|
هبت رياح الحزن في يوم الافراح
هبت رياح الحزن في يوم الافراح = وساقت مزون افراق وقت احتفالي واخذت محاصيل العمر جهد وكفاح = قدام عيني وبل الآلآم سالي اشواق غرقت يوم حظي بها طاح = وصار الجفا شمسي ونبته ظلالي يوم الذي عينه بها كحلها ساح = لحظة تبدل حال مما جرالي ماكنت انا الجاني ولا كان ذباح = غصن السعد مقتول من بعد مالي كان الكفن صبري بعد ما القبر صاح = وعجزت لا اوجّه عليه السؤالي لا راس مال ولا مكاسب ولا ارباح = ولا امسيت به قلبي من الهم خالي هذي مخاسيري بعد برقها لاح = والله يهون مقبلات الليالي |
ماردني عما طرابي وباغيه = غير الوعد واوفيتبه لاجل خاطرك صبرت عن ذاك الثمر جزم لا اجنيه = لو كنت آناظر فيه لحظة وآناظرك وسألت عقلي قال واجب تداريه = وتحفظ حقوق و واجب إنسان زايرك لولا الثقة والوّد ما كان يطريه = يقضي معك وقته قبالك يسامرك وسألت قلبي قال شوقي يناديه = وقلبه معك في كل حاجة مشاطرك قلت إسمع لعقلي ولاشي تبديه = واتبع لما قاله وأنا أكون شاكرك وطبقّه للي يعزك وتغليه = واعرفك صافي مثل ماني بخابرك غير الوفا والطيب لاشي تنويه =جاوب وقول ابشر انفذ أوآمرك ماشفت يكفيني وماشاف يكفيه = ولايختلف باطنك عن شكل ظاهرك وإن كان عندك علم ياليت تخفيه = ياقلب وإن تخطي عن الرأي عاذرك هذا شعور اللي صدق يا موافيه = لحظة لفى واستقبلنه مشاعرك |
صباح يروي من سنة ما طعم ما = ويجبر كسير من الوله عاش منصاب للي على حبه ابعثر والما = مايحتويه القلب بفراق الاحباب اللي شغل فكري وانا اقول لما = اشوف زوله لذة العيش لي طاب مايدري إنه سم الانفاس سما=ولا يحتمل شوقي ملامات وعتاب جم الغلا في مُهجتي له يزما=جليد همي من بعد عِرفته ذاب انسى معه كل النكد والف هما=اثر الهوى ياهل الهوى صدق غلاب قرايب اهله لو تحدثت عما=يحويه قلبي صفقوا له بالاعجاب هو نورعيني لو درى دونه اعما=وهو من سكن في نونها دون الاقراب ماهو قريب اللي على القلب هما=ولاهو غريب ومنتحي ضمن الاغراب كلمة حبيب مناسبة له مسما=وهو اللذي في ناظري دوم جذاب ماهز وده كل من جاء ينما=باقي على عهد المحبين لو شاب |
انا مابيك تاخذني على مركب هوى رجواي = انا ودي معي تبحر على مركب هوى آمالي انا بي انتظاري طال لكن باقية هقواي = على ذاك الشعور اللي يجيبه شوق مرسالي لكن ياللاسف دايم مروح يوم انا له جاي = على كثر المقابل بيننا يقفي على اقبالي انا لو بتبعه حظي على عكسه يسوق خطاي = يجي بالعرض لو الدرب يمه راح طوالي تمنيتك تبادلني شعوري منيتي ومناي=ولكنك مخالف والبطى منّك برأ حالي حبيبي ياوّله فيني بك اوتاري وعزف الناي= جروحي ماتداوا غير منك وغيرك محالي وانا مهما يطول الوقت ماغيرّ معك مبداي=على لحن الوفا والعز غنيتك بموالي انا ما ودي إنك بالخطأ تسهد جميع اعضاي = ولاودي مجاديفي تّكسر وانت غربالي ترى يكفي ثلاث سنين متحمل عنا بلواي = تحملت الحمول وفيك مشغل فكري وبالي |
جدايد افكاري ابهديلك كتاب =واخترت له عنوان (هـذي هديتك) صفحاته ايامي مقسملك ابواب = اقرأ وبه حاول تنمي ثقافتك حاول تسلى فيه لاشفت الاتعاب = يمكن تلاقي قصتي شبه قصتك فيه المعاني تحتوي شوق وعتاب = لو كان جاتك راحتي عكس راحتك طاب الزمن واحيان لاشك ماطاب = وقتي 0ولاطابق ثواني دقيقتك من خاب في ظنك ومن فيه ماخاب =في صفحة ايامي وشابه مصيبتك شوف المعاني رمزها يقفل الباب = لاصار مفتاحه نهاية قضيتك تلقى الحروف اللي بها نآظري شاب = إسهر بها في لحظة احزان ليلتك وحاول تذكر من صدق لك فالاصحاب = ومن هو تخلى عنك في وقت ضيقتك ومن هو تسمى باسم حصري للأحباب = وشفته يبيعك مايقدّر مودتك والخاتمة لو نالت سطوره إعجاب = في نهايته فهرِس بداية نهايتك |
ياراعي الكلمة بحكمة بداويك =سدي منيع ولا يشقّيك سدك عطني مقاصيدك وبيّن طواريك = قدام لا تلقى من العلم صدك لاللرخوم اصحى علومك توديك =ولدربنا الهيبة حذاري تردك ابعد عن اللي فالمواقف يخطيك = و وقت الرخا يده تلاصق ليدك لاشفت بعض الناس بالهرج يكسيك = تراك عاري للمهاليك حدك بالفعل لا نفسه ولا انته بيحميك = ان جيت دونه ادرق عنك سدك في وقتنا ضحكة تغُرك وتغريك =لا اقبلت في صفك ولا اقفيت ضدك هذا الذي عندي واظنه يكفيك = واليا غويت الدرب بك ضاع رشدك |
