|
أنا الوم نفسي يوم جادت بوصلها= لمن لا يقدر بالخلايق وصالها بغيت الوصال و جرّني طيبة اصلها= ولكن بعض الخلق ما ينعنى لها أثار السيوف اتغر اذا اعجبك نصلها= إذا ما حملها من يورِّد سلالها دواها إذا ما تبرد الكبد قصلها= و لا شيلة(ن) تِتْربْ إذا جا مجالها فروع النخل تكثر وتقوى بخصلها= إذا جاد مسقاها و جادت خْصالها و بعض العلل تذبح إذا غاب مصلها= و لو بادروا بعلاجها، لا شفا لها عرفها خبير(ن) بالشعر يوم فصلها:= "على غير اهلها ما تجي براسمالها" |
ارجع يا حبيبي
رد لمي يا حبيبي، ياسعد عيني و يا غاية مناي=طالت الغربة علينا، و السنين تسمِّل الحب الجديد لا تفنّن بتعذيبي، بُعدكم دايم يزوِّد في عناي= ليش تظلمنا السنينا، يصهرنّ القلب لوهو من حديد ليتكم مني قريب(ي)، كان يمطر بالرفاهية سماي=رحت فوات اليمينا، و المصيبة حبكم دايم يزيد أنت بلسم للعطيب(ي)، تنتعش حاله و يعطي كل راي=إحترينا من يجينا، أو يجينا منك علم(ن) بالبريد لو تبي فزعة حريب(ي)، جاك حتى لو بديرة "كارازاي"=العنود اللي هوينا، ما عليها شي يغلى ذا أكيد ما علي من الطليب(ي)، و لا يأنبني ضميري أو عداي=دام نبغاه و يبينا، ما تعدِّي عنه "قاعدة العديد" جعل ظني ما يخيب(ي)، فيك يا عنوان سعدي أو بلاي=إرأف بقلب رهينا، قبل ما ياقف دمي وسط الوريد |
عسى الله يجيب الغيث
عسى الله يجيب الغيث و يسيِّل الوديان= و يحيي تخوم(ن) مع غياب المطر ضميا عسى جوّها من قاعة "النير" إلى "عروان"= و من شرق "ماسل" لين "بيشه" و هي نميا يخيِّل على دار(ن) هله تكرم الضيفان= و الى جا الغريب لدارهم صار منتميا يجيها الغريب و يشعر انه من السكان= و لو هو ضرير يشوف بعيونه العميا و الى راح عنها من سكنها رجع شفقان= و لاهي غريبه حبها ما ذهب هميا بلاد(ن) تضم "أم المراويح" و "الريان"= مع "نجار" و "المنجور" و "الحفنة" الزميا عسى من يلوم اهل البلد خارجه ينهان= و بعد ما يهينوه العدا ينذبح رميا عسى مملكتنا كلها الغيث و العمران= و عسى من يعاديها يعزّر و يعدميا بلاد(ن) لفعل الخير تسبق بكل ميدان= و حسّادها لبَّيد و قلوبها دميا ذكرت البلد و اهل البلد في بيوت سمان= و لو طول عمري قلتها ما تعب فميا |
عروس الف ليلة و ليلة
أنا عروسْ من الـفْ ليلـة و ليلـة= حَنـونْ، مِعطـاءة، بليّـا حـدودي مانيب مثـل الكـلّ، كونـي جليلـة= متميّزة مـا فيـه مثلـي و جـودي ماني بخيراتـي و مجـدي بخيلـة= أعطيه ما ابخل به و لاني حقـودي بارضي حرم ربّي و سيـرة خليلـه= و مسجدْ رسول الله، و حكم السعودي فيَّ المـدن مثـل النجـوم الدليلـة= اللّـي تـدل التايهيـن و تـقـودي و فيّ الشباب يذود عن كـل عيلـة= يحمي حماي من العْـدا و اليهـودي و بنات "حوّا" مثـل خيـلٍ أصيلـة= في سبقها للعلـم تهـوى الصعـودي في التنميـة شالـت حمـولٍ ثقيلـة= مهيب خاملْـة(ن) و لا هـي رِقـودي في العلم و التعليـم، بُنِّـه و هَيلـة= و في البيت ترعى الجيل، و أمّ(ن) ولودي يا الله يـا منشـي حَقـوق المخيلـة= ترعى البلاد و شعبهـا، يـا وَدودي و تعـز دينـك و المعـادي تزيلـه= و تعمي عيون أعدا البلد و الحسودي |
أم العيون الزرق
يقول العصيمي شيلوا ام العيون الزرق= و أنا اقول خل الزين و عيونها الزرقا عيون(ن) ورا البرقع تحرق المتيّم حرق= و لا باس دامه هاوي و يحتمل حرقا مدام الصور تجميع و البعض يسرق سرق= فلا تحرمون اللّي تزيَّن من السرقا عسى الله يخلي "النت" جابت جمال الشرق= و مع القص و التلصيق صرنا بهم شرقا و بعضنا على الصورة تهيض و جر الطرق= و هي يمكن ام الشين، و اقدامها طرقا و انا اقول دام الزيف ماشي فلا به فرق= على اللّي كذب و اللّي يعاني من الفرقا و لا به مطر ينزل مع كل شعقة برق= و لو تستخيله بادية "روق" مع "برقا" و صلوا على المختار ما ناح طير الورق= و عدد ما نزل سهم "الفنادق" و ما يرقا |
عز الرياض بمناسبة الذكرى الخمسين لحكم صاحب السمو الملكي الأمير سلمان المديد لمدينة الرياض، نظم سمو الأمير (السامر) مسابقة خاصة بدأها بثلاثة أبيات و طلب تكميلها لخمسة عشر بيتا فشاركت بقصيدة. واليكم القصيدة:
عـز الريـاض و عـز وادي حنيفـة= و عـز الامـارة و الامـور العظايـم ***عـدل الحكـم سلمـان بالعـز ريـفـه= خمسيـن عـامٍ كــل ابـوهـا غنـايـم تبصـر بعدلـه عـيـن حــيٍ كفيـفـه= المجـد لـه و الطيـب و العـز دايـم
