بمناسبة حفل قبيلة حرب بعد المزاين في مدينة الدمام

من دافع الاحساس وانتاج الافكار=وحي المشاعر ترجمه صادق القول
واستجذب المكنون بالصدر واختار=اللي لها في واحة الشعر مدلول
وفي عالم الجوده لها رمز وشعار=من منهل دايم بالابداع موصول
يحثني مبدا العزيمه والاصرار=اتعب اركاب الشعر واسرجله اخيول
شفي جزيل القول في سوق الاشعار=والا الهزايل بابهن عنه مقفول
وقعدت ادورها من ايمين وايسار=واخذت لي اسبوع والفكر مشغول
وتحطمن في داخلي كل الاعذار=ساعة زمن وغيابها عنه مسؤول
مدام ماقفها محطن للانظار=في منبر له محمل الجد محمول
مال الضروف بماقف اليوم معبار=ودعتهن لين اكتمل كل مأمول
ووقفت احيي من به الحفل حظار=من هاجسن جوه بالافراح مأهول
يا مرحبا مليون مليون تكرار=ترحيبتن من طيبها يطيب معلول
نيابه عن اهل الحفل وافين الاشبار=في حرب واللي شاركو حرب ونقول
حياكم الله يابعيدين الانظار=ياللابه اللي دايم اتقول واتطول
في عصرها الحاظر وفي ذيك الادوار=اهل مبادي ماتغير ولاتزول
وكان الحضاره زخرفت سقف وجدار=والا هرم عرش من العاج معمول
حنا حضارتنا مع الضيف والجار=سولف بها التاريخ حول بعد حول
ولنا مع الخوه للاجناب تذكار=مضرب مثل للتضحيه فيه مفعول
تواترت عنا جليات الاخبار=تاريخنا ياحرب ماهو بمجهول
قدام لاترسل محطات الاقمار=وحنا لنا مجدن مع الناس منقول
ومن دون واجبنا تحدينا الاخطار=يوم السنين اللي بها السيف مصقول
ماحدن طمع بحقوقنا سر وجهار=منزالنا هيبه وميقافنا هول
بوجيهنا ماينزل الذل والعار=من دونها بقلوبنا الخوف مقتول
نحمى موقفنا على قب الامهار=بحدود شلف تاخذ الثار مدبول
وحنا مانخطي بس من دق به زار=وحاول غضبنا ماتريح على طول
نعطيه درس بين الاضلاع مسمار=يبطي وجفنه من غضب حرب مكحول
وللطيبين انطيب في كل مضمار=مانبخس اهل الحق في حق معقول
واهل مقامن ماعلى شمسه اغبار=باكمل مزايا الطيب والجود مشمول
نحفظ مكارمنا من اكبار وصغار=يشب واحدنا على الطيب مجبول
ومدحي الربعي ماينقص هل الكار=كل القبايل بالمكارم لها نول
واختامها صلوا على سيد الابرار=محمد بعثه الله للناس مرسول