لا تشتكي لو كان بالجوف عله =ياللي تقول بغيبته كم فقدناه العين بير ودمعها لو تهله = تجم مهما من بحرها نثرناه غيرك مشى بالدرب ماقال الظله = وتاهت دروبه بعد ماشاف فرقاه عاش وشرِب مُر الغرابيل كله = وزاده من العلقم زمانه ولا ابكاه معه الصبر صابر ولا يوم قله = إن الزمن جاير وخِله تناساه والحظ متردي مع الوقت ذله = لو بان لعيونه حلف ليتوطاه الوقت مازلك ويصعب تزله = وما كل زرع ليا زرعنا حصدناه اللي بقى فالوقت لو تستغله = فالحاضر وماضي قضى لا ترجاه فكر وصب الكيف فنجال دله = وخل الهجوس تميز اللي ذكرناه اما قدرت الحبل عقده تحله = والا عقدته فوق ما احنا عقدناه |
بك ماقسيت وقبلك الوقت قاسي = ادركت مالم فالزمن تدركونه لاجلك فلذة كبد لا تكون ناسي = ماغيرك اللي ترخص الروح دونه توّك على الدنيا بها ما تقاسي = وعن مُرها حطك بداخل عيونه اللي معه لعبتّ سباق الكراسي = وهمومها الكرسي لها يسحبونه قرأ العيون وللخواطر يجاسي = اللي بكم ماخيب الله ظنونه ماهمني في باقي العمر باسي = همي لكم كيف السعد تملكونه ياكم باللي راح ابحر مأسي = على شواطي همّ ماتعرفونه ياكم صعيبات الزمن فوق رأسي= ترعد ويركِز وبلها من مزونه ودام الامل بالله علا فوق ياسي = ومعه الرجا مشاعري يحتوونه بثبي كما تثبي هذيك الرواسي = وشي انكتب بكتابكم تاخذونه واعداد مافالكون يمشون ناسي = على النبي صلوا واجر تحصدونه |
مايوم فكرت اجرح إحساس غالي = وانت الغلا كله ولايمكن اجرحك لكن تعال ان كان عندك مجالي = قدام تخسرني بعد جيت بكسبك جاوب سؤالي وستمع في سؤالي =ودي اعرف آخر محطة برحلتك بيني وبينك سابقات الليالي = اللي بها عندي تعلتّ مكانتك حالك جعلته سابق الوقت (حالي ) = إن مارفعتك يوم لايمكن اطرحك جيتك وابى كلمة ويرتاح بالي = وإن قلت محرجني فلا جيت بحرجك وإن قلت عن مابي فمالك ومالي =ما غيرت عندي مكانتك كلمتك اما مصير اعيش به فيك خالي = والا لقيت بوجهتي درب وجهتك يعني جواب وفيه حبل الوصالي =والا وداع وترسمه لو بنظرتك |
ياراسم الواقع بصورة خيالي = ابدعت في تصوير واقع رسمته ماعاش مخلوقٍ من الهم سالي = السر في نفسك لوحدك عرفته مهما الزمن يرمي عليك الثقالي = الوقت لايثنيك دامك شكرته لا تنفهق لو شفته الحمل مالي = الكسر مايجبُر ليا ما جبرته تحل حبل وتنعقد لك حبالي = مثلك يحلحلها على ما خبرته خل الامل نورك لدرب الوصالي = الدمع لا تشكيه مهما نثرته يجيك يوم وبه تلاقي مجالي = ويبوح بأحساس المحبين صمته ولا ودي تقول المدى حيل طالي = ابطى الامل بيه بعد مانتظرته |
ادري بتقصيري حوى الصدر داره = وإن العفو لاهل المكارم شهامه لكن مدري وش صحيح العباره = هي تنطق والا برمز وعلامه اعلم بأن الربح عكس الخساره = ولا احدن على نفسه يدوّر ملامه ولا اخبُر بأن الليل يسبق نهاره = واعرف بان اللحم يكسو عظامه وعلمي طريق المُكر ماهو شطاره = وإن الضعافة تعتزي بالرخامه وحليم حلمه من صفاته وقاره = واليا غضب اخشى لرمية سهامه واللي سمع واصدر بحُكمه قراره = يبطل من اللي شاف مجمل كلامه تبقى الصداره مركز اهل الصداره =ويبقى الهلامه لونفخته هلامه وقالو تعرف رجال عندك تجاره = وتجارة الاموال مع روزنامه وإن الفقر فقر العقل وافتقاره = فكراً يعلي هامته فوق هامه خبير بأن العمر تاره و تاره = والرجل باخلاقه يعلي مقامه وإن الزمن لابد يعكس مداره = وإن الرخا لو طال إنسى دوامه |
مدري عتبنا فالمسار يسير عكس الاتجاه =والا الدقايق عكسها فالسير من عكس المسار ادري رصيدك في حسابي مودعه مابه خفاه =ومودع رصيدي في حسابك تحجبه شمس النهار ماشفت كشف حسابها ماشافه الا من قراه =إن كان فيه كتابها مكتوب من دونه ستار تشعبت بي الدروب وبينها حذفة حصاه =حذفة حصاه الفكر فيها تاه مدري كيف حار حاولت لكن ماقدرت اطويه والحِق به مداه =يطوي على قُربي معه بُعده من الخطوة ديار كني كما اللي لا رفع يدّه تلامس به سماه =تفسيرها بالمستحيل اسهل من اداة المشار وماكني الا لا نظرت الطرف قدامي لقاه =بأسرع من الكبريت بالبنزين لا ولع شرار طالت بنا الرحلة قبل ناصل وتاصل منتهاه =رحلة عمر تحمل تذاكرها معك فات القطار حتى رصاص المعرفة حبره على سطره محاه =كل ما نصب حرفه يجيه المد في جزم انكسار مدري عن الجرح العطيب القاه والا القى دواه =حتى يجي منك الخبر انا عليّ الانتظار |
انته على ماذا تقرر كهذا = لاحرّج الدّلال لبيت له طوع حرجّ ونادى لك وجيته تهاذا = مجلسك ساسه من ورق هش مصنوع ماذا اللذي في خاطرك قول ماذا =بدون لا ترسم علامات و دموع الرمث جن وهن ما اخفى وحاذا = حذَوه ولو كبد السما مابها جزوع صلوا جموع بأمر تم اتخاذا = فيه القرار ولاتسموا به جموع انقذ شعاع الشمس كونه نقاذا = من تربة ارض وجف للحسد ينبوع لو ينصهر صلب الحديد الفولاذا = يبقى حديد اسمه من الصرف ممنوع انت الذي معروفنا فيك لاذا = وذاك الذي في داخله حقد مزروع تساوة الكفة لهذا بهذا = وميزانها بين الموازين مصروع في مجلس البلده طلعتم شواذا = وشذت قوانين ومفاهيم ذيذوع بكل من يهذي 0بربي عواذا = لا اتبع هوى الجاهل ولامنه منفوع ماله بعد بنيه تهدم نقاذا = غنت عليه البوم والدرب مقطوع اللي توذا من فعل يوم ياذا = مرفوع عن تهمة هل الشر مرفوع ويبقى الاإله ولا لغيره ملاذا = نلوذ به يوم الدعا منه مسموع |