يسهر على الجمهور مثل الخليفـه= يسهر و باقي الشعب آمن و نايـم خمسيـن عـامٍ مـا حسبـهـا كليـفـة= حيثـه بحـب الـدار و النـاس هايـم حليـم دام الحـلـم يــدرك حصيـفـه= و صيروم إذا ما صار للحلم سايم سلمـان حـرٍ يعجـبـك فــي رفيـفـه= و الى شهرما صار في الجو حايم الى رمـى النيشـان صـاب تهديفـه= فـي ماقـفٍ يحسـى لوقـت اللـزايـم والى حرب يروي من الدم سيفه= في ساعة الفـزعة و نطل العمايـم و الـى عـزم يقـدم و لا بـه نكيفـه= مـا يـوم لاقـى فـي طريقـه هـزايـم في ظل عبـد الله و حضـرة رديفـه= أهـل الفعـول الموقـفـة و العـزايـم اللي بنوا للمجـد سـاس و سقيفـه= و في هامـة العليـا يذكـوا التمايـم يا رياض نم مابين جوخ و قطيفه= مــا دام سلـمـان المـواقـف يـزايـم يـزايـم المـوقـف بـرايــه و كـيـفـه= و هـو ببحـر التنميـه فـوق عـايـم عسى النجاح بكـل مسعـى حليفـه= و عسى الأمـن فـي ديـرة العـز قايـم |
العلوم النغيلة
اليوم انا جتني علوم(ن) نغيله= محبها، لكن ربي قضاها اليوم ابو خالد رحل في سبيله= في دربه اللي كل واحد مشاها مرحوم ياللي ما يزعل عميله= ويده على الطولات تاخذ ملاها حليم الى جا الحلم احسن وسيله= غشيم الى وصلت الى منتهاها بيتك على "سمحان" يقنب عويله= و الدور حوله كلها ما رآها يقول: وين اهلي وراعي الجميله = وين الدلال الصفر و اللي ملاها؟ بيت الكرم و الجود يومه و ليله= هذي معلقها، و هذي لحاها انهد ركن(ن) من ركون القبيلة=شيابها اللي صالبين(ن) بناها لو انه اخذ(ن) باليدين الطويلة= كان القبيلة ما تزعزع حصاها لكنها تدبير رب الجليلة= واللي كتب ماشي، و ذا منتهاها حياتنا تبلى و لو هي طويله= وين الدول و ملوكها، و وزراها عسى نهايتها الى جات ميله= على الشهادة و السعة يا عساها و صلاة ربي عد وبل المخيلة= على النبي اللي تبعناه طه |
البارحه نومي تناتيف
البارحة نومي عليَّه تناتيف= مدري وش اللي صايب(ن) بن مسعود أطرد وساويسي و ترجع مراديف= و معها طوار(ن) جاهزات المدد زود راح الشتا و اشتد من بعده الصيف= و انا على ذا الحال و العالم رقود و انا اسعد ايامي الى جاني الضيف= أصير كني مبشّر(ن) لي بمولود أفرح الى جاني مثل صادق الرّيف= و اقدّم لضيف السعد كل موجود ما اواطن التبذير و الطيش و الزيف= أراعي الله و اجتنب كل منقود ماني قصي، و ساكن(ن) لي على سِيف= أطالع امواجه مع هبّة النود ديره جميله، بس ما هي على الكيف= عايش بها كني من الأم مفرود شفي دوام لنجد، ما هي تصانيف= أشفشف لثهلان وجباله السود أحب أنا جوِّه و اجرّ الغطاريف= كني الى جيته مع الخير موعود هذا كلام الجد ما فيه تحريف= و ماني على غير الصراحه بمحدود |
الباص عند الباب يا ورعان!
الباص عند الباب واقف يا عنود= يبي يروح المدرسة قبل الشروق مسراحكم للمدرسة دايم سنود= والى طلعتوا كنكم لمح البروق و في الفصل واحدكم على الكرسي ينود= و مدرّسِه مثله، و الابْلَهْ ما تفوق حب الولد "للنت" دايم في صُعُود= و البنت مثله في متابعها سبوق و الكتب عند الباب ترمى كالطرود= حتى يجي بكره و شيله ما يعوق يشيل حق اسبوع بالشنطه و زود= ما يعرف المطلوب و اكثرها شقوق و يرمي دروسه فوق دِرْجِه في برود= و يفقد بعضها من سبب جار(ن) سروق و اليوم "داون لود" فلم "الهوليوود"= اصبح يسوق ابنائنا للشر سوق و قبل اختبار الشهر في لَيْلَه، يجود= و يسهر الى الصباح و يبحّ الحلوق و نجاحه الى جا و الى عند الحدود= مقبول و الا ضعيف، ما يرفعه فوق و ابوه الى شاف النتيجه ماش فود= يزعلْ و يملا راسه الخاوي فلوق هذي وصوف لبعض فلذات الكبود= و ترى بعضهم مجتهد، و ايضا خلوق يالله تكفيهم ألاعيب اليهود= و تردهم رد(ن) حسن قبل النفوق |
بمناسبة قرب دخول الشهر الفضيل، اليكم هذه الكيبوردية يا رواد هذا الصرح مع الدعاء الى الله لنا و لكم بالقبول:
شهر الصيام اقبل عسى مقدمه غير= و الله يقدّرنا نصوم و نقومه عسى النصيب يصير عالي المقادير= و كلّ(ن) بمجهوده يحقّق حلومه يا الله عسانا سالمين المخاسير= و لا به حد(ن) يندم بعظّة بهومه نختم كتاب الله و نذهب مزاوير= لمكه و نقضي العشر فيها بصومه نصلي القيام و نعتكف مع هل الخير= بليلة قدر كل(ن) تحرى قدومه |
السائق
