يوم الجمعة اللي فاتت كان عند واحد من خوالي عشاء
كان عشاه لاابنه اللي راجع من سفر شهر العسل والتقيت خالي وانا مبطية عنه
لانه اغلب الوقت مع ابله في الشمال
الزبدة ان خالي سب فينا سب ماخلا ولا بقى وفديته حتى مسبته
لنا لها وقع خاص وكما قيل الغالي غالي حتى وان جرحك
المهم خالي يقول حريم هذا الوقت مافيهن خير تراه مخذ 6 وطلقهن مابقى الا الاولى وثاني وحدة اخذها يعني صاحب سوابق ويقولحريم هذا الزمن مافيهن خير من يوم يتعشن شاورماء هههه
قلت غريب كني ماعرفك يالله منت كنت تمدح بهاذه وبذيك وخيلك وراهن
واليوم تسب قال كنت امدح فيهن وابفاهن يوم المراة كل شيء تطبخه وتسويه مو الحين
تستنى رجالها يجيب عشاها هههه ترا خالي مو كبير 53 بس شكل الصحراء
ومرافقته للابل قست قلبه المهم جت هذه الابيات تقبلوها
ياخال لاتشقى ولاتعيش مشقي=لاتزرع الالغام داخل حقولك
اول تقول البيض مامثلهن شي=واليوم عنهن منكفاتٍ خيولك
من اولٍ تمدح باهذه وهاذي=واليوم مافيهن مطابق ميولك
ياللعجب وش غير الحال ياخي=معاد تهذل مع ضعنهن ذلولك
مدري عقلت وصرت ماتتبع الغي=ولا الزمن جاير وثقلت حمولك
البيض هن البيض من خلقة الضي=مامن تغير خل من سولفولك
لو العشاء حبة شورماء وببسي=ياخال منهن ماش شين يهولك
كلٍ يعيش بدنيته مثل ماهي=مواكب العصره فلا يطق جولك
راضين فيهن والزمن غصب يرضي=ناظر وشوف الناس حولي وحولك
اسمع سمر وش سولفت عن سفر مي=على جبال الالب وانت (بدخولك)
عايش بصحراء ماتلاقي بها في=جو الحضارة مايناسب بقولك
اعطيت لك نبذه عن الحال وشوي=نصيحتي خل البشر لايجولك
(بدخولك)المراد( الدخول) وهي نفود تقع بين ام نقي والهامل
امتداد الصحراء الدهنا تقع بين سامودة وقبة
