طوَّل غيابك يا هوا البال لا تغيب = لولا غيابك ماجرم الشعر فيّا
لي وعليّه في حضورك مواجيب = باللوح كتبن في حياتي عليّا
ماتشوفني عن نفسي اسج وغيب = مع الخيال أغيب ماني هنيّا
اركب على متون الرياح اللواهيب = اطوي تضاريس المسافات طيّا
يسوقني وقتي على غير ترتيب = بليلٍ شحيح النور مافيه ضيّا
طرقت بابٍ يسمع الصوت مايجيب = اسمعت لو ناديت ياصوت حيّا
من دون حلمي جاثم النمر والذيب = يتناوبون الدار صبح وعشيّا
دربي طويل وحال دونه غياهيب = وزادي قليل ولا معي لتر ميّا
هواي روس النايفات المراقيب = قبّة شريفٍ في ذعاذيع فيّا
مجدٍ يصادم مبرمات اللواليب = له شاهدٍ بين القمر والثرياء
ان ماجزينا راعي الطيب بالطيب = يحرم علينا لبسنا كل زيّا
أنا من حرب معرّبين المناسيب = قبيلةٍ ينطح بها كل هيّا
مثل السحاب اللي انصوبه محاديب = يروي غشينه يابس الارض ريّا
ون جت على روس النوازي جناديب = وعقيدها عن واجب الصلح عيّا
ركبوا عشاشيق البنات الرعبيب = من فوق حجلٍ زادن الني نيّا
نقسم بهم ترسانة الحرب لاهيب = لاصاح صياح الغضب للحميّا

كم نافلة وضحٍ عليها الدباديب = نكويبها وجيه البغيضين كيّا