اختفى السوّاق جعله للذهاب=ما عطى إنذار قدام الرحيل صرت انا في ماقعه من بعد غاب=و لا بقى يكود زيت النارجيل بنطل الغتره و ابدِّلها بكاب= و البس البنطال و الكم الطويل السواقه عندنا مثل الحساب= و النظام اللّي نتشدق فيه غيل أثر الاقشر كل وقته في عذاب= أكّلوه المر لين اصبح هبيل يشبعونه سب الى طاح بمطاب= وان تأخّر يمهنون السلسبيل يحفظ اهل الحيّ كلّه باب، باب= ولا تعجّب لو عرف كل الجبيل كل وقته ما تهنّى في شراب= و لا تهنى في طعام و لا مقيل ودّ لفلانه وصاة، و جب كتاب= و لا تطوّل بعدها، عوِّد و شيل الزباله لا يغطيها الذباب= ارمها بالحاويه لو هي قليل جب زميلتنا فلانه بكل اداب= و ودّ اخونا فلان الى بيت الزميل رد يا أحمد ترى جاني رعاب= شغلتك تنبت بنافوخي نخيل ننتخي و نقول حنا للصعاب= بس ما نملا مكانك، مستحيل لو رجعت اخذ العلاوه و انتداب= و لا تتعب نفسك بقص النجيل بابا من عقبك ترى سف التراب= و لا لقى لك يا ولد "دلهي" بديل |
اليوم يوم الوطن كلّ(ن) تغنّى به= الله يعزه و يبعد عنه الاشراري سبعه و سبعين عام(ن) فاتح(ن) بابه= و الخير في ساحته للأهل و الجاري من يوم عبد العزيز اقبل على ركابه=لليوم ما في وطنا طافي الناري عبد الله اسرج حصانه، و العدو هابه= و الشعب في نور مشكاة الملك ساري يسهر على راحته، و الصلح يسعى به=بين المسلمين، و اللي يحسده داري يقضي على الشر، و يبعِّد عن اسبابه= و خطوطنا الحمرما نقبل بها اعذاري كلّ البلد ينتفظ و يحصِّن ترابه= و ما هو جديد(ن) على وافين الاشباري ما همنا غدر شر الخلق و ارهابه= الله حمانا من اغراب(ن) و اهل داري يا للأسف جا البلد شرِّه من اصلابه= و هم و البعيدين يكفيناهم الباري لا بد يلوي براعي الشين دولابه= و يا قصر حبل الرّدى و الوقت دواري |
آه يا دنيا
آه من دنيا(ن) تودّي الرجل حدِّه= بكل ما فيها من المرّ و الحالي نحسب ان كلش تجي به على القده= وآخرتها ما بنيناه ينهالي العشم في بعض الازلام جا ضدّه= و لا حصل مما تعشمت مثقالي كيف ذا جا منه يا ربي اتلدّه= لابس(ن) من شين الافعال دسمالي ليت الاقشر ما تسمى على جدّه= جدّه اللي بالمراجل له افعالي طير ابن برمان معروف، من هدّه= يرجع وفاضه من اللي بغى خالي ما هنا اقوال(ن) بهجمات مرتدّه= كود به حربه، و من يحمي التالي فاضي(ن) ما فيه هاته و لا ودّه= مثل فاضي الدلّه اللي على الصالي ان تساوى بالولد هزله و جدِّه= ما حد(ن) يعطيه في مجلسه بالي كل واحد من ربوعه رفع يدّه= و صار ضايع بين شاني و عذّالي رافع(ن) خشمه، تقل ما حد(ن) قدِّه= و ان تكلم قلت ما فيه رجّالي لو يطلق زوجته خسرت العدّه= مهرة تسوى و لا فيه خيالي مثل هذا حل بالماقفه حدّه=و ذا جزاه اللي محدّد للانذالي |
الهواء جنوبيه
هوا ربي جنوبيّة .. و اشوف النشو بالقبلة=عسى ربي يجيب الخير للديرة و يحييها ألا يالله وسميّة .. تجي و تْنبِّت الرِّبْلَة= و يعم الخير في دار السعد، و يعز واليها جفاف(ن) ما هنا زيّه .. مع أسعار مِنْدَبْلَة= و حفلات المزاين عندنا كثرت بلاويها و ضَعَفْ نقد السعودية .. و به تجّار منهبله= اتضاعِفْ سعر كل اللي تبيع، و غِِبِنْ شاريها مدام ان سوقنا امْتيَّهْ .. و كلّ(ن) مادّ(ن) حبله= و وزارتنا قدم هذا الجشع مشلولة يديها يقولون البلد حيّه .. و كل اهل الخليجْ قَـبْلِهْ= بها الأسعار أرفع من بلدنا، الله يحميها و مداخيل الخليجيّه ..،قدمنا تقرع الطبلة= و زيادة خادم البيتين راحت قبل نجنيها ملِكنا صافي النيّه ..، عسى الحَسْنات تكتب له= و عسى الله يرزقه ناس(ن) تسوّي اللي يوصِِّّيها عساه يطوّف الميّه ..، شبيه مْعزّي و شبله= و مع ولي عهده ياخذ الهجمه و ينهيها و عسى كل لَحْمَة(ن) نيَّه ..، عقوق، مشوّهه، دَبْله= بجاه الله تخيب، و يكسب الاحزان راعيها |
ادعوا معي
يا الله عبدك طلبك و لا تخيّب رجاه= أنت العليم الحليم الواحد المقتدر أنت الرؤوف بعباده معتلي في سماه= اللي وعد خلقه الموقف بيوم الحشر اللي الى حل فينا خطب كل(ن) نصاه= نطلبك ترفع معاناة الدّبش و البشر القحط خيّم على الديرة وشيّد بناه= معاد فيها من الامحال عود(ن) خضر ندعوك تنش السّحاب اللي محمّلْ بماه= و عجِّل برحمتك للديره بكثر المطر من حد عرعر الى نجران و اللي وراه= و من حد تبوك لين حدود دولة قطر كلّ(ن) الى رحمتك يرجي و يشكي ضماه= و لا فيه جم(ن) غزير(ن) ماه و الا نهر مغير صحرا(ن) سرابه يطـّرد من يراه= يحسبه مويه و هو ما فيه غير الدّهر يوم آدم اللي ومره الله بأمر و عصاه= و جازاه ربه و حطّه في مكان(ن) غبر كلّ(ن) على نيته يرزق و يلقى جزاه= إن كان خير(ن) بخير أو كان شر(ن) بشر يالله برحمتك برضك و الفَرَج و النّجاه= من كل شر(ن) يعم بسبة اهل القشر يا الله بوسميّة(ن) تعم كلّ اتّجاه= و تِنزِلْ بركْتِكْ بما تاطا و لا به ضرر نبي نشوف الزبيدي كالمرو في رباه= يم الصداوي و بالصرار وارض الحفر و نبي نشوف الشعير مزبّر(ن) ما اشتراه= اللي يربي الغنم و الابل و الا البقر و صلاة ربي عدد ما حج بيته وجاه= من كل حدب(ن) و صوب ملبي(ن) و اعتمر على نبي فرض صومه و سن الصلاه= محمد المصطفى ابو جبين(ن) أغر |
