ذابت مشاريه الغـلا وسـط الاعمـاق=واستيسر الحزن الخفي كـل معلـوق
والعبره اللي تحتـرق بيـن الاحـداق=ماظنها ترخص علـى كـل مخلـوق
ماترخـص إلا للـذي حبهـم فــاق=دم العـروق بعالـمٍ كـلـه عـقـوق
من بعدهم مني خـذا الحـزن ميثـاق=ما تنزل العبره علـى فقـد معشـوق
واليـوم لا تاقـف ولاهيـب تنسـاق=تسرح وتضوي بين الاعماق والمـوق
ما ودي اذرفها علـى وجـه الاطـلاق=لو قيل لى من همهـا منـت معتـوق
ولولاي اترجمها على بيـض الاوراق=ما صار لي في غيهـب اليـم دانـوق
دانوق يجذب لـي طويـلات الاعنـاق=لعلـي القـى بينهـن شـيٍ يـلـوق
شـيٍ يلـوق بـذوق عاليـن الاذواق=ويضيف لاهل الذوق ذوقٍ علـى ذوق
تعبير مـن قلبـه شفـوقٍ و مشتـاق=ومنـزهٍ عـن ملـة الغـدر والبـوق
في عالمٍ ماضاع بـه غيـر الاخـلاق=وتموت فيه حقوق وحقـوق وحقـوق
واللي لبس نوط الوفى خاطـره ضـاق=كن الوفى في عالـم اليـوم ممحـوق
كونٍ غزاه الكـذب مـن كـل الافـاق=واسكت بصوت المصلحه كل منطـوق
واخر عزاي يعوضني بعض الارفـاق=وإن خاب بعض الظن شحت النظر فوق
ودعـيــت ربٍ للمخـالـيـق رزاق=يجعلي بأمـره كـل مطـرود ملحـوق