|
صياف راح وراح قبلـه ملاييـن=لاكن ظني مايجي مثـل صيـاف يالله تثقل صفحتـه فالموازيـن=انت الذي ماغيرك اليـوم رواف امسح ذنوبه مثل مايمسح الديـن=وثبت جوابه عند رجفات الوقاف صياف ماننساك حين(ن) بعد حين=لا والذي في حكمة (الام) والكاف يالشاعر اللي خاض كل الميادين=لك كلمة (ن) نقولها كلمة انصاف دعيت انا وادعو معي يالمصلين=الله يرحم شاعر الشرق صيـاف صياف راح وراح قبلـه ملاييـن=لاكن ظني مايجي مثـل صيـاف |
ماني مصدّق الخبـرقمت أعيده= صياف مات وسطرتهاالعناوين بـالمنتـدى أبحـث أدور قصيـده=شفت الخبرقلّب جميع الموازين يـالله ياكاسـي خضـار البديـده=عسى مقره جنـة الخلـد أميـن ياواحـد ٍ باللطـف يرحم عبيده=أغفرله الزلات يامنـزل التيـن عساك ربي بالحسـاني تزيـده=وتثبتـه يـارب كـل المسلميـن صياف رجل ٍ له مزايا عديده=يشهـد الأبعـاد والا القـريبين فيه السجايـا كـل أبوها حميده= ياما أسمعوله بالقصايد ملايين ياحـرب والله راح منكم فقيـده= صياف رجل ٍلاحضر كالبراكين |
عظيم الملك بأمره يستدير المزن قبل الريـح=هو القيوم رب الكون نـور النـور سبحانـه له الفضل وله الأمر وله التهليـل والتسبيـح=عظيم ولايموت ويخزي الشيطـان وأعوانـه دعيته يقبل ادعاتي دعيته يرحـم الزحزيـح=كريم وشاعر ووافي وطيبـه طيـب قيفانـه اعرفه واعرف انه عند ربعه مثل عين السيح=يحبونه اربوعه مـع شواعيـره وصدقانـه دخون العود الازرق مايقارن مثل جرم الشيح=أنشهد مات رجـلٍ تنثنـي للطيـب كرعانـه عقب فقده أشوف الشعر بالميدان للتصليـح=ينادي له على شاعر حكيـم ينظـم أركانـه عقب صيّاف بن عواد طاروق القصيد يصيح=عسي الله يرحمه ثم يغفـر ذنوبـه بغفرانـه |
جاني خبر زلزل كياني ونيت=ونيت ونة من فقد شخص غالي قالو توفى شاعر العز والصيت=صياف ابن عواد راع الكمالي وسرحبي الهاجوس لحضه وسجيت=وهلت عيوني دمعها ثم سالي وبكيت انا والله ياناس وبكيت=كل الذي عندي وحــــــولي بكالي مرحوم يلي للمراجل لهن بيت=تجمعن وسطه من اول وتـــــــــالي ومرحوم يلي للملاعب اليا جيت=تصرفلها صرف الذهب ماتبالي كم طايشاً بالراي رديت رديت=رديت طيشه بالمعاني الجزالي عن ماقفك مايوم والله تخليت=في كل مارد لك حبالً طوالـــــــــي ويالله ياغفار ياحامي البيت=ترحم ابو مفلح كريم السبالي ويالله يامعبـود يامحيـي الميـت=ظلـه بظلـك ياعزيـز الجلالـي |
لا عـاده الله علـمً اليـوم ذاعـوه =زلزل بـه الساحـة مـع الأطـراف صاح الحجاز وجاوبت نجـد ياهـوه =من يسمع القلطة بعد غـاب صيـاف عزولي الجمهـور والصـف عـزوه =وعزولي الشعار فـي كـل محـراف ضلعً رسا بالشعر والنـاس سمعـوه =ماينطق الهزله ولا بيوتـه ضعـاف شامخ بوجه الريـح مايـوم هـزوه =ورفع مقام الشعر عن بعض الأسفاف وأن قامـوا الشعـار وإلا تـحـدوه =وقف لهم بالقاف ثـم أردفـه