آسف ولا تسمح ظروفي ثواني = والا الدقايق دونها باب مقفول للآن منها ما انقضى كل شاني = مابان في بحثي بها نقطة وصول كل ماذكرت القى زماني نساني = وكل مافتكرت وقلت له قال مشغول امشي معه لو كنت بالحيل اعاني = ويمشي بعرض اليا لقى مشيتي طول غيرت قلت احداه دامه حداني = يمكن معه لمواجه الوضع مفعول لكن عكّس اللي توقعت جاني = وعن ماسبق وراني الهم والهول فأكبر مصيبة لا نصيته رماني = ويعقد مشاكل مالها عندي حلول حظي مع الماضي وحاضر عصاني = جندي خفيّ فيه النحاسة ومجهول عرفت كيف إن الفرح والتهاني !! = في خارطة مستقبلي مالها وصول ياليت لو تسمح ظروفي ثواني = وللقى الدقايق دونها باب مقفول |
صارت علومك بيننا ياصاحبي مابين بين = مابين عدل وبين ميل وبين حَبكّ وبين سَبكّ متناقضة متعاكسة لاهي يسار ولا يمين = ماهي كما ماكان خُبري فأول الايام بك خل المسائل بيننا متوازنة حنا اثنين = اللي حسبته حاسبك لاتحسّب انه ماحسبك انا على وزعة وقيمة حبلها باقي متين = مابيننا وانته بها تغلب وعقلك ماغلبك اعلم ترى بعدين ماتقضي بها للناس دين = خذها نصيحة صادقة قدام تُقدبه حطبك لاشفتني بالراس عين اشوفبك فالراس عين = لاجيت تصرفها ذهب لاتصرف الا من ذهبك لاتغُر من دربك وترجع ماتعرف الدرب وين = ويضيع علمك قبل لا بالمعرفة تفقد ادبك ماشال قلبي للرجال اهل الوفا الا كل زين = وانتا عتابي كان منهم تقبله واقبل عتبك ماني من اللي لا بداله شين اظهر علم شين = وغايتي لاشك هذي غايتك بي وطلبك قالوا ابو نية غلب لا قابل ابو نيتين = وقالوا ابو وجهين ابعد عنه لاشفته قربك |
ياحي هالشمعة بها نورّ الدار = وبها تزايد شوق لهفة حنينه يوم الزمن غُربه بها طُول الاسفار = فيها الشقى يفرح بنا محتوينه كل ما نمد يجد فبحوره اعصار = لكن شطه بالعزم واصلينه معي المودة ضربها سيف بتار = يقطع بحده روس فقرا سنينه قلبي بصدق الودّ ما غيرك اختار = ويعيدها بالصدق لمصدّقينه اعطى ولا فكر لما اعطى ولاحتار = ويبقى الوفا في حق مستاهلينه قطّف من ورود المحبة لك ازهار = على الطريق اللي سوى قاصدينه معه الغلا ويقدمه لك تذكار = لحظة يدينك ماتلامس يدينه |
السلام عليكم
كل عام والجميع بخير حبل الوصل لولا الوصل منبعه طيب = ودربه وفا ماسكّته رافقتني حتى تصل صاحب وتصل الاقاريب = لو كان رحت وناس مايوم جتني إن قلت فالاقراب والا الاصاحيب = لاخاب شوفي نظرتي خيبتني بالشَين في من لايعرف المواجيب = لاجيت صد وخطوته مالفتني منصى الرجال رجال روس المراقيب = اللي بهم ماخطوتي ريضتني الطيب يجزى ياهل الطيب بالطيب = ماغير سودان الوجيه اجحدتني معروف ساسي ماوطت رجلي العيب = بي هامتي فالناس ماطمنتني لي ماقفي لوكان عند الاجانيب = كم ديرة من صيت ابوي احضنتني من عزوةٍ تارد عذوب المشاريب = مدت يميني بالوفا عرفتني لجلي ولد ذيبٍ ولي هيبة الذيب = ولي منزلة به قدر عالي عطتني من رب عبده بدعا معه ميخيب = انا اشكره لا نيتي به هدتني على دروب اهل الوفا لين ماشيب = يالله ثبت خطوتي لو نحتني لاهل المروة عند اهالها مطاليب = وارخصت من لا فالعرب قدرتني صحيح علم الغيب في عالم الغيب = لا قلت صدمات الزمن حيرتني يالله ماغيرك مع العبد ومجيب = ترفع مقامي عن وجيه اخذلتني هقوة تصيب وبعض هقوات ماتصيب = واللي من الله صايبة ماخطتني |
داخل عليك الله وجاتك مطاليب = لفراق باطل فُرقُته حق فرقاه وتكفى طلبتك لا تسوق المناديب = والا تجر عواك وذياب تقفاه ارتاح لاتنشد عن الذيب ياذيب = لو طال بك وقته مع الوقت تلقاه دام الوفا مرسول ودّى لك يجيب = ياخذ ويعطي طيب والطيب بقاه في درب 0 عزه ماحوته التجانيب = عن وطيةّ وحوش الغداري توقاه يقبِل ولا يقّبل على اقبالك يخيب = طيب الوفا يبقى وطيبي 0تلقاه صدري بعز ولا تخلطه تراكيب = اللي رفع قدره علابه ورقاه تبقى القلوب الوافية تذخر الطيب = دام القلوب الصافية طيب تنقاه العلم وديته بروس المراقيب = كانك هقيته هقوة طويق ترقاه في قمته تلقى به العلم ويصيب = ويسقي ظما 0سقا الشقا لين شقاه وتلقى تفاصيله على الحق ترتيب = فاللي تهقويته وجاء عكس تهقاه شمس الحقيقة غايبه فيه وتغيب = ولاتندرق عنا على كثر دُرقاه من بعدها مابين حاسب وحسّيب = تصدُر ويصدُر ماتوقى ويقاه |