الدرب سالك
كل واحد ما يعيش الا حياته=و لا وقف يومه مشى، و الدرب سالك و لو يعَرْفِ ابن آدم بساعة وفاته= كان ما قامت و لا عِمرتْ ممالك و (انت) إنسان(ن) بِلي في حب ذاته= لو اتخَيَّر بين موتك أو عيالك كان قلت ابقى و غيري له فواته= لو تعيش القرن معْ ربعكْ و آلك ما حد(ن) عَبَّرْ عياله أو بناته= العمر غالي، و لو كان امتهالك و لا حد(ن) يخشى عذِلْ و الا شماته="خل لي فالي و لك يا شيخ فالك" الله ابخص ببن آدم واهْفواته= حكمة الله بالغة في كل ذلك و لا وصل وقت الرحيل، اطلب ثباته=و الجواب الصّح اذا ما جا سوالك كل عبد(ن) عندها يلقى سواته= كان خير بخيرْ، وانْ شرْ بمهالك فا اطلب الرحمه من اللـ ــَّـ ــــ ـــه و نجاته= ف ماقف(ن) مافيه هذا لي و ذا لك و السلام من الولي يتبع صلاته= خلها على النبي آخر مقالك |
الديره اللِّي الى جيت انشرح صدري
يا ديرةٍ ما تعرف الزيف و الغدري= طيب اهْلها جوّد التاريخ توثيقه الديره اللِّي الى جيت انشرح صدري= و ان رحت عنها يصير الصدر به ضيقه و ان كان تسأل عن الاسباب ما أدري= مغير أشفشف لها و البعد ما اطيقه مدري هو الضلع و الا الحمض و السدري= و الا النخل مع كوافيره و تفليقه و الا المفالي و بيت الشعر و الخدري= و الا قصيد الغَزَلْ و غنا طواريقه و الا الى نمت طول الليل من بدري= و مع طلعة الفجر أفوق، و زينها فيقه و الا لصيد الحجل و الوبر والكِدْري= و فراق ديرة غراب البين و نعيقه و الا جفا للجبيل و ريحها الودْري= لا رِحْم غاز المبيد و بار تسويقه لا خيَّم الليل شالوا غطوة القدري= و اللِّي سكن بالمدينه نشِّفوا ريقه يا ما حلى شرب ما "الشعراء" و هو كَدْري= أخير من تحلية ماهم و تلفيقه الوقت خارج حدوده يعتبر هدري= هذا بذوقي و كلّ(ن) له مذاويقه |
ياهل العلوم الطيبه و الطايلات = خوذوا النصيحة من نصوح(ن) قالها منيب اكبركم او اخبر في الحياة= و لاني صغير(ن) جاهل(ن) باهوالها ترى الزواج و قصته مثل الممات= محد(ن) يعَرْفِ بوين حَطِّ رحالها يالربع الى جاكم نصيب احدى البنات= خوذوه، خلّوها تروح بفالها و الا بتصبح في عداد العانسات= و لا تشوف و تهتني بعيالها و ان كان ما راحت، و هي معها خوات= مع الغلا، يبي يشح ريالها و تصبح ديونك يالابو متراكمات= أكثر من شناط امها و نعالها لياك تطرد في الطيور الطايرات= دام البنيّه جا لها رجّالها إن كان جا رجّال حافظ للصلاة= و من لابة(ن) تذكر بخير افعالها لياك تتردد و قل: أرحب ميات= و اعقد لها، مع الرضا، بحبالها اصلح لها رجل(ن) يلبسها العباة= و الى مشت والاه مثل ظلالها أخير من رجل(ن) يجي وقت المبات= و يروح صبح الله الى أعمالها أسفار ما تخلص و لا منها نجاة= و ام العيال ببيتها بلحالها ما فكّر الا في عمله و بالغناة= والبيت و الزوجة متى ما جالها هذي نصيحة واحد(ن) ما له سواة= الا يقدمها لمن يسوى لها |
تدلل يا آخر العنقود
آخر العنقود
تدلّل تدلّل زين يا آخر العنقود= مدام انك اصغرهم و لا بعدك اصغر منك أشوف ان ما بالعش ينقص و لابه زود= و دورك يبي ياتي و لاني مدافع عنك لو انه على كيفي بقى عشنا ملبود= و لا افرِّط بمن فيه لو كثر فيه الضنك و لا طق بابي راعي المطعم المقرود= معه سلّة(ن) مليانة(ن) من طعام "الجنك" الى راح مني قرش في دربه المحمود= والى كن عندي بين جدران بيتي بنك و اذا راح مني بيزة(ن) ما وراها فود= والى كنها مرمية(ن) عمد وسط "السنك" صحيح ان جمع القرش لاجل الليالي السود= لكن القعيطي يجعل اللي يعيل بضنك نصيحه أقدمها لمن لا يبي المنقود= بحياتك تمتع و اسعد اللي قريِّب منك |
