ياكاتب اكتب كتاب زاد عن كل المكاتيب= زين معانيه لجله للرجال الصارفية
واكتب سلام(ن) مصفا مثل نفح المسك والطيب= خله سواة العسل وايضا حلاه اكثر شوية
وانصا به اصحابنا اللي كاملين(ن) فالمواجيب= اصحابنا اهل الشجاعة والمواقيف العلية
واقول لايمن ترى مهما كتبنا فيك يالذيب= مااظن ياطيب الافعال نلحق لك جزية
ماكل منه تنصب يحتمي زين المناصيب= وانتم حميتم مناصبكم وحربتكم قوية
وابوك جود خوالك يوم فكر فالمعازيب= الله عساه البقا عقب لنا قايد سرية
يافرحة اللي زبنكم يوم جا قطع العراقيب= تساعدونه على وضح النقا ياهل الحمية
والضيف من يوم يوصل تكرمونه بالتراحيب= ويلقى الشحم والدلال العامرة بالشاذلية
واللي وطاه الزمان وعضته بعض المخاليب= ينصى شيوخ الغوانم ثم يلقا القابلية
ربع لياجاهم الطلاب قاموا بالمطاليب= مافكرو فالخساره والتعب روحه وجيه
واخص ابو مشعل اللي لا رما يرمي بتصويب= له فزعة تنصف المظلوم والخطوة جرية
يستاهل المدح من حاشه بلاشك(ن) ولاريب= ماقلتها راجي(ن) منهم كثير ولا بليه
ياغير وفقة رجال(ن) مع بعضها فالاصاعيب= اليا طلبناه جا ولياطلبنا له سوية
والطيب ماهو غريب ليا حصل من معدن الطيب= انتم ذهب والذهب عندالعرب عملة نقية
والغانمي والعبيدي من قديم الوقت اقاريب= ماهو من اليوم سابق من عصور الجاهلية
واليوم حنا في عهد الخير مانلقا متاعيب= الله يعز الملوك اللي يعزون الرعية
نمشي على نهج اهلنا في طريق الطيب ونصيب = نمشي سوا فاللاوازم بالمشاريب العذية
واسلم وسلم على ابو ايمن وخذ ربعه بترتيب= وبلغ سلامي على طه عمر راع الوفية
ويضفي سلامي على كل الاقارب والاجانيب= اللي يحضرون فالمجلس لهم حق عليه
واختم كلامي بذكر الله عليم الجهر والغيب= الي خلقنا وحنا نرتجي منه العطية