قبح الله وجه منهو فالعرب يقدح زناده = لوتسمى في بحور الشعر يغرق مايعومي علته علة وقلبه بالمرض بالحيل زاده = مثل عودٍ كل ماجاه الهوى يلعب ويومي مادرى انه بين خلق الله تقلد له قلاده = هو زبون الناقصة بين الرجال اهل العلومي مانذم ربعوه اللي للوفا حكام ساده = مير مانقبل من الناقص تجي زلة تحومي حرته حرة ونبته وإن طلع وانه كتاده = دايم الواطي يعيّب فالرجال اللي قرومي مادرى انه في ذراهم يوم كبرها الوساده = عزوةٍ ترقى سنود ولاتحسّب للرخومي ساسهم ثابي ودار العز حكامه وقاده = يوم ذاك المدرق يقعد ولا يقدر يقومي لاحسبنا له حساب ولاكشفنا ثوب غاده = نستر الخافي وذاك الاش عن سومه نزومي ولا نظن الا بخير وعلم مانعرف وكاده = مانجيبه والزرا راعيه عن دربه نشومي |
ذكرتني ياعيد باللي لنا عيد = ماجيت قط بدونهم وين كانو من وين ما كانوا معك شوفهم عيد = ما مر عيد وفرحتي فيه غابو الناس فرحت بك وانا حزني يزيد = ذكرت لاجوني معك وش جابو فوجودهم حزتك بذات تحديد = افراح عشناها والاشواق طابو فيني سعادة غامرة مثل مااريد = وعيون يسلا شوفها لاتلافو وقلوب تبني فالغلا دوم وتشيد = واليوم واعزاه منا تلاشو تبدلت باحولنا احوال تنكيد = عفنا بلايآهم والايام عافو لاشفت بك ياعيد من لابس جديد = اطرو وفي فكري مواقف تخاوو وقامت بي الذكرى على حالي تعيد = وسهوم فرقاهم بصدري تهاوو وسد الدموع انهد وسالت بتهديد = بعيون وسط الحاضرين يتباكو يالله بجروح الملاهيد تضميد = اللي بهم في حزة العيد زادو واجعل لمن غابو بجوف الملاحيد = رحمة بها في جنة الخُلد عاشو وعداد ما فالكون شفنا وتاكيد = صلوا على المختار يامن تهادو |
بعد اختلفنا نتفق لو ماتفقنا نختلف = طبع العرب ماتتفق الا على لن نتفق لو ماعرفنا نفترق ما بالمفارق نعترف =قدام لاجمر الغضب يوقد وجوفه نحترق يكفي عشقنا والعشق لو غر دربه ينحرف =فينا الهوى ماينفهق لو كل بقعا تنفهق لو كان قلبي تنشده عن واقعه مايرتجف = تلقى الحقيقة واضحة في داخله ماتختنق ماكان ودي عالمي 0 معاك فجأة ينجرف= لما ظنونك شفتها في وسط عينك تغترق وفيت ودي محتمل فقرك وعيشتك ترف = أخلصت لك ماملت وافي ليه فكرك منصفق نسيت قدري عزتي كأن دايس لك طرف=شيل البلا اللي ساكنك واحذر قبل لانفترق هذي نصيحه والنصيحه ماتخسّر من صرف=تبقى معه والصايبه في حوزة اللي مستحق |
فيه بعض الناس يلقى حلها بالمستحيل = بعد قسمها وهي في جمعها حله صحيح لو حسبها صح يطلع كثرها عنده قليل = ولا استباح الخانة اللي فارغة مهب ريح لو يشوف إن الثريا ماتجاهلها سهيل = لابقى في خافقه جرح الزمن 0 مايستريح المسافة مادها حسب ارتفاع العرض ميل = والرقم حسب الطلب لو العدد زوده يطيح لو سجلاته اخذ منطوقها حكم ودليل = ينفي اثباته ويثبت مانفى امره صحيح لو يحط الحمل مرة 0 عشر لابده يشيل = في طريقه لو تركها يلتقي صبره شحيح لو يميل الاصل ظله ما اعتدل لازم يميل = مانقول المدح ذم ولا نذم اهل المديح المعامل عملته تبقى على حسب العميل = والزمن ما كل مرة فالعمر فرصة يتيح |
الله بذكره نبتدي والله بذكره نستعين = الحمدلله بعد عام العيد عاد ولمنا بنات فكري لابسات حروفها الدر الثمين = تاجي بجزلات المعاني ماتخيّب ظننا يامرحبا ترحيبةٍ تمشي على ملة ودين = تعمكم يامن حضر بفراحها وتعمنا الله على صفو القلوب يلم شمل الحاضرين =اللي بهم في كل عام يزين محفل جمعنا لكم التهاني واجبة فالعيد ومن العايدين = شوفتكم الليلة بها تزداد فرحة عيدنا حنا الحجورة ساسنا ثابي على مر السنين = الآد حجر وقسمنا فالاوله من جدنا تاريخنا ماينجهل وان كان به متجاهلين = الجهل ماده بابهم ونصك دونه بابنا اطباعنا على الوفا مانستمع فالناقصين = الناقصة من جابها عود بها في عرفنا والعرف وان قلته لكم ماني بسيد العارفين = بين العرب حنا الحجورة مانضيع دربنا والسارحة من دون راعي مالها حزة وحين = تلقى حلال تخالطه على حسب مفهومنا الطيب ياهل الطيب يبقى فالرجال الطيبين = وحنا على طيب النبا دايم نقود عزومنا وختامها يالابتي ياعزوتي في كلمتين = صلوا على المختار والمعذار دون قصورنا |
