قالوا ندا راعي وفا قلت معلـوم=معروف مايحتاج منكـم شهـاده
صيته وصلني لو ماعرفه ولا يوم=وذي ميزة اللي ماخذ الطيب عاده
هذا ندا كيد العـدا حيّـد القـوم=بالطيب والاخلاق نـال السيـاده
عنده لغه فيها شهادتـه دبلـوم=وعنده علوم ارجال فيه الركـاده
دبلوم ماخذها على نهج مرسـوم=وعقبـال دكتـوراه ولاّ عمـاده
مايجرفه تيـار بالعنـف متهـوم=حكيـم راي موالـي ٍ للقـيـاده
يفزع لمن ينخاه لاصار مظلـوم=يالين يوصل من نخـاه لمـراده
وانا عليه اشكي من الود مهموم=ولاضن مثلـه باخـل ٍ بجتهـاده
واقول صاحبكم هجر لذّة النـوم=ولا عاد يلقى طعم شربـه وزاده
مادمني من شوفة الزين محـروم=اللـي بلانـي يانـدا فـي وداده
رمز الحلا من ذرة الشين معدوم=مابنصفه لو قلـت سكـر زيـاده
ولو لاي رجل ٍ يتقي هرجة اللوم=واخـاف تلحقنـي وراه النقـاده
لابيح لك باسمه واخليه معلـوم=واكتب حروفه فوق فنّدق رمـاده

الاوله نقول ياجعلك تدوم=وتعيش في دنيا الرغد والسعاده
ياشاعر(ن)عندي مقدر ومحشوم=وعند الرجال اللي تعرفه زياده
شغموم لكنه ماهو بأي شغموم=يشوي عدوه مثل شوي الجراده
والثانيه نقول ملزوم ملزوم=نشكرك ياخالد على هالاشاده
قصيدتك تقديرها خمسة نجوم=تشبه من الماس المصفى قلاده
متمكن بالشعر مثل ابن مكتوم=يصعب على صعب القوافي عناده
والثالثه نقول وش فيك مكلوم=حنا علشانك فتحنا عياده
قلي وش اللي صار والوضع محسوم=وقلي عن الاسباب للاستفاده
مااقدر اقول الراي والسر مكتوم=يمكن حبيبك شوف قربك عياده
والادمي بظروف دنياه محكوم=لكن رحله عند بابه وناده
وقل له عن اللي صار لاتعيش بحلوم=ومن راس خلك تستمع للافاده
اما عنه ياصقر تتبعد الحوم=وتنسى مجاله ياقوي الاراده
والاتجيب الصك مبرم ومختوم=ونسوي الحفله بفندق رماده
ان كانها بالجاه والمال مخدوم=المال من شانك ابى اعلن نفاده
راع الهوى من شانه يطيح ويقوم=ويصيرعنده قو عزم وجلاده