قـاف وأن قـام للصفيـن والبيـت خَلـوه =جـاب الحقايـق ماتزلـف تـزلاف يامـا علمنـا بيـن الأعـلام رزوه =وسط المحافل بين الأعـلام ينشـاف طوع عسيـرات المعانـي وسمـوه =الشاعـر الأول علـى كـل ميقـاف حتى قضى الله فيه حكمـه وشالـوه =على النعش محمول من فوق الأكتاف ادعي من الله يـوم فالقبـر حطـوه =يغفـر لـه الـزلات والـرب رواف والعلـم عنـي بأخـر الهـرج ردوه =الملعبه مـن بعـده اليـوم تنعـاف |
أفل كوكبك يا سهيل اليماني =تغيب نجوم ونجوم تبيني رحمك الله يا راع المعاني =رفعت الشعر بالقول الثميني عسى ملفاك في خضر الجناني =كتابك يصبح بيدك اليميني بدا صياف شعره له كياني =وعند الماقف الشامخ مكيني يحسم الرد في عدة ثواني =وسيفٍ باللقاء حده سنيني ورده عالي ما به هواني =ولا يقرب من القول المهيني ويبقى سنين له قدر ومكاني =حكيم الشعر يبقى مستبيني أعزي حرب يوم العلم جاني =كتبت بساعة فيها حزيني ويبقى الله وإلا الخلق فاني =ومهما طالت شهور وسنيني رحمك الله يا راع المعاني =رفعت الشعر بالقول الثميني |
البارحه تنشر عموم القنوات=كلن يعزي حرب في فقد صياف تدعي له الرحمه جميع المسجات=من حرب و إلا من بعيدين لاطياف فقيدته ماهي على حرب بالذات=فقيدته يشعر بها كل عراف أربع عقود ومنهجه له بصمات=في رفعت المعنى وتفجير الاهداف ينقض وفتله من جزيل العبارات=وبحارته يفهى بها كل مزهاف سيفٍ مرصع مقبضه بالجنيهات=من وين مادرته عديمٍ بالاوصاف لو مات يبقا له لقب حي ما مات=((المعجزه ))من بين شعار الاسلاف ولا حازه إلا عقب عدة بطولات=فيهن مصادم رؤس ومداحم أكتاف وعز الله انه جاد زبن المهمات=وأنه تسما مدرسة بادع القاف ياما صعد فيها برؤس المنيفات= وطرب أسموع الجمع من كل الاطراف شاعر وجمهوره على قولي أثبات=شهد له اللي ماذكر عنه الانصاف له شهرةٍ عبر الدول والمحيطات=شهرت علم ماهي دعايات و إرجاف من طبعه العفه وحسن العلاقات=إلا اليا خبث الغا والنباء حاف يقدر يحط منافسه في متاهات=ويشوفها بالعين ويعود أعياف |
يولد سلف ويموت في عصره اسلاف=دنيا الفنى ماربحـت مـن شراهـا مافيه زرع الا ورى الزرع قصـاف=ولافيـه نفـس الا تـواري ثراهـا مابه وليف الا فقد شـوف ميـلاف=راحـت بـه الدنيـا ودارت رحاهـا والموت حق وياخذ اشكال واصناف=ولايفقـد الا الطيبـيـن بوفـاهـا قلته بعد جاني نبـا مـوت صيـاف=عبرالوكالـة يـوم بثـت نبـاهـا شيخ وقف في منبرالطيـب ميقـاف=رقـى للـراس النايفـه واعتلاهـا نجم لمع ضوءه على كل الاطـراف=غطى النجوم الساريه فـي سماهـا عنما بسدري يعجز النظـم بالقـاف=لوباتمـادهـا طـويـل مـداهــا يالله يامن بامـره النـون والكـاف=تجعـل جنـان الخلـد دار لفـاهـا يالله ماغيـرك رحــوم ولـطـاف=وانك قبيلة حـرب تحسـن عزاهـا |