ياكم شفنا العوق من غير عايق = واليا سألنا ليه قالوا مقادير كم من مرار الوقت بالذهن عالق = وكم صَفتّ هموم الليالي طوابير وكم تنعم الانفاس والجو رايق = لاجن نسمات السعادة مسايير وماتلبث امواج المتاعب تصافق = وتقضي بنا بين المخاطر مشاوير والفكر يسرح والخواطر تضايق = ومابينها الاعوام تضرب تداوير لاجاك ذا ضايق وبك ذاك بايق = مابينهم تفقد صحيح التعابير لازم بعيد ارحل بليا مرافق = أنا وروحي والجسد والتفاكير وادرس مدى جدوى هجوسٍ تلاحق = وآخذ من كنوز القناعة تدابير وما استوفت شروطي عليها بوافق = وعن ماسواها بحتمي بالمعاذير ومهما مكاسبها عليه تسابق = دام المدى قُصره يسوق المحاذير ماهي على ماجيت لاجله تطابق = يكفي عنا فاللي سبق من مخاسير |
جيتك وانا اقص الآثر ياللي الاثر محبته= جيتك وانا حافظ معالم رسمتك حسب الخيال نحيل في خصرك وريان القنا من بسمته = تخضع لها هامة رجال وتختلف لهجة رجال امشي على رسم الخيال اللي شبيهك صورته = كن العيون رموشها منها فيافيها ظلال جيتك عجل ماجيت لي قلت المتاعب ردته =كن الاماني في حضورك وصفها صعب المنال جيتك لجل شوقي يطالب من خفوقي فرصته = جيتك طموح وقصتي عانت معاناة القتال عابر واماني لهفتي تمشي وّله لمودته = مقبل على ريحة عبير الوصل واحلام الوصال كانت مسافاتك عمر 0 صحيح حيلي هدته = وارسم علامات العنا في فهم كشكول المحال جيتك وانا فرحان فاقد فالمقابل فرحته = جاه الحزن في غفلته وانهاه ابسط من سؤال |
لا يا حـروفـي جملـيـني واعـتـلي قمة سهيل = عـسـى المـسـافـه تـقـــترب باللـي تـعـلا قـمـته ماظنتي إنك تعلي صعب والا مـسـتـحـيل = لجلك بتـنصين الصعـيـب اللي رفـيـعـه هـمـته ولـه السلام توصلينه مـكـتسـي بك ثـوب هـيل = سـوالـفـه طـيـب ووفا نـوماس يـبـدي بـسـمـته على صحيب المرجله عساه فالظـل الظـلـيل = وطـمـنـيـنـي يا حـــروفـي بـعـد رحـتي يـمـته حيثه من رجال الوفـا دايـم وكسـاب الجـمـيل = ولا يـنـقـص حقـوق الرجـال انسان يبري ذمته اقولها فالصاحب اللي ما حسب قـايـل وقـيل = يـمـشـي على وضـح الـنـقـا يـوم المراجل عـمـته عـزيـز جـاه وحـاز قـدر ومنزلة شـديد حـيل = روس الصعاب يخـمـهـا ما قـيل جـات وخمـته من ساس ثابي بالمعـزه صـرح نايـف ما يـمـيل = ربـعـه بـنـي لـحـيان تاريـخ وفـعـايل ضـمـته على الشـجاعه والـكـرم والحق ما عنه تحـيل = قـبـيـلـته عاشـت وفـاء لـيـن ارتـوت من جـمـته الـعـِرف والقانـون مـبـدأ يـنعرف في كل جيل = هـذيـل سـاس جــدودهـا عـنوان شـامخ سـمـته ذا صاحبي لو امدحه مالي على مـثـلـه سـبـيل = بيني وبـيـنه ما يفـوق حـروف شـعـري زمته ابو مـنـى له قـدر عـالي ما حـوى مـثله مثيل = قـدر الاخـو عـنـد الاخـو يــوم الاخــوه لمـــتـه يا بن خضر موفيك بالابيات يالسيف الصقيل = كامل حروفي بالشعر ما اظن قـدرك تـمـته لكن يبقى في صـدور رجال قـدرك لـه تـشـيل = اللـه يـديـم الـطـيـب دام قلوب فـيها نمـته تمت وصلوا عــد مـاســيـلٍ على البيدا يـســـــيل = عـلـى الرسول الهاشمي اللي شــفــيــع لامــته |
العيون عيونك اللي ديرتي واسكنها = يوم لي ديرة وعزوة مثل مالك ديره قلتها واليوم لعيونك ولك بعلنها = من خفوقي لجل اريّح خاطرك لا أثيره روحك اللي من عذاب الوقت لي طمنها = وقلبك اللي آسره خوفك وجب تحريره من هوى نفسٍ تعاني والهوى ماكِنها = والمشاعر فاقدة ودٍ بها تصويره بالخفوق وخانته بالود ماهيمنها = عاش بين الوصل والحرمان في تقديره الحقايق لك هدية جبتها دونّها = انت حبك بالفؤاد وحاكمه وتديره المودّة يالغلا لك بالوفا عنونها = ثابتة ماتختلف لو الزمن يطري بكم تغييره بشر احساس المشاعر كان لي تظمنها = والعقل خل الفكر يمشي على تدبيره والعلاقة الصادقة من نالها ثمنها = الغلا ماكل واحد يمتلك تسعيره والمعزة لاثبت بقلوب ماتشحنها = طيبها يطغى على جو ابتدأ تعكيره وإن لقت في دربها شوكة عضا تدفنها = والطريق تجنبه راس الخطر وتسيره |
السلام عليكم ورحمة الله وبركاته من تردى بالوفية بار والبابور زله = ومن شرى مايقهرا بالطيب سوق الطيب غالي المعاني في سنعها من جمعها شاف دله = والمراجل من صنعها ما ابتدعها بالخيالي الشجيع اللي رفيع وله صنيع العمر كله = إن وردّ فأول عدد وليا صدر ماجاك تالي كل صامل مايجامل لاحضر ماخاب فعله = عاش عز ولا يخز وموقفه موقف رجالي كل عارف بالمعارف ينهي الفتنة المطله = فيه رأي ويستشير وكل بير الها حبالي من تعرّف ماتصرف للقبيله صار خِله = إن هرج علمه عوج والصمت من مثله مُحالي العقل نعمة من الله والفكر مَيزه وظِله = وكل عقل و مَيز فكره فالخفاف وفالثقالي والحياة دروب والمكتوب وش كثره وقله = كم طعمنا من مرار وكم شربنا عذب حالي والليالي ماعرفنا سودها واللي تذله = علمها فالغيب والايام ناتجها الزوالي حال واقعنا ذكرنا والخليل يقود خله = باقي المنطق ومفهومه إجابة للسؤالي كم كسبنا ؟ كم خسرنا ؟ كم خطيّه ؟ وكم زله = كم حصدنا من حرام ؟ وكم جنينا من حلالي كم كِذبنا ؟ كم صِدقنا ؟ اذكر الماضي وفله = كم حسدنا ؟ وكم حقدنا ؟ كم وادي سيل سالي كم سيف بغَيبة الاصحاب بالغِيبه نسله ؟ = وكم صداقه فاللوازم حبلها ماجاك بالي واضح المعنى 0 ومعنا مايداوي كل عله = والعلاج اللي يشافي سهل مايبغى جدالي والختام عداد حبات المطر لاهل وبله = الصلاة على النبي المصطفى في كل حالي |
