الشعر له قيمة ومعنى ومضمون = بيت(ن) معزز والعرب يقصدونه
الشعر مدح ونصح باللطف مقنون = ونهي(ن) عن الباطل ومن يفعلونه
الشعر عند اهل المروات مقرون = بالطيب من مبداه لاقصى غصونه
الشعر بحر(ن) صافي الطعم واللون= حالي كما ذوب العسل في صحونه
الشعر زبدة مخ صافي ومامون = واللي يقدر قيمته مايخونه
در(ن) وجوهر بالموازين موزون= اهل الشجاعة بالذ هب يشترونه
الشعر عند اجدادنا كان مسنون = شيمة عرب من قبلنا يبدعونه
مكانته عليا مع اللي يعرفون= نقش(ن) على صم الحجر ينقشونه
الشعر يبدي ما بداخلك مدفون= يرفع مقام المرء واللا يهونه
الشعر يصل القلب بالرفق والهون= يدخل قلوب الناس ويقدرونه
باضرب مثل فالشعر للعال والدون= ولا اقول انا شاعر يرى الناس دونه
شاعر ولي فالشعر خبرة وقانون = وليابنيت البيت اعزز ركونه
كم واحد(ن) فالناس مبلي ومحزون = ولياتغنى الشعر يبري حزونه
كم واحد(ن) طول الدهر عاش مديون= ساق القوافي وانقضت له ديونه
كم واحد(ن) فالناس عاشق ومفتون = صاغ القصيدة في مضنة عيونه
زين معانيها على ساس متقون = تعبير صادق ماتغير ظنونه
بين وداد(ن) داخل القلب مكنون= لهل الحسب واهل الحسب يقبلونه
ماقال انا حبيت من كان مزيون= وراح يتغزل في حلاه وزيونه
مابين اوصافه يبا العرض مصيون = من صان عرض الناس ربي يصونه
كان الهدف قربه لناس يعزون= اليا قربهم واحد(ن) يرفعونه
باحلى قصيدة جوه اهلها يقولون= ابشر بمطلوبك ومنا المعونه
نال الطلب والناس جوله يهنون= لاساق جاه ولا تعنت ضعونه
هذا المباح اللي له الناس يسعون = من طاب عرقه سرع طالت فنونه
اما الذي في كل وادي يهيمون= واشعارهم فيها الردى والعفونة
بالقذف والتجريح للناس يرمون= ماهمهم مظلوم لو يظلمونه
نثر(ن) مجمع جوفه الفسق مبطون= عزاه للي علته في لحونه
من ولفه يبقا فحسرات واغبون = دايم وتلقا اهل الردى فالمهونة
درب(ن) به الانذال والكفر يمشون=اهل الشرف من طبعهم يكرهونه
تلقا لعثرات القدم من يداوون= وعثرة لسان المرء تجرح متونه
وانا هرجت الصدق وابليس ملعون= شيخ(ن) وبيبان العرب يعرفونه
ابوي سلم لي على الطيب عربون = ونا بمد الطيب للي يبونه
صلوا على سيد البشر سيد الكون = والال واصحا به ومن يتبعونه