لا يا غناتي حـرب سالـم ومسروح=وأخص منهـم عـوف نـاسٍ صدوقـة
وين الذي يآمر على القلـب والروح=وينه عسـى مـا بـه خـلافٍ يعوقه
وين الذي دايم على الوصـل مشفوح=وينـه عسـى مـا ذقـت لا ما يذوقه
ما ذقت غير الهـم والحـزن والنوح=وذكرى تلوع القلـب ويـزداد شوقه
ماهو حرامٍ يسـرق القلـب ويروح؟=ماهي جريمـه يـوم يقطـع عروقه؟
والله لسير الزيـر لـو صـار مذبوح=وأقتص مـن جسـاس وآخـذ حقوقه
ومنيب انـا فهـدٍ لـو الـدم مسفوح=هـذا حبيبـي منهـو اللـي يفوقه
هذا عريب السـاس بالزيـن ممدوح=ما شفت انـا مثلـه بحسنـه وذوقه
كلـه علـى بعضـه جميـلٍ ومملـوح =لامـن سـال قلبـي يجـاوب خفوقـه
لا من حكى عطرٍ مـن المبسـم يفوح=ولامن ضحـك للغيـم لاحـت بروقه
قمت اتذكـر لـي سواليـف ومزوح=مـع الأميـن اللـي خفوقـي يبوقه
اذكر يقول انته هـوى البـال والروح=ومهري حليـب السبـع لازم تسوقه
واليـوم بغيابـه هواجيـس وسروح=ودمعـة ألـم شابـت ونفـسٍ زهوقه
جيته بقول انـي مـن العـام مطروح=والنفس لجل الوصـل ظميـا شفوقه
قال الوصال اليـوم ممحـي وممسوح=وأرسـل تناهيـدٍ وعبـرا إمخنـوقـه
ليلـة زفافـه دمـع وآهـات وجروح=جـرحٍ عميـقٍ محتمـل جـرح فوقه
وليلة زفافـه ماتـت افـراح وطموح=وماتت أمانينا ومهره سبوقه
أضحك على نفسي وانا اكتب على اللوح = الله خلقهـا لــي ولــي إمخلوقــــــه
وما دمت انا حيٍ وفـي عالـم البوح=هـذي حكايـة عـاشـقٍ ومّعشوقــه
ومـدام بـاب الـرب للخلـق مفتـــوح=الله يعـيـن القـلـب لا زاد شــوقه