هذه قصيده مرثية بالشاعر الكبير / صياف الحربي شاعر الخليج الاول ومعجزة شعراء الرد ،، رحمه الله رحمة واسعه
يا ملعبه عقـب ( معيـض العجـي ) راح=ولحقـه ( رجالله ) عقـب مـده قصيـره بحـزن حربـي واحـد اتـحـدت ارواح=قالـت خسارتـنـا كبـيـره .. كبـيـره وصياف حـي بوقتهـا نـاح مـن نـاح=علـى رمـوز الشعـر فـي كـل ديـره واليـوم حتـى نجمنـا الداهيـه طــاح=اللـي يسمـى ( المعجـزه ) بالجـزيـره الموت من ربعـي خطـف درع وسـلاح=يضرب وضربـه مثـل ضـرب الذخيـره صيـاف بـن عـواد والـكـل يـرتـاح=ان جيب له فـي ساحـة اللعـب سيـره الملعبـه مـا خاضهـا سـب وصـيـاح=ومهاتـرات اهـل النـفـوس الحقـيـره يخوضهـا بحكمـه عظيمـه ويجـتـاح=اكبـر جيـوش ولـه مواقـف شهيـره تقـل بيمنـى سيـد الشـعـر مفـتـاح=ام الـرمـوز الغامـضـه والعـسـيـره يزيـح عـن دربـه مصايـب وتـنـزاح=يقـوم ابـو مفلـح وتصبـح صغـيـره نقضـه وفتلـه لبّـس القلطـه وشــاح=ايـام مطلـق يــوم كـانـت مثـيـره يا وجد ( خلوها ) علـى صـوت ٍ ارتـاح=كـل البحـور اضفـى عليهـا عبـيـره ويا وجد ( حرب ) اللي لها سيوف وارماح=عليـك ياسيـف ٍ وضـع فـي جفـيـره عسـاك بالجنـه يـا صيـاف تـرتـاح=وخليفتـك حـربـي يـقـود المسـيـره |
اعزي الخليج بشاعره راعي الميقاف=واعزي الملاعب والقصايد اعّزيها بشاعر يخضب القاف لا بان شيب القاف=يرده شباب ويلحق الشاه ر اعيها قضى بالمصحّةمن زمانة سنين عجاف=ونهارأمس طارت روحه لعرش باريها عسى جنّة الفردوس مثواك يا صيّاف=وعسى مرضتك تطهير للي سبق فيها ليا شالوا الصفين جاهم تقل خفخاف=تكش الجلود من من اللغوزومعانيها بحر والبحر ماتنقصه غرفة الغراف=عسيرة؟غريبة؟ ماتهمّة قوافيها مضت حول خمس عقود ماله شدي ينشاف=يشيخ الخصوم اليا تقصّى خوافيها ليالاح بالقلطة نضيرة يجيه إرجاف=يحس الوسيعة ضايقاتٍ نواحيها ولاأقول إن الملعبة لاانفقد تنعاف=يجي من يسد اللازمة للتزم فيها وحنا بفضل الله ترى ماعلينا خلاف=قبيلة يرسّخ مجدها فعل ما ضيها نهار إندفن صياف حضر مية صياف=(علي)(تركي)(وسيدي)1تنومس هقاويها لهم باع طايل في تصانيف طرق القاف=و(معتق)2 فتانا اللي رسى في موانيها و(راشد)سليل المجد مرقب على المشراف=ومالاح له من سبّق الصيد يرميها مجرّة قبيلة حرب شعّاقها خطاف=ليا غاب نجم يطل الآخرويضويها نشعلل لهبها لين يكشخ على المشراف=مثل نار كسرى كل من مر يرعيها وتبقى سماء حرب الدول برقها رفراف=تناعت به العربان ويعل ظاميها لنا رمزنا الخالد ليا رزّوا الأهداف=نهزم الدول ونحطّم عروش واليها مقال وفعل يشهد بها راعي الإنصاف=حقايق تعزّك يوم للناس ترويها وشبابة لها صولات مع باقي الأحلاف=تضد الخصوم اليا تعزوت بــ هاليها |
الساعة الآن 09:30 PM |
Powered by vBulletin® Copyright ©2000 - 2024, Jelsoft Enterprises Ltd. Designed & TranZ By Almuhajir