما حولنا طاري و مع الشاذليه و التمر نثني الرجلين= و لا مرّةٍ نلد للصفره انظاري و مع ذرّة الشمس انتحرّك بعون امعين= و نسقي النخل انا و "دونو" و "كوماري" عسى الله يجيب السيل تِرجع بها البيرين= و على المسلمين ايعمّ خيره من الباري و صلاتي عدد ما كبّر و هلّل املبين= بمكه على محمد و ما ذعذع الذّاري |
كثرت المراويح
أشوف البلد كثرت عليها المراويح= مراويح عجّ، الله يجيب انفراجه تقافا علينا مثل حب المسابيح= يجي بين عجّه هي و الاخرى عجاجه الا يالله اللي سيَّر النود و الريح= و خلى قراح الما يجي من هماجه تغيث البلاد و كفّ عنها السواميح= و فكَّه من اهل الشوشره و اللّجاجه بلادٍ تقيم احدود ربي المساميح= بها الدِّين سايد و المساواه تاجه بها الرجل من تِرثة رجالٍ مفاليح= كريمٍ، على الضيفان طلْقٍ حجاجه الى جاه ضيفٍ صار للحيل ذِبِّيح=حريصٍ على ضيفه و لو هو خواجه ذبيحته كبشٍ اقرنٍ في الغنم تيح=و لا هو من اللي يذبحون الدجاجه و لا به عيوب الا بأكل المفاطيح= و معه كسترول و ضغط يصعب علاجه و الى قلت له خفِّف يقاطعك و يصيح= يقول العمر واحد، و خلّ السماجه مطحطح زمانه من رجالٍ طحاطيح= يبا يمشي الدنيا طواع بمزاجه و ابه عيب ثاني؛ شيل كثر المفاتيح= بجيبه يزمزمها و لو ماش حاجه و يغرق بشبر الما و لهوب سبِّيح= يقول الرياضه سكّةٍ للمراجه الا يالله بمزنٍ تجي نشو لقَّيح= يجي سيلها غدقٍ و يكثر خراجه و يحيي جلال العُود و الرعي و الشيح= تربِّع بها البلها و تشبع انعاجه |
رحلة النعيريَّه
من صبح ربي ركبنا للنعيريه= شايل معي كل نشميِّن و مزيونه عندي، و كلّن له قياسه و عانِيِّه= مالين عيني عساهم ما يبكُّونه سعد وليده و لا مثله حدٍ زيِّه= الى نخيته عسى الرّديان يفدونه يجي على حروتي و يزود ببليه= يا حظ من في علوم الطيب ينخونه و معنا ام "حجّاج" هذيك السنافيه= سفيرة الحب في قلبي و "أيقونه" و هذي ام "عيّوض" يا طيبه و يا حيّه= العقل و الثقل هي بيته و ماعونه و في خافقي صار لام "سعود" ماريه= دافي غلاها يمشينا بقانونه من حب ابوها لها و اخوانها طَيَّه= في ثومة القلب محفوظه و مصيونه و ربيع قلبي و نوّاره بوسميِّه= رفيقة الدّرب في مسراي و لحونه هذيك "هِيَّه" عسى ما اعدم حراويِّه= بيتٍ تديره يعم الحب بركونه ما ترفع الصوت، لا قشرا و لا عَيَّه= حتى و لو شافت الميلات بعيونه حبِّه بقلبي عقد ليَّـه ورا ليَّـه= لو يجتـمع كل خـلقه مــا يفكّــونـه و عيالنا اللي تركنا ما بغوا جَيَّه= غشّاهم النوم هذا الصبح بردونه الله يديم الامن بارض "السعوديّه"= و يبعد عَنِه شلّة التغريب و جنونه و يكفي الوطن شَرّ ذولاك البطينيَّه= اللي تربّوا على خيره، و يشنونه و يكفيه من شر جيرانه هل السيَّه= اللي تولِّع بنار الحقد غليونه عبادة النار و احفاد المجوسيّه= يسعون للهيمنه و اهل الوطن دونه و يكفيه من شر تغريدة ضلاليِّه= اللي بثوب الورع صاروا يختلونه و لانيب ناسي بني "لبرال" في غيِّه= اللي على كل دربٍ شين يعطونه يبغون تحرير حوّا لكن امعيّه= ما دام هي في عفاف الدين مقرونه |
