انشدك عن ورع صغير ويستدير= ماحصّله على بناته وزّعه
اخفاه في بيته عن الناظر خبير = وقفّل عليه البيت الاسودورفعه

انشدك عن سبع بهن علم ودليل =اوصافهن لاهل المعرفه بينات
الواضحات اللي لهن وجه جميل =الخافيات الغايبات الحاضرات

انشدك عن ناس عملهم خديعه =متفاهمين بعلم وموزعينه
احد كشف نفسه وغيب صنيعه = واحد تخفى والخطر من يدينه
شد انتباه وللمخطط ذريعه = والفعل الاصلي للقفا مخططينه
تنظيم قايد والمداخل وسيعه =نجح فشل نقصه على منظمينه

ويش بنت مالها تصنبف بين = نوب خير ونوب شر لمن حملها
من تعامل بامرها باسلوب لين = يمكن انه مايتضرر من عملها
بالخفا تاثيرها ماهو بهين = الدول من خبثها تلعب باهلها

انشدك عن بنت خزينه لرجال = ولياطلع من بطنها تذبحه بنت
بنت لها اللي ترغب النفس قتال= لولاه ما شاهدت غيرك ولاكنت

وشصبي حلّ بالديره يسـلــي = كنـه المجنـون ياســرع انـطــلاقــه
كان جيته تطلب المتعه يهلي = لكن اسمه موت ما يعرف الرواقه

ابا انشدك عن رجال يمشي مثل ممشاك =يقلد خويه مااستحى تقل يضحك به
اذا انك رفعت يديك يرفع بدون ادراك= واذا ان جلست بشمس الروض يبرك به

ابا انشد رجال العرف عن راكب معلوق = ليا علقه من به ضرر مستعين به
مذكر مؤنث مكرم مايعرف البوق = واذا غيروا مبداه نتيجته ذنبه
لاانه على نوعين ولكل نوع طروق= ومن علق المحذور ذنبه على جنبه

لقيت شي جميل ومنظره زايف = ياهل المعرفه تعدى الزيف عن حده
لياعرفته تركته قانع عايف = لو المزيف طويل العمر والمده
تشوف زيفه وتضليله وانا شايف=وتقدمه للعزيز بساعة الشده

اللغز عن رجل تنفس بلا روح = اللي شهيقه ثابت مع زفيره
لكن زفيره فيه متعه ومصلوح =ترتاح ليا منه تتابع شخيره