كل ماقمت الصباح و شفت لي بالجو غيم= قلت يا رزّاق عطنا السيل، يا رب السما و أثرها غيوم الصناعة فوق، و بعِزّ الكريم= تحجب الشمس الضحى و الجو اصبح مظلما التلوِّث ذابح(ن) الناس و "الهيئة" تهيم= ضاعت الطاسة عسى عين الرقيبه للعمى كل غاز(ن) سام يطلق بالهوا و الشيخ نيم= و يتبجح في نظافة جونا، رحنا هما كل شهر(ن) ينشروا التقرير و يقولوا سليم= و المصحات بضحايا الربو وصلت للغما يبو متعب صابنا اهمال المُوَكّل بالصميم= شف لنا ناس(ن) تخاف الله مهمب ظلما كل جيران السعودية يعيشون بنعيم= و السواد الأعظم بشعبك يعامل كالدمى و الله انا ما دخلنا شك في طيب الزعيم= يبغي الشعب يتمتع في التطور و النما لكن اللِّي في الكراسي ما بهم رجل(ن) فهيم= همهم جمع الدراهم لو يمصون الدما يا عيال العود ياللي حبكم فينا مقيم= لا تخلون اللصوص تعوث با سنان و جما كل مأمون(ن) يقول: أبشر و لا توصي حكيم= و هو خاين للأمانه كن ما هو مسلما الله انه يصلح الاحوال و يذل الرجيم= ويصلح اللي معهم التنفيذ، حتى العلما و يا الله تنزِّل علينا الغيث يا رب(ن) عليم= خلقِكْ و بهايمك في الارض ميتة(ن) ظما |
صور و قصيدة http://bnyzid.com/uploads/42ecb4967b.jpg
يا باب ياللِّي راح نصفك مع الوَقْت= مِتْشبّث(ن) بجدار بيت الاحِبَّه تشكي فراق اهلك الى امسيت أو فِقْت= و تبكي على اللِّي تعَّبِكْ في مِشبِّه يا كثر زوارك منوَّلْ، و لا عِقْت= تفتحْ لهم ذِرْعان جود و محبَّه و يا كثر ما فاخَرْت في زينِك و مِقْت= و اليوم وجهك وَصفة(ن) للمسَبَّه و اليوم الى دشِّكْ خشاش(ن) تغَلَّقْت= و كبدِك من اللِّي حاصل(ن) مِسْتِصِبَّه قدامك المجباب قد ذاق ما ذِقْت= سواقفه طاحت و لا احد(ن) يطبِّه الظاهر اني في وصوفك توهّقْت= راسي مصَدِّعْ و اجْوَد الشِّعر كَبِّه يالآدمي مهما بداركْ تعلَّقْت= يجيك يوم(ن) كدر كاسك تعِبِّه دنياك ما تومَنْ و لو زانتِ و رِقْت= تبغَتْ فريستْها غَدِرْ ما تنِبِّه |
وداعية بوش
قالوا العراق انسه، و قلت استحاله= ما احد(ن) يبي ينسى العراق و نشاماه أرض العروبه كلها و الاصاله= مهيب تنسى دورها اللي عرفناه حتى و لو جا (بوش) بجيشه و ماله= يبي يعوِّد "شايل(ن) داه برداه" علج(ن) يبي ذلّ العراق و سعى له= و جنّد خشاش الارض تخدم نواياه الرافضة صارت بخبث و نذاله= تذبح هل السنّه برسم الموالاه و الفرس تبغي مجدها اللي غدا له= بعد الفتوح أيام (خالد) و شرواه و اليوم عوّد (بوش) قبل اعتزاله= للمالكي يبغاه يركع لمولاه و لما جلس في المؤتمر باختياله= جا له عراقي(ن) عريب(ن) و ناداه: يالكلب ابودِّعك ب ابلغ رساله= خذها على وجهك قبل ينتثر ماه و لا وجد بيديه الا نعاله= و رماه، ياليته توفق و لا اخطاه و (المالكي) حاول تصيبه بداله= يقول ذا عمي و انا ودّي افداه خاب البديل و خاب عمه و خاله= و خاب الروافض باول الوقت و اتلاه يالله يجي يوم و تسود العداله= على يدين احفاد (صدام) ياللــــــــه و ترجع لنا (بغداد) عقب الحثاله= وباقي الوطن يامن و يرجع مجلاه هذا البلد نبراسنا في نضاله= في وجه (كسرى) و (الخميني) و منشاه و صلوا على طه المنزّه و آله= اللّي شرع دين العدل، و اتبعناه |
كســـــــــــــرة غــــــــزّه
قطاع غزة ينادينا= يا مسلمين اسمعوا صوته ضاع الأمل و العَشَم فينا= مدام هَمِّ الرجل قوته يا كيف نعمر نوادينا= و سيوف الاعداء مصلوته و نسل الخنازير تغزينا= و الشرق و الغرب بِسْكُوتِه و نستنكر الغزو و ندينا= و صرنا مع الخلق حدوته و لا احدن يعبِّرْ شكاوينا= با صوات بحّا و مكْبوته و يا الله مكثر عزاوينا= بحساب ضوضاء ممقوته |
يا صقر لا تشكي
مجاراة لقصيدة صقر المراقيب يا صقر لا تشكي الهوا تِقِل مكلوم=ترى الهوا يودع صويبه بدايد طرد الجوازي كله الْكام و الْدوم= و جروح طاردها قبلهن جدايد حتى لو انه من مشاكيل و قروم= بآخر مطافه يصبح الحيل بايد ذي بنت حوّا طبعها المَيخْ و الزَّوم= هذي طبيعة لابسات القلايد حاجاتها دايم تجيها بمرسوم= و العازه اللي عندها شي كايد لو صار قلبك لاجلها كله ثلوم= و لو قلت فيها محكمات الشرايد ما تستمع صوتك و لو جيت بسلوم= تسفه مناديها وهذي عوايد ان طعتني طِرْ يا صقر و ابعد الحوم= واغسل هواها من خفوقك بتايد البحر مليانٍ "سبيطي" وبه "عُوم"= اتعب على صيده و لو هو امْكايَد هذي نصيحة واحدٍ جرّب الصّوم= عن حبهن و اصبح مع الوقت صايد |