العيد طعمه غريب
العيد طعمه غريب و دثرته شينه= من كثر ما نسمع من اخبار سوريّا الدم يسفكْ و كاثرْةٍ عناوينه= و حنا و لا عندنا غيره و لا احْميّا وبشار بحما المجوس و روسه وصينه= و حنا نكابد عدوّ اهْناك و هنيّا و العالم اليوم كاثرْةٍ ملاعينه= و على العرب ما هنا رحمه و ماويّا يا الله فزعتك ياللي ما تنم عينه= تكالب الشرّ من واوي و واويّا انزل على الشام جبريل بجناحينه= يشيل من خالف الملّه بعلويّا وارمه ببركان حيّ و منصهر طينه= ومعِهْ من الناس من بالشرّ ناويّا المسلم الحقّ و القابض على دينه= كنِّه بجمر الغضى و يديه مَلْويّا نبي الفرج منك ياللي فزعته زينه= فزعة من الله تجي عَجْلَه سماويّا |
صباح المطر و الود
صباح المطر و الود من ديرة الكفّار=على ديرتي عل المراويح تسقيها لقينا سلوك المسلم الصادق الصبّار=ببعض الامور و بعضها شرها فيها لقينا العمل و الجِدّ، و الغش ما له كار= و لقينا النميمه ما يجيبون طاريها و لقينا الحسد ما له ذكر بين جار و جار= و كلٍّ بحاله، معطي القوس باريها صحيح انهم ما فكّروا في نعيم و نار= و علاقاتهم مع بعض فيها بلاويها و لا فكروا في شيمه او مرجله أو عار= و كل المعاصي ترتكب في نواديها و علاقاتهم بالبيع فيها الربا دوّار= و لا احدٍ يبر بوالدين او يراعيها ولكن حقّك حافظه ما يروح اجهار= و لا به فلان اللي نعرفه يمشِّيها و لا احدٍ شبك له بالبراري مية هكتار= و لا احدٍ يضايق للبدو في مراعيها تمنيت لو بعض المناقب لنا تنعار= لعل و عسى تصلح لنا ثم نقنيها |
غاب المطر عن بلدنا عشرة اعوام
ذا للمطر في "سياتل" عشرة ايام= والى لمحته بعيني ضاق صدري و ذا الحين انا صدري استاسع و لا انام= من يوم جاني خبر سيل "ام سدري" غاب المطر عن بلدنا عشرة اعوام= و هذي السنه خير ربي جاه بدري عسى المطر من بحر جده للاوجام =و من شام رفحا الى الخرخير حدري يسقي ديارٍ مشت في هدي الاسلام= ديارٍ حسدها العدو و كل ودري و عسى ابو متعب يقال: استبشروا قام= و يرجع لشعبه و يخرس كل "صدري" و من كان جهله بنى في راسه خيام= يرجع لرشده قبل لا يروح هدري ياللي لذمّ البلد سخّرت الاقلام= عملك هذا به خيانه و غدري نبي عدو البلد يدحر و ينضام= و نبغى البطيني يجي خاطره كدري أنا سعودي و ابا اسأل ليه يا خمام= يفوحْ قِدْرِكْ متى ما زاد قَدْري |
حب المملكه عشرة اضعاف