ماحترت بك يا سلوة الروح بيه = ولا ادري متى ترتاح بالود وتروق ولا اقول بك في جو الاشواق سيه = كتبت لك صدق الاحاسيس منطوق لاتـقـول مــا اصــدق بوقـعـه علـيـه = ما حازها غيـرك عسـى روحـك تفـوق انت النَفسّ فـي كـل صبـح وعشيـه = ماشاطـرك فالقلـب بالنـاس مخلـوق مــن واقـــع عـــروق الـغــرام الـنـديـه = بإحساس قلب اختارها كامل الذوق الـــلـــي مـشـاعــرهــا نــقــيــه وفـــيّــــه = واللي ظماها شوق من زايد الشـوق فـيـهـا جــنــون الــحــب وردة زكــيــه = مهمـا الزمـن بالغربلـة زادهـا عــوق تنـزل علـى الخـافـق كـمـا الجاذبـيـه = وفيهـا المشاعر ساميه تـرتقـي فــوق مصـاعـب ظـــروف الـزمــان العـتـيـه = مـا اصـد لـو مابيننـا طـوقـت طــوق هــــذا شــعــوري جــــاك ياالـنـرجـسـيـه = كـنـه سـحـابـة كـلـهـا رعـــد وبـــروق |
مسامحك لجل الغلا لك مدعوم = من قلب حطك فوق فأعلى مكانه ماني بنا الظالم 0 فيما قلت مظلوم = انته 0 وانا الظالم وتسكن جنانه لو عشت فالدنيا معذب ومحروم = منك انت ماتفرق ولا هي مهانه اموت فيك ولا انثنت لي بك عزوم = اصبر ولا احملك ظلمي إدانه كل ماتقوله في نظر عيني غيوم = ماتلتقي به داخلي دوم خانه حبي معك صادق ولا كان مزعوم = وساسه قوي ياللي شقى من لسانه فل الحجاج وفي سما خافقي حوم = والقلب روّه من سحايب حنانه ماودي إنك عايش الود موهوم = من عاش فالاوهام يبكي زمانه خل السعد يغنيك عن مزنة اللوم = سلمت حبي في يدينك امانه |
ياوقت لا جتني خطيه من احباب = اطعم مرارتها بروح مغصوبه وابحث لها خلف الكواليس لاسباب = ولا القى سبب مقنع ويوزم وجوبه واقول دام احباب ما احتاج لعتاب = ولا بعتبرها جاتني ومحسوبه وياوقت فيك تغيرو ليه الاقراب = وكلٍ على الثاني يصيدّ عيوبه سوو معي مالا يسويه الاجناب = وبادلتهم بالود صفو و عذوبه طيبي لهم في كل الاحوال ما طاب = والكل منهم للردا صب كوبه وإن جيت للاصحاب ياوقت مرتاب = البعض منهم ماملا كم ثوبه والبعض ذا عقرب وهذا معي داب = وهذاك حيه يخفي السم دوبه ظهرو معك ياوقت في نّو كذاب = والبعض منهم بين نوبه ونوبه واللي مكانه معتلي راس مرقاب = صاحب على الطالات هبت هبوبه الطيب لا صدأ ومعه الرجا خاب = مثل الحديد اليا لحقته رطوبه والظن في عين الرياجيل لا خاب = راعيه 0اقفوا مايلدون صوبه احدٍ يجي راكب واحد جاب رُكاب = واحدٍ مع حلومه تزايد ذنوبه ياوقت باب اقّفله ينفتح باب = وصبري بهم تشعبتبي دروبه إن جيت والا رحت للطيب كسّاب = وبنيت طوبه للوفا فوق طوبه |
الياس كنه لا فصل بعض عن بعض = هبت عليهم ريح صرصر عتيه مثل الشجر يابس تشوفه على الارض = لكن عروقه باطن الارض حيه شوقي كذا مثله على مشاهد العرض = ماضيه ذكرى باقية منه ليه اما الغلا ماهو لاحد جايبه قرض = من خافق لخافق وهبته هديه مدري رفض ولا فرض فرقتي فرض = واللي عليه يردها له عليّه ياغَض طرفي قلت له للنظر غُض = وياحظ مقفي روحت ٍ دون جيه رضيت بعد اقبل 0وبعد اقبل اعرض = ماخطيت وقتي حط بي الخطيه ليت العنا عن عاتقي للقسى قض = ماقام زاد من الآسى شد زيه |
يمكن صباح الخير صادر شروحي= ويمكن صباح الخير وارد شروحك تسهر على نغمة صدى حرف بوحي = واسهر على نغمة وتر عزف بوحك وتهجع على ماتنزفه لك جروحي = واصحى على مبدأ نزِفتّه جروحك عيش الامل في ياس تحياه روحي = واعيش امل ياسه بقاياه روحك لو ضاع فكرك في مخارج وضوحي = ايتيه فكري في مداخل وضوحك ولو ينجرح ذاتك بنزوة جموحي = ذاتي تعرقل في مآسي جموحك لو كان جِدك زلزلت به مزوحي = جدي معك بي ماتهزه مزوحك يبقى الجفى ديرة تسبب نزوحي = كان الوفى ديرة عليها نزوحك كان الغلا غاية وسيلة طموحي = ابحر على مركب وسيلة طموحك وتصارع امواجه كباير جنوحي = ويرسي على شاطئ صغاير جنوحك |