بماسبة خطاب الملك عبد الله في مؤتم الكويت بيض الله وجه ابو متعب= يوم برّد وجه عذّاله قال: إسمع بالإذن و اكتب=بعضكم ف ارض الله حثاله احد يتشدَّق و هو يكذب= و احد صاير بالبلد عاله و احد في ابلاج العدو يلعب= راسماله تحت سرواله أجربٍ ما يعرف الا اجرب= و جاعلٍ له قيمه و هاله كل ما سمع الجرس يطرب= من جحر شارون و أشباله ثم يعمل لي ولد يَعْرُبْ= و هو مسخٍ للعدو آله و بعضكم ساذج و اكل مقلب=حجِّزه "عم سام" بامواله و بعضكم للفرس جا مكسب= للملالي صار مغواله و دام كلٍّ بالبلد مذنب= كل واحد يلبس نعاله ادخلوا علي بالمكتب = و اسمعوا من ميَّل عقاله إعقلوا و الا ترى بضرب= كل من لا يحترم حاله لا تصيروا اضحوكةٍ للغرب=اصلحوا مع بعض ذا اللاله قالوا ابشر يا أبو متعب= والدٍ يامر على عياله |
خويا البَرّ
أحب البر لاجل البر واسع= و هواه انظيف و المنظر خُرافه يبعدني عن المدن و هواها= و أفرح كل ما ابعدت المسافه إلى جت رحلةٍ فيها نشاما= وساع صدور ما فيهم لقافه خفيفين النفوس بكل ماقف= لهم سَبقٍ على دَور الضيافه و لا فيهم كسولٍ و اتكالي= الى منه هرج جا الهرج تافه رجالٍ كل منهم فيه نخوه= و يقوموا الفجر و يصلّوا مَخافَه و الى جا وقت وجبتهم و الاهم= حضور و لا شكوا كثر الكلافه و الى جا وقت عودتهم لاهلهم= و الى مكانهم أكثر نظافه هذولا اللي مخاواهم ينومس= و لا أحدٍ قال معهم يا حسافه |
يا صاحبي
يا صاحبي لا تعيش بليلك الحَالِك= خلِّك وسيع البنايد لا تجي حَشْري و ان كان تبغى تعيش بجوِّك لحالك= في ماقف(ن) ما سوى رِبع(ن) و لا عِشري شكِّكْ بنفسكْ و من حولِكْ و في عْيالِكْ= و تعيشْ في عزلة(ن) محْد(ن) بها خَشْري لا تحسبك تملك الباقين بريالك= يملكهم اللِّي منزِّلْ سورة الحشري مهوب موج الأثير لشيل موّالك= كلّ(ن) له الحق بالإرسال و النَّشْري و ان كان تبغى تعيش و تسعد اطفالك= أطلق حجاجك و كن متواضع(ن) عَشْري و تعيش عيشهْ هنيَّه طيب(ن) فالك= وفي كل سوق(ن) تبيع براحهْ و تشري و احذرْ بوقت الحَزِمْ تصير مِتْهالك= ما ياخذ الحق مستسلم و منْهَشْري و خلك صدوق(ن) كما الميزان با عمالك= الصِّدق و الطِّيب يُحْمَدْ ثم ينْتَشْري |
ألا يا وجودي وجد شيخ(ن) عليه ديون= أهلها وراها و الرجل عجز يوفيها الى جا الشهر خمسه و عشرين جاه غبون= معاشه ثلاث آلاف فيها و ما فيها و بيته به صغار(ن) عن الدَّين ما يدرون= ويحسبون برج المملكة له و راعيها و هو كَبِرْ سنِّه و الجَهَدْ كل يوم بدون= ولا فيهم اللي يحتمل حر صاليها على سجّة(ن) بعد العصر تنسي المحزون= تعب يومه بدنيا(ن) تزاحم بلاويها مع لابة نعم الرجاجيل ما يِشْنَون= بدرب الشكاله و يتعدوا حراويها بفيَّة جبل "ثهلان" عقب العصر يقضون= مع بعضهم باقي النهار بتساليها و الى جا الغروب و صارت الشمس كالعرجون= دعوا ربهم يحفظ بلاد(ن) ربوا فيها و عسى الله يسيّل وادي(ن) بالرّمل مدفون= روافده ما سالت زمن علاويها علشان يروى الزرع و الباديه يَسْلَون= مِنِ ارْعيّة(ن) تشبعْ رِعِي ما تغذّيها |
يالله دخيلك
يا الله دخيلك من رداة الحظ و ضعاف النفوس=يا واحد(ن) لو الجزا بالمثل عبده ما عطى بعض العرب ما همه الا بطنه ولمّ الفلوس= من كبر بطنه ما يشوف اقدامه الا لا خطا تلقاه يتبع حس خشمه للولايم و العروس= ما همه ان كانت بروس جبال و الا في وطا و لا جا لبيته ما لقا اكله حوّله يوم(ن) عبوس= واصبح مثل مبنى التجاره تهمة محمد عطا و الى حلف يحلف و هو كذاب في حلف(ن) غموس=ما يعطي العلم الصحيح و لا يحسِّب للخطا من جا بجنبه ما سمع غير القواطع و الضروس= يشبه لجنزير التركتور لا تحرّك في بطا و الى حكى كنه خبير يقدِّم لغيره دروس=و هو على الفاضي يبيع الهرج بلسان يهطا و لا وَصْل للصمله و صارت فيه ارياق(ن) يبوس= يصاب صاحبنا برعشه بعد خوف(ن) مفرطا هذا و مثله ودِّك تخليه في جحره يحوس= و الى حكى تقطع لسانه و اللهاة بمشرطا |
ماني لتلميع الرموز محدودي
ماني لتلميع الرموز محدودي= إن كان في رمزية الرمز اصاله مثلي يزيد الرمز عرفه صعودي=ماني من اللي قاصراتٍ حباله أطلع بأفعالي المعالي سنودي= و دربي قِبَلْ قدام في كل حاله و لاني قليِّل خاتمه أو جحودي= ما انسى رفاق المعرفه و الزماله أنسى المراتب كلها في قعودي= مع عامة الاقراب و اهل الشكاله و في كل مجلس لي كلام معدودي=كلام يفهمه الجميع بمقاله أفهِّم الامِّي بلهجة جدودي=و مع استاذ الجامعه لي اطلاله هذي حقيقه ما تِطَلَّبْ شهودي=و اللي يشك بكلمتي هو و فاله |