الى ذكرت اني بعد خمسة ايام= راجع بلادي صار بالجوف خفخاف مهوب بغضٍ في "سياتل" بلد سام= لا شك حب المملكه عشرة اضعاف مهما يكون الغرب به صدق و انظام= نظام يحكم عدل ما فيه اجحاف و لو خذت حقك فيه في وقته و تام= مهوب ضايع بين جاحد و حلاّف و من غير ما تطلب مفازيع و ارقام= و وسايطٍ حسب العوايد و الاعراف و من غير ركزة شبك او شيل مرسام= ما تكسبه يمناك هو ملكك الواف و برغم هذا حبي لمهد الاسلام= ما له شبيه و لا تعدُّد بالاصناف حبي لها مثل البدر صافي و تام= حب الوليف اللي يشفشف لميلاف حتيش لو تكتب خبيثات الاقلام= و لو كثّروا بالهرج عذّال و سفاف عجفا هَلي اخير من قتل و اجرام= و تهجير لديارٍ بلا فرش و لحاف كان الربيع اليعربي رفع الاعلام= لي بيرقٍ ما يوم نكِّس بميقاف ربيع تونس، ليبيا، مصر، و الشام= و الا اليمن من ناظره شاف ما عاف صحيح حنا عندنا ناس تنلام= ناسٍ انانيّه و لا تعرف انصاف ما همها الا نفسها و البلد هام= و الجعجعه واجد و لا شي ينشاف القايد يوجّه وزارات و ازلام= هو له هدف سامي و غيره له اهداف بطانةٍ فيها جشع مع ردا خام= و الشعب يشكي و المواشي بلا اعلاف ليتك يبو متعب تنفِّذ بالاكمام= و تزيح ناسٍ وقتها بالعمل طاف الما طراته لا جرى يروي الضام= و الى ركد في حفرته يصبح ازعاف ابلادنا فيها رجالٍ لها اقيام= مع خبره و تدريب في كل محراف و اللي تشبّث فوق في روس الاهرام= طايف زمنهم و العطا منبعه جاف جدِّد دما كل الوزارات باعلام= ناس اتْحَمِل هَمّ البلد فوق الاكتاف حنا ولانا ما هو ابقصّة افلام= حنا معك بالصف من وقت الاسلاف لكن يبو متعب ترا العصر ما نام= و عواصف التغيير تصفق بالاطراف لازم قبل ما تقلع اشجار و خيام= نعرف نوجهها بلا خوف و ارجاف و ما دمت لامر الله مطبق و الاحكام= لا تلتفت لحماية اغراب و احلاف ذولا لجل بلدانهم يحفوا الاقدام= و صيداتهم ماهي هزيلات و اعجاف يبون خيرات البلد ما هو ريام= و الى نشف نبع البلد راحوا خفاف و صلّوا على خير البشر عدّ ما صام= صايم و عدّ اللي نصا الكعبه و طاف |
النوم عندي حريب و حالتي شينه= من كثر ما نستمع لاخبار سوريّا الدم يسفحْ و كاثرْةٍ عناوينه= و حنا و لا عندنا غيره و لا احْميّا وبشار بحمى المجوس و روسه وصينه= و حنا نحاور عدوّ اهْناك و هنيّا و الرافضي في يمن لبنان موحينه= يسرح ويمرح و يتْوعَّد بحرِّيَّا و الفرس و الغرب و اسرائيل معطينه= الشيك مفتوح و التوقيع مخفيّا و العالم اليوم كاثرْةٍ ملاعينه= و على العرب ما هنا رحمه و ماويّا يا الله فزعتك ياللي ما تنم عينه= تكالب الشرّ من واوي و واويّا انزل على الشام جبريل بجناحينه= يشيل من خالف الملّه بعلويّا وارمه ببركان حيّ و منصهر طينه= ومعِهْ من الناس من بالشرّ ناويّا المسلم الحقّ و القابض على دينه= كنِّه بجمر الغضى و يديه مَلْويّا غيور الاسلام يا من عيّنه وينه؟