ابدأ بذكر اللي لأيوب استجاب= اللي قسم للعبد عمره ورزقه عسى حروفي ترتقي ذوق الاحباب= ولاتلتقي منها العنا والمشقه لاقيل ظنك فيه من كان لك خاب = ياكيف 0قلت يبان من غُث نطقه لاجاه علمك جاك فايه ومرتاب = اما يعلج العلم او طق طقه وتبقى المذاهب والعوايد والانساب = متفرقه لله حِكمة بخلقه واللي دخل مع باب يخرج مع الباب = ومن ضيعه عفته وحللت عتقه كلٍ وله قسمه من الطيب لا طاب = وكلٍ ليا ماطاب صكيت حلقه الطيب بأهل الطيب ماحوله حجاب = وتقصُر عن ابوابه يدينٍ تغلقه مهما الوفا في وقتنا صار منصاب = وبأهل الردى ثوبه لنا بان فتقه يبقى مع اهله دوم غالب وغلاب = ماتلحق اذناب الرياجيل عنقه والعيب من لا شاف عيبه وعيّاب = واللي يجيه بينصحه زاد لقّه العقل ميزان الرجل شايب وشاب = والجاهل بجهله يرى الكون شقه وليه تجارب من حياتي والاتعاب = منوعه 0مابين صفقه وصفقه الذنب يغفر كان راعيه له تاب = والحق مايخفى على الناس فرقه اما الغلا يمكن يجي صفحة كتاب = ويمكن كما مزنٍ ولا لاح برقه ويمكن يجي من دون نبذل له اسباب = وبدون لا يطرق لنا القلب طرقه الشر فالاقراب والخير فاقراب = يعني بهم ظلمة وللبعض شرقه وانواع ماتنعد لقينا فالاصحاب = فيهم وفي 0 واجب نوفيه حقه ومنهم صحيب هرُوج بالصدق لعّاب = والبعض يسرق ضحكته لك سرقه ومنهم يودي عنك لا ذاك لك جاب = والصاحب الصادق بذا الوقت نقه لجله صدوق وفالمواقف والاصعاب = يبقى ولك في قاسي الوقت بقه دامه زمن ماللعدل فيه كُتّاب = الكل مسماره على الزور دقه زمن جمع سارق وظالم وكذاب = حتى الولد ماهمه ابوه عقه الحق فالميزان مابينهم ذاب = ذوب الحديد الصلب لاتم حرقه المال سواق المصالح ورُكاب = اهله في باص الظلم يمشون رفقه الحق يشبه عوّد منهك بعد شاب = الكل منهم مجتهد لاجل خنقه لكن يبقى حافظه رب الارباب = يظهر ولو باهل الردى شاف غرقه |
سعيك معي نصه مواعيد عرقوب = والنص الآخر بك لقيته مُغره حسبتّ لي حساب عندك ومحسوب = شاني فقد حلوه وبك ذقت مره جيتك وانا بك هقوتي هقوة قلوب = حُره تعيش وموتها فيه حُره جيتك نسب ما ناسبه منك منسوب = ترد مره من 30 مره ماضيك كان وحاضره فيه عذروب = كانت لكم في درب الاجواد جُره وديتني في صوب وانته معي صوب = ولياك في قلبي ذبحت المسره ليتك معي واضح ولا كنت محجوب = غطيت خيرك عن عيوني بشره مانته بنا في محفل الطيب مغلوب = اهل الوفا بك بين كره وفره إن كان وإنك في تخليك مطلوب = خلك لمطلوبك ومكسبك صره ياللي يترجم بالفكر حرف مكتوب = تلقى المعاني بين الابيات دره على الهجيني وإن تمناه مسحوب = منك الخطا تنفيه ولا تقره علمك وقف مابين صادق ومكذوب = لاغبت جاء ويغيب لا قلت مره |
سلام مطلاعه كما طلعة الشمس = ماغاب مثل الشمس مايوم غابت صحيح تغرب مايبيّن لها رمس = ونمسي ونلقاها مع الصبح بانت لليوم توفي 0 لجل بكره يقال 0امس = اقفى ولاشمسه على الناس عادت بعده علومي لك جهر مابها همس = وهان الدواء لنكانها النفس هانت لولا المفارق لحظة موادعك عمس = ماكان نفسي قبل الابيات عانت حتى حمست حروفها داخلي حمس = وهذي معانيها فالاعماق كانت ياللي غمست الود في مهجتي غمس = وطابت بك العيشة والايام طابت طمست ياسي والحزن كلها طمس = اقسى الليالي بعد لقياك لانت بالله لاتصفق على خمسك الخمس = لو كان تاليها مع الوقت شانت مكتوب لو يدمس لنا افراحنا دمس = حان الرحيل وساعته منك حانت |
جدول دموعِك ما بدأ له حدودي = يجري سواقي ماطفى جمر فرقاه لو كل من تذرف دموعه يعودي = من فارقه 0 مانلتقي حي ننعاه راضين بامر الله إله معبودي = لله ماياخذ ولله ما اعطاه يلايمي من قال الا واوجودي = ليتك تحس بشي من جُور ماجاه كني سجين وكبلته القيودي = لا ميت من داءه ولاحي بدواها كله على اللي نايفات الحيودي = في رؤسها منزال باسمه تسماه شيخٍ بفكره عن ربوعه يذودي = وبالمال لو إن الزمن جار ما اعضاه من هيبته تاقف جموع القعودي = للمجلس اميره وبعلومه احياه ولا حان للشجعان قدح الزنودي = من قدح زنده ياصل العلم منهاه للعرف مرجع والعوارف يقودي = ومنصى لربعه والرياجيل تنصاه للضيف واهله والرفاقه يجودي = وجاره يمره ماخبرنا تعداه مرحوم ياشيخ سكن بالحودي = يالله عسى في جنة الخُلد مثواه يالله يارحمن حي و ودودي = برحمتك غفران واحسان تجزاه وإنك تصبرني وفوقه تزودي = سلوان يامعبود ماخاب رجواه وختامها عداد كل معدودي = صلوا على اللي بامته خير سواه |
ابيات من العم الشيخ بريك بن جميل في والدي رحمة الله عليه وعلى اموات المسلمين