من طالنا خيره عسى عمره يطول= ما يجحد اهل الطّيب يكود الرِّدي شعيل ما يخذلك في شيل الحمول= و لا يتعب من الماد لو هو سرمدي عنِّز على زحلٍ مجرَّب من زحول= الى نخيت لفزعته جاك يعدي و ان تهت في بحرٍ به امواجٍ تهول= تلقاه في كبد السما مثل الجدي مهوب ثرثارٍ يقول و لا يطول= عنده لسانه راس ماله و البَدي الى شبع من نايد الناس الغفول= عود على لحمه بموس و مبردي هذا و شبهه في البلد ودِّك يزول= حتى البلد ينعم بخيره و يهدي و ربّي حمى هذي البلد دار الرسول= من شلّةٍ خانت هل الكف الندي نجم الأمن عساه يبطي بالإفول=بالطيب و الفزعات ما جا له لدي أعطى الأمان لنذل مرسل من نذول= و غدر وراح بدرب شيطانه فدي |
المولّع ما يلام
أشهد اني بعد ذا العصر امتغلِّق=يوم شبوا النار في وسط الخيامي شفت لي نارٍ كما الثوب المعلّق=ثوب مسجونٍ بسجن قوانتنامي ريحها عقب المطر في الجو حلّق= و زاد وجدي و المولّع ما يلامي حبي الصافي ترا ما به تملّق= لديرتي و الضلع و الربع الكرامي لو مدح حسان بالشعر اهل جلّق= مدحي لأهلي و هو مدحه لشامي ليت منهو لاسود الضلع يتسلّق=لو برقي الضلع توجعني عظامي الكرم و الجود و الحُبّ يتخلّق= بديرةٍ في الطيب بالصفّ الامامي ما حلا يومٍ به الكافور فلّق= و النخل ما بين تلقيح و كمامي عل بابٍ ذي سلومه ما يغلّق= و ديرته تسقى من الغيم الرّكامي |
ارسل لي صديق عزيز من موظفي أرامكوا يدعى "بجاد" هذه الأبيات بالجوال:
لو زماني جار و اصحابي جلوا= رحمة الله ما يقفّل بابها لي رفيقٍ لو قسى وقته ولو= اطلبه صعب المطالب جابها ما سلا عني لو العالم سلوا=فدوته بيض اللحا و اشنابها و الصداقه بير و الصدق الدلو= و الوفا ماها و هو طلابها و النشاما في المشاريف اعتلوا= و الرخوم منوخين اركابها و انت لو تحتاجني عطني "ألو"= فدوتك عيني و سود اهدابها و كان ردي:
الصحاب اللي ليا بعدوا غلوا= ما نسيناهم مع غيابها لهم مكانٍ ما عطيناه ابخُلُوّ= لو بوزن الدار مع أعتابها لا بةٍ لو جات نبّه ما بخَلَوا=قدموا لي خدمةٍ برتابها الزمن مع قصر ساعاته حلو= و الزياره بالعمل أسبابها النشاما في مكانتهم عَلوا=سجِّل التاريخ يا كتابها كل ما هاموا الرفيعات وصلوا= و من عرف هذي العرب ما عابها دايمٍ قدّام ما مرّه تَلَوا= و تشبع الحَرار من مخلابها |
هذه أبيات وجهت في وقتها الى من يستاهلها:
جابك الداخن قبل جحرك يهَدِّي= بعد ما حطيت أبياتي السراعي بيوتك اللي تو جيت ابها تفدِّي= ثلثها (ساري) و باقيها دفاعي وِرْدك اللِّي ما يجيب و لا يودِّي= صايع(ن) من حلِّة(ن) نزله صياعي الوسوم اللِّي على خَدِّكْ بيدِّي= واسمك في حلِّتِك و انته تراعي أعرفك مثل النطيحه و متردِّي= ما تشيل الحمل من لين الكراعي و عرفي اللِّي يجعلك دايم تلدِّي= يمِّتي و احركك باطول صباعي أنت جيت هنا يبو مخٍّ وصدِّي= ما طلبتك جيت للمسلخ طواعي لو سلوكك زين ما ركَّبت شدِّي= فوق نسنوسك و انا تحتي نطاعي ما تخلِّي عادتك يبا التجَدِّي= الردى في مسلكك حق(ن) مشاعي أنت يا طير الرخَم منتب تهَدِّي= غير في المرْدَم مع مثلك جياعي حوصَلَتْك اللِّي بما فيها تِنِدِّي= الله يخليِّ لها الناس الشباعي توِّك انته ما بعدْ بيَّحتْ سَدِّي= توني فلَّيت بالرِّحله شراعي كان ما تنطح هنا جَزري و مَدِّي= اركب السكَّه على النقل الجماعي و انحر جحيركْ و قل: يا نسل جَدِّي= دثّروني عندكم بين التلاعي أنت ما لك مكسب(ن) لو جيت ضِدِّي= روح سجِّل بالضمان الاجتماعي لك و لا مثالك ترى الدوله تِكِدِّي= تسترك مع الولايا و الضفاعي ما انت بَحْر و لا انت نَهْر و لا انت خَدِّي= أنت مستنقعْ مخيس و لا تباعي من سكَن حولك و شمّ الريح شَدِّي= و من يمر حذاك يبلى بالهواعي البلد قفَّتْ عن نحِيَّتك صَدِّي= ما تبي قربك و لا حتى الضباعي أعرف الشجْره، مؤكَّدْ، مش تِقَدِّي= و لو عرفتك جاك لك بيت(ن) وِداعي بَعْضْ ما تستاهلِه قبل التِّمَدِّي= و كان تبغي زود عوِّدْ لي رياعي |
الواسطه و ما أدراك ما الواسطه