= يفزع ترا عالمه ما فيهم الحيّا غنيهم في اللهو داخل دواوينه= و فقيرهم جايع و لا في يده شيّا طال انتظاره و دمعه ماليِّن عينه= عل و عسي للفرج في عالمه جيّا و صِيِّيعهم كنهم في عرض "بترينه"= على بحيرة جنيف و عيشها غيّا و اللي شهر مارس يعيش ب بساتينه= و في شهر يوليو يعيش بجو ماربيّا يالله تجيب الفرج للسنه ف حينه= افرج لهل سوريا بالعيش و الميّا و انزل ب بشار و اعوانه طواعينه= و ببلادنا لا تخلي اللحمه النيّا اللي كبر همهم في حصه و زينه= وساره و مزنه و مريم و اختها ريّا على التبرج يمنِّي خوخه و تينه= و اقيادة المركبه يبغاه قسريّا و هو مغير متسلقي ربي يهينه= و عشاه مسلوق ارانب بالملوخيّا يالله تحمي بلدنا من مجانينه= قدام تكوي عدو بلادنا كيّا و لا تبقِّي لا اجاد و طغمته عينه= في كل ارضك بضوء الشمس و الفيّا و تعز هذي البلاد بنخله و كِينه= و تظلله بالامن و احمه من السيًّا في ظل ابو متعب اللي صان بيتينه= و تحرسه من كل متْزلِّف و غاويّا اللي متعِّب لجمع المال رجلينه= و لو يطلبون البلد بالكاش ما عيّا و صلّوا على المصطفى في عسره و لينه= عداد ما جرّت الورقا الغناويّا |
مجاراه لقصيدة صقر المراقيب اقتباس:
مبروك للإتي تبَروَزْ وثيقه= ارفع له عقالي و لا نيب مجبور و نور اختفى عنهم و ضيّع بريقه= دخل بمقبرة المواهب بلا نور و جاه الفريدي فزعةٍ من صديقه= و معه بحثله من بطولاتنا بذور و ان كان ابو ثامر رجع له بمَيقه= يثبت معه و يجيب للصرح طابور قولوا لنادي النصر يذبح عقيقه= يمكن بعد شِهْريِّه يصير له دور و لياه من فرحته يشرق بريقه= ابو طبيع يعوِّد لطبعه احْدور بكره يبي يندم و يابس شديقه= و يصير جمهوره من الغم مقهور لا يبِّست باكر منابع ارزيقه= يبي يعوِّد للتقاطع، و معذور مهما يكون الهرج وسعه و ضيقه= ما بالوطن الا زعيمين مخبور: اللِّي خدم بيته بخطوه سبيقه= و ارسى دعايم حكم لفهود و صقور و هلالنا، اللِّي بعضكم ما يطيقه= لنِّه عمل له بالبطولات دستور عن المنصّه ما به احد يعيقه= حتى و لو يكبو، "سكب" يرجع يثور و يحط من ورد البطوله حديقه= ياللي لي لكم عقدين ما شفتوا زهور |
من يوم نط الخال
من يوم نط الخال راس المراقيب= صار يتهكّم بالبلاد و بهلها من عقب ما هي كل شيِّن بترتيب= مع "السعوديه" "أباما" عَمَلها راح يتغزّل بالمجوسي و ذا عيب=حطوا خشم أمريكته في وحلها هو يحسب انه كاسبٍ له مكاسيب= ما يدري ان الفرس تتبع مللها ان شغّلوا التقيه سعوا له بتخريب=قولٍ بلا فعل و عن الغدر سلها سياسته خرقا و لا فيه تجريب= خالٍ غبيّ و شايلٍ قلب بلها اصبح تبيعْ و طايع ل"بوتن" الذيب= يمشي على كيفه و ربعه خذلها في سوريا "بشار" قتلٍ و تعذيب= و "بوتن" خذ يدين الكديش و عقلها صارت بلاد "الفرس" تملي المطاليب= و هو ينفِّذ أمرها ما سألها قطع وعد و اضحت وعوده أكاذيب= يوم حشروه "الروس" بيَّن خللها قالوا ندمِّر اسلحة كل تخريب= وصدّق و عين ابليس بِيدِه كحلها هو ما درى ان سلاحهم راح تهريب= شالوه "حزب اللات" داخل احثلها و شال المجوسي جزء ظاهر و تسريب= و "المالكي" خذ حصّةٍ له حملها قالوا نبي نوقف مشاريع تخصيب= و