مرحوم ياكاسب المجد والجود = مرحوم ياراع اليمين الطويله ياللي تقود العرف من منبعه قود = مثل المطر ياتيك عقب المخيله مشهود له من كل الرياجيل مشهود = معارفه تاتيك ماهي قليله الله عساه بجنة الخلد موعود = بجوار من كل العرب ترتجيله يابو محمد وانت مذخور لفهود = مكمل الماجوب راع الجميله وختامها يالله ياحي معبود = تغفر ذنوب اللي ملاقي عميله الرد ترحيب له في محفل الطيب مردود = لأهل الوفا وزعه وحشمه نشيله جاني كلام اعذب من الشهد ويزود = من شيخ فالواجب فعوله جليله وحشدت من دُر المعاني لي حشود = يروي وفود 0 ابياتها سلسبيله ياراعي النوماس بالطيب معدود = انتم وحنا نسل روس القبيله ناقف على عد الرها فاول ورود = ونصدر ودايم كسّبنا فالجزيله مرحوم ياشيخٍ علا عالي حيود = روس الحجا له منزله تستويله فقيد لابه ذكره الطيب معهود = ما مات ذكر اهل الخصال الفضيله طرفي فقد شوفه وبالصدر موجود = والروح عند الله عليها وكيله برحمته يجعل لها نور ممدود = ويظلها في يوم ينجي ظليله ياعزوةٍ مقدارها ماله حدود = يبقى غلاها 0 ماخِلِق من يزيله وختامها عداد ميت ومولود = وعداد ماشيءٍ نقيس ونكيله صلوا على المختار والأمر منشود = وآيات فالقران تثبت دليله |
السلام عليكم بذكر الله بديت وشرع الهاجوس بيبانه = وبنات الفكر بالابيات زينها وجملها يقول ابن بخيّت واسمعو قوله وتبيانه = عن الشيخ الرفيع اللي حياته عز مجملها الا مرحوم ياشيخٍ علو الحيد مزبانه = تعلت هامته واعلى المنازل عاش نازلها عسى الله يغفر ذنوبه ويسكن عالي جنانه = عساه اعلى المراتب من كريم الجود ياصلها على درب الوفا والجود عمره مفني ازمانه = وذات البين له غاية وبين الناس يبذلها بحلم يقابل الغضبان لامن ثار بركانه = يجادل باللتي احسن وكاسب نفس يعذلها كفيل ايتام ويمينه من الجزلات مليانه = وكم من خصم ينقض جابته لاجاه فاتلها عمود البيت مال العام ما اخلف ميله اركانه = لكن اليوم طاح وصدّع اركانه وزلزلها صحيح إن البناء قايم وثابي فوق سيسانه = وقيل العاصفة لاجات تفجع من يخيلها وراع الحبل ما شده وما ارخيته على شانه = وقام وحط عقده قال من يمك وحلحلها في طُرقه تخاوينا ودربي قوَل بلسانه = يقول السالفه 0بالعِرف مخرجها ومدخلها وفجأة قال خوياني ولا ادري وين خويانه = وجينا بطن وادي قال شب النار واشعلها عرفت البر بسباعه وجوف البحر حيتانه = جيوش الجو فوق وجو حكمة من منزلها رماها رميته وحده ومااخطى الرمي نيشانه = ولدّ الطرف فالبرواز صوره ماتجاهلها وتاه الفكر والمعنى يجي ويروح برهانه = وهو ترجح به الكفه ومثله مايقللها وقال العلم في كتابه ولا يخفاك عنوانه = ومن يبغى الجميل الله معه دايم يجملها قلت العلم في غيبه نسج بخيوطه اكفانه = وانا منك العلوم الغانمة سَلمي وشايلها فهمت وشفت روحك ضايقة والنفس قنعانه = حمولك في معانيها حمول ثقال بحملها ذكرت ان السماء والارض عيت قال سبحانه = تعالي يالجبال ومثلهم عيت تفضلها ومن جهل البنادم قال عندي تلتقي خانه = ولا اللي صانها الظالم وخان وقام بدلها لكن ابشر صبيّ العَودّ مثل العَودّ فاخوانه = وصية بعد وصلت في مسيرتها بوصلها عليها بستعين الله ورب العبد لاعانه = عليه تهون لاصعبت ولاهانت يسهلها وصلى الله على المختار عد حروف قرانه = لو إن الشعر والابيات ماتوفي بحاصلها |
انا لو قلت ماقلته ولو قست الحبر ببحور = تجف اقلام في يدّي وحرفي ماوفيتك فيه لانك فرحة اشواقي ولي شمعة ولي بلور= ولي ذاك الكيان وخافقي لك بالغلا يحويه تهب رياح همي في غيابك والفراق يجور= ولكن همي القاسي بلحظه شوفتك تمحيه انا بك ظلمة ايامي جلاها من جبينك نور = اعيشك بسمة الطفل اليتيم ودمعته تبكيه تخيل فرحة المحكوم بالاعدام بعد الدور = وصل عنده وحد السيف في لحظة يبى ينهيه لفظ بالعفو والانفاس تلفظ والزمان يدور= لقى فرحه بها صدمه ثواني فالزمان تجيه انا مثله على وصلك وقلبي قلبه المسرور= في دوره يوم عبر والفرح في مشهده كاسيه اليا منك علي اقبلت يهتفلك معي جمهور = من الاشواق حولي والغلا بالود لك مهديه معك تسرح وبك تضوي على ماتحتويه شعور= هجوسٍ داعبت فكر الذي بالطيب مد ايديه على عز وشرف ماهو على ذي غيرها مجبور = على مثبى ثبا ساسه وهو علاه ومثبيه على خوة على نخوة على درب الوفا المخبور = حريص العوّد من صُغري مشينابه و ورانيه وقال الحق حق اليا تبعته لا تدور شور = ودامك يالولد تمشيه لا تحدا ولا تخطيه تبى تاصل ليا مآده ولاهي في سنه وشهور = ترى مآده عمر رجال يوفي فيه ويوفيه وانا من يومها فالدرب نسل احرار ولد صقور = تقول الحق وتمشيبه وتاخذ باسمه وتعطيه رساله كل مافيها بها عنوان جمع زهور = غرسته فالصدر وانته موكل بالثمر تجنيه ولوجتك الصعاب وقام يذبل لايجيه ظهور = امانه تدفنه بالصدر لا يخرج ولا تحييه |
الساعة الآن 04:30 PM |
Powered by vBulletin® Copyright ©2000 - 2024, Jelsoft Enterprises Ltd. Designed & TranZ By Almuhajir