بعض العرب يا صل المسؤول دون ارتباط= والبعظ الآخر معه موعد و أزرى يجيه يا لله عسى حظنا احسن يوم عبر الصراط= يوم العمل هو وساطتنا لما نرتجيه دام المساكين ما يلقون حتى البطاط= و اللي معه مال حتى دورهم يشتريه تبي تصير الامور مدحدره لانحطاط= و ينعم بها الكوثله و اللي يعبد الوجيه لا قالوا الناس : مابه واسطه قل: خراط= الرجل يبغى وساطه لو على والديه صارت مع الناس جزء من الفخر و الهياط= كلٍّ يعرفه، و كلٍّ ياصله لويبيه لا جيت بالواسطه كلٍّ فرش لك بساط= و ان جيت بالحق الابلج قيل هذا سفيه يا للأسف راح وقت الصدق و الانضباط= وجا وقت ابو بزوطه، و ابشر، و بشت النبيه و لا جا المداهن و دهن السير مع السماط= يالشيخ تاخذ معاها كل ما تشتهيه و انا اشهد ان الحلال احسن بخمسين غاط= يرتاح معه الضمير و آكله ما عليه |
موتري دايم تحت رجلي و رسم الخدمه
راكب اللِّي لا بغيت الموتر اللِّي قدمه= تحسبه واقف و لو هو جايبٍ طبلونه كنِّه الشيهانه اللِّي عقب جوع و حَدمَه= جايعه تبغى العشا و الخرب شوف عيونه لين طاف و كرّفِه ريح اللّهب من عَدمِه= و ابعد و خلاّه، يا ربي عساك تصونه ناحرٍ دارٍ بها ريم و جوازي و ادمه= و الفواكه بالشجر متنوعه بغصونه موتري دايم تحت رجلي و رسم الخِدمَه= ما حدٍ غيري و قبلي حرَّك ادرقسونه كنِّه البنت العرووس اللِّي تخيَّر هِدمِه= من بلد "باريس" و الا "هوليوود" يجونه عل ما حاشه عَكاس وعين والا صدمَه= أشهد انِّه مركبٍ فارِه، بناه و لونه |
الولا للمملكه ما نبيعه بالمزاد
نحمد الله يوم شرّف ابو متعب و عاد= بعد ما سافر و ربي حباه العافيه يوم جانا فرحت الناس في كل البلاد= وجدّدت - طوع - القسم في نفوسٍ صافيه القسم بالطاعه و يدّها فوق الزناد=لمن تسوِّل نفسه المارقه و الجافيه الشَّعِب يشكر لك اوامرك في كل ناد=أشهد انْها للمواطن بلاسم شافيه ندعي الله لك بعمرٍ طويل و بالسداد= في دروب الخير يبو يمينٍ رافيه ما عرفنا منك بالعون يا طير الهداد= غير كل الخير في البيّنه و الخافيه سر و كل الشعب خلفك على درب الجهاد= للوطن و الدين نمشي قدمنا حافيه الولا للمملكه ما نبيعه بالمزاد= نجدد البيعه لآل السعود الوافيه البلاد اللي حمت ديننا فوق الشداد= وفي زمان العلم و العولمه و المافيه الله يبعّد بلدنا عن دروب النكاد= ويخزي الحساد و الرافضه و الهافيه (كان انت بخير حنا بخير) و ذا وكاد= سر سنود - الله يوفقك - للمشرافيه |
البروق اللي تلاعج
البروق اللي تلاعج من شمال و قبله= علّها ينزل مطرها ثم يسقي الديره لين ينبت من مطرها سهلها و العبله= و يجلي قلوب البشر و يبدد التغبيره و ينبت الحوذان و البقرا و ينبت ربله= و الثمام بوادي "الحفنه" يغورب طيره اشهد ان كبدي من اللي حاصلن مندبله= كل ما يحصل غريب و كايدٍ تبريره العرب صارت بوقت العولمه منهبله= ناس لا ترعى قرابه أو تراعي جيره كل واحد صابته نشوه لصوت الطبله= و الرويبض قام يتململ و يقرع زيره يوم عنتر ساتره ربه و راتب عبله= ما شكر ربه على ستره! ، و ابلش غيره ما خذ العبره من اهل الفتنه اللي قبله= اصبحوا في مردم التاريخ في تقريره ما معه في غيّه الا الإمّعه و الأبْله= و آخرتها ينتكس عنتر و يمهن صيره وبالنهايه يالله ابنوّن صدوقن وبله= يسيِّل الوادي و تملا جمّة الما بيره |
اقتباس:
محاوله للتنسيق |
هذه مجاراتي لقصيدة الشاعر الكبير عبد الله بن زويبن الحربي:
يا وجهي اللِّي احْرِقْتِه لفحَة الكَنَّه= و باقي الجسد كنّ يلعَبِّه مشاذيبي كنّ التهامي كسا جسمي و يبرنِّه= ما باقي الا العصب و العظم والشيبي و الا تحت رحمة اطيورن يلوعنِّه= ما بين عكف المناقر و المخاليبي سِبّة هواجيسي اللِّي جت لها حَنَّه= تسري مساري و تِتْفنّن بتعذيبي تتابعن كنّهن رِتلن من الرَّنَّه=لا ورّدت للعَلف من غير ترتيبي جَنْ يعرضن لي معاناتي و اعادنِّه= مع بعض ربعي و مع بعض الاجانيبي اللِّي تبَطِّن خلاف اللِّي يورِّنِّه= ناسن "سَلوليّتن"* في السِّر و الغيبي طريقها مهّده و املاه ابو زنَّه= يومه فتن أمّنا و آدَمْ بتكذيبي من عقب ماهم سوا في جنّتن غَنَّه=فرقهم ابليس تشريقن و تغريبي و بعضن من اعيالهم ما خيّبوا ظنِّه= يمشون في خدمته مع كل ترحيبي لا صِرت معهم يورّوا طِيبْ و امْحَنَّه= و لا غِبت عنهم كلوك ابسطوة النيبي و مثلي ألاعيبهم ما و الله اغْرنِّه= أعْرِفْ طريقي بلا شكِّن و لا رَيبي أمشي على سنِّة الله و انعَمِ ابمَنِّه= و لولا تعاليم ديني بان بي عيبي |
الساعة الآن 12:50 AM |
Powered by vBulletin® Copyright ©2000 - 2025, Jelsoft Enterprises Ltd. Designed & TranZ By Almuhajir