لو دمروا وِحْدَه بعشرٍ بدلها تكفى يبو "متعب" بلا شك أو ريب= ما للحمول ان ثقلت الا جملها طوِّح بعال الصوت لصغارٍ و شيب= و كلمة "جهاد اهل الضلالات" قلها و يجون ما يبغون للموت ترغيب= في خدمة الاسلام للموت ولها حنا ثلاثمية ملايين عِرِّيب= و الدين واحد و اللغه ما جهلها و الارض فيها الخير و المال بالجيب= و الطاقه بسمش البلاد و رمِلها و رجالنا وقت الملاقاة غلّيب= ترقا المعالي بالجديد و سملها وصلوا على اللي جت رسالته تهذيب= للخلق في ارض الله و كافّة دولها |
عيّت عيوني تنام
البارحه عيّت عيوني تناما= مدري وش مقزِّي عيوني من النوم لانيب مديونٍ و لا بي سقاما= و عايش بخير الله و لانيب محروم و ما بين ربعي طيّبٍ المقاما=آلاد زيد اللي مداغيش و قروم بديدةٍ من جاوره ما يظاما= حتى و لو طلابته واجد، و قوم لو حارب عيوني الكرى ما يلاما= من يوم صار اعدا الوطن حولنا كوم اعداً تعدّ الْنا العْدَدْ بالظلاما=فرسٍ، و روس، و صين، تسندهم الروم بمباركة ريِّس امريكا أوباما= من بَعْد بوتن روّضه صار مخزوم بالوهن و الهوان صرنا نعاما= و حرارنا وقت الهدد اصبحت بوم يا سوريا معاد فينا نشاما= و الشرق الاوسط عقب صدّام مكلوم الرافضي وقته بفمِّه لجاما= و السنِّي امعزّز و لهوب مهضوم و ايران مردغ وجهها بالرغاما= و اتباعها من يحتركْ صار معدوم و اليوم صار الرافضي له مقاما= و السنّي اصبح بين جالي و مفروم و حنا بلانا صار كثر الطعاما= مشروع للتسمين، و الحس معدوم على بعَضنا كن فينا هياما= و عدونا لحمه محرّم و مسموم و مبدّعينٍ باللغى و النماما=و مضيعين الوقت عازم و معزوم و القِلّ باني بالرّعيه خياما= و لمليكنا ما وصّلوا عنهم اعلوم بطانته قالوا البلد في انعاما=و من طيبته ساوى مخادع بزيزوم يا خادم البيتين شعبك عَداما= باعوه مِدِّية القَسَمْ باول السوم |
سلام يا شيخ
سلام يا شيخٍ عزيز المقاما= شيخٍ ولد شيخٍ و ربعه نشاما نبدا بذكر الله خير الكلاما= و نثني على اللي جوا و لبّوا العزيمه تجمّعوا من ربع و اقراب و اصحاب= و لقوا من الداعي ابتسامه و ترحاب نسيب و بن آخي و لا فيهم اغراب= يا الله عساها نعمةٍ مستديمه جينا لدعوتك و قطعنا المسافات= و لاهي غريبه دعوتك يومها جات سوّيتها و الناس لبّت بما فات= الطيب بالمسعود عاده قديمه الطيب اخذته من هل الطيب ميراث= تحكيه للي يجهل العلم الاحداث و هذي حقيقه ما بها زهف و اضغاث= و اللي جحدها مرتكب له ظليمه في ديرةٍ الطّيب عاده و منهاج== امن الحديثه لين تاصل للافلاج و من غرب تنّومه و شرقٍ الى ثاج= تلقى كرم و ارجال نخوه و شيمه الله يديم الامن و تزيد الافراح= و عسى غيوم الشر و الغدر تنزاح و الغيث يعقبها صباحٍ و مرواح= بالصبح نهّابٍ و بالليل ديمه و يصير جوّه معتدل ماش طبّاخ= و الارض خضرا ما تغطيها الاوساخ يسعد بها ركّاب شاصٍ و مايباخ=و يُقضى على