قال الذى من جد بيح كنينه=وسط الضماير هاجسي ساجني سوج
حطيت للمعنى بروج(ن) حصينه=والباب مع قفله على السر مزلوج
تلاطمت بحور نفسي سجينه=سجينتن بالصدر تبغى لها أخروج
قلت أبشري قد جاك اللي تبينه=نبي نطلعك بها فوج(ن) و فوج
أوصيتكم فى جزلها والسمينه=بقيادة اللي حافظه داخل دروج
جنا كما برق(ن) تقافا غشينه=وراحن كما خيل(ن)تطارد بلا سروج
شاعر ولاشك المعاني تدينه=قال الكلام اللي على العرف ممجوج
شعره جميل (ن) والمعاني هجينه= بعض الغزل مرفوض لو كان للزوج
كانه خيال قد تعديت عينه=وكانه حقيقي كامل الهرج مرهوج
يا اللي سترك الله كشفت الدفينه=ياراعي المعنى ترا الدرب مسهوج
مجاهره تبقى عليكم غبينه=ماهى لنا عادة خواجات وزنوج
كلن يزود ماذكرتم بحينه=يزيد بالهرجه على الخلق ويدوج
مادام راع الشأن بين خزينه=الله يعينه من على زود منتوج
كلن على ماقيل تحسب سنينه=أما تزود خيروالا على عوج
والسر عند الناس سلعه أمينه=السر خله داخل القلب ملفوج
ليتك سترت السر بينك وبينه=مهما يكون القلب بالوجد مخلوج
كلن محاسب فى كلامه ودينه=أما سقط والا أرتفع عالي بروج
وصلوا على المختار يا ذاكرينه =أخير من بعض السواليف وهروج