عبدالعزيز الزويهري=
الله يعينك على بلواك= و يزيد حالك من البلوى
حتى اذا جيت تبغى دواك = تلقى الدوا قسوته اقوى
فواز الزويهري=
الله رب الملا يجزاك= بخل جاحد بلا تقوى
يقهرك حتى يشل خطاك = و تقعد مكانك و تتشكوى
عبدالعزيز الزويهري=
الدرب جابك و لا وداك= ما ذقت بعد الصبِر حلوى
ما غير تبكي على دنياك= و دموع الاعيان ما تسوى
فواز الزويهري=
وطّاك حظك و لا علاّك= تعنّي نفسك فيما تهوى
تسعى ورى طيف ما يدناك= كل ما تمد الحبل يطوى
عبدالعزيز الزويهري=
ما اتبع دروبي ورى ممشاك = و يقلب معي الحال للأسوا
وانته فـ موطن عضى و أشواك= ما فيه وسط الحشا مأوى
فواز الزويهري=
لو كان تمشي معي أرفاك = عن درب فيه الشقي يكوى
تعبت في النصح مير اغواك = عن دربنا ابليس و الهقوى
عبدالعزيز الزويهري=
ما دام شكواي من شكواك = ما أشوف ناتج من الفتوى
أشوف قلب الشقي بكّاك= و انت تتداري بما سوّى
فواز الزويهري=
هيا معي مد لي يمناك = و من عذب الايام نتقهوى
نمشي سوى و الصفا يهناك = و لولاك ما كان لي رجوى