راع الجشع و الجريمه يا ديرتي دار السعد دار الامجاد= اللي حموك اهلك من آباء و اجداد ياللي لبيت الله و قبر النبي امهاد= لا تسمعي كثر اللّغى و الشتيمه انتي لنصر الدين و الخايف انقاذ= كم واحدٍ من ظلمة الجهل بك لاذ و لا ذمِّك الا واحدٍ جاهل و شاذ= يسمع كلام اهل الردى و النميمه ياللي حميتي سمعة الاهل و الجار= و اكرمتي الوافد بعقدٍ و زَوّار مهوب للسمعه و لا لفت الانظا ر= رضاً لربّ البيت، رجوى نعيمه يا الله عجِّل لاهل شامك بمخلاص= أيِّدهم بنصرٍ مؤزّر لهم خاص لهم قصّةٍ تصعب على كل قصّاص= يا رب تنصرهم على ذا الصتيمه الشام اصبح من سبايبه انقاض= ما احدٍ بعَد ذا الحرب رابح و معتاض ما فيه غير الموت مع هتك الاعراض= و الناس تاكل من صحون الوليمه يا رب سهِّل له على الراس مخباط= يطش راسه لو حماه بمية غاط لنّا شبعنا من وساطات و هياط= متى نبي نلحِق لابوه الهزيمه؟ عنقه طويل و له عويانت جِحّاظ= يا ليت من يركي ارقبته على الفاظ و يعطيه فوق الفاظ ضرباتٍ اغلاظ= و يموت مثل الشاة موته أليمه و يجتمعوا العربان من كل الاصقاع= و نوحِّد الكلمه على كل طمّاع و نزيل عن جسم الوطن كل الاوجاع= و الكل ينفذ ،لاجل يبني، بريمه و نحمي بلاد العُرْب عن كل ولاّغ= و دستورنا القرآن مهوب ينصاغ و لون الخريطه واحدٍ ما هنا اصباغ= و نصبح كما كنا بدوله عظيمه و لا هنا للغرب سُلْطه و لا احلاف= كلٍّ له حقوقه و لا بينّا اخلاف و لا نقضِّب مالنا لابن عسّاف= يديرها رجّال حَسم و عزيمه و فيها نساوي بالبلد كل الاعراق= و لا نفرِّق بين تاجر و حلاق و بدينّا نعتزّ و بعال الاخلاق= و لا نفرِّق بين قصرٍ و خيمه ما فيه عشوائي و لا فيه أكشاك= كل البلد تصبح بيوته لملاّك و لا فيه إقطاعي و لا فيه شَبّاك= و كلٍّ بداره له كرامه و قيمه و نصرِّف امور البلد هي و الاموال= ما فيه تبذيرٍ و لا فيه إهمال و كلٍّ يجَازى حسب فعله من اعمال= و لا نقوِّم بالفتن كل نيمه و نعيش في نعمه مع خير حكّام= و نحكم بلدنا في هدي خير الاحكام اللّي يفصل دينّا دين الاسلام= و ندحر بليس اللي بعينٍ كريمه تحت قيادة ابو متعب كحيلان= اللّي بهام المجد له موقع و شان سليلة امعزِّي موحِّد ذا الاطان= و عدوّنا نِجهِز عليه و نظيمه من منطقة عرعر الى قرية الفاو= كل البلد خضرا و لا به غضن ذاو و لا بقاموس البلد لامٍ و واو= و لا احْدٍ شكا للشرع ماقف غريمه و لا به ربا و اللّي نحصِّل حلالا= و لا فيه ظلم و عايشين بعدالا و نصير للي حولنا اطْيَب مثالا= و الدّ اعدانا يذبّ الخريمه وصلوا عدد ما قدموا قهوه وشاي=على النبي اقول في كامل قواي وردد معي صلاه يالرايح الجاي=على النبي وصحبته مع حريمه |
اقتباس:
اضافة احرف سقطت سهوا |
الساعة الآن 12:47 AM |
Powered by vBulletin® Copyright ©2000 - 2025, Jelsoft Enterprises Ltd. Designed